உலகெங்கிலும் மெகா ஹிட் அடித்த அவதார் திரைப்படத்தின் மூன்றாம் பாகத்தின் டைட்டிலை இயக்குநர் ஜேம்ஸ் கேமரூன் தற்போது வெளியிட்டு ரசிகர்களை குஷிப்படுத்தியுள்ளார். இரண்டாம் பாகம் தண்ணீருக்குள் அமைந்த கதைக்களத்தைக் கொண்டது போல, மூன்றாம் பாகம் நெருப்பை மையப்படுத்தி உள்ளது‌. இதுகுறித்த கூடுதல் தகவல்களை இப்போது காண்போம்.

பண்டோரா கற்பனை உலகை மையமாகக் கொண்ட திரைப்படம் அவதார். இப்படத்தின் முதல் இரண்டு பாகங்கள் உலகளவில் அதிக வசூலை வாரிக் குவித்து சாதனைப் படைத்தது. கடந்த 2009 ஆம் ஆண்டு டிசம்பர் மாதம் திரைக்கு வந்த அவதார் திரைப்படம், ரசிகர்களுக்கு ஒரு புதுமையான அனுபவத்தைக் கொடுத்தது. அதிக கிராபிக்ஸ் காட்சிகளுடன் பண்டோரா கற்பனை உலகை, விழிகளுக்கு விருந்தாக்கிய இத்திரைப்படத்திற்கு 3 ஆஸ்கர் விருதுகள் கிடைத்தன. இதன்பிறகு, சுமார் 13 ஆண்டுகள் கழித்து கடந்த 2022 ஆம் ஆண்டு டிசம்பர் மாதம் 'அவதார்: தி வே ஆஃப் வாட்டர்' என்ற பெயரில் இரண்டாம் பாகம் வெளியானது.

அவதார் இரண்டாம் பாகம் இந்திய மொழிகள் உள்பட சுமார் 160-க்கும் மேற்பட்ட மொழிகளில் வெளியானது. தண்ணீரில் கற்பனைக் காட்சிகளை உண்டாக்கி நம்மை கண்ணிமைக்காமல் ரசிக்க வைத்தது இத்திரைப்படம். உலக சினிமா வரலாற்றில் அதிக வசூலைக் குவித்த படங்களில் இதுவும் ஒன்று. இத்திரைப்படம் சிறந்த விஷுவல் எஃபெக்ட்ஸ் பிரிவில் 2 ஆஸ்கர் விருதுகளை வென்றது.

இதன்பிறகு, அவதார் படத்தின் மூன்றாம் பாகம் எப்போது வெளியாகும் என்று ரசிகர்கள் ஆவலுடன் காத்திருந்தனர். இந்நிலையில், ரசிகர்களுக்கு ஓர் நற்செய்தியை வெளியிட்டு காத்திருப்பின் ஆவலை அதிகப்படுத்தி உள்ளார் இயக்குநர் ஜேம்ஸ் கேமரூன்.

சமீபத்திய நிகழ்ச்சி ஒன்றில் நடிகர்கள் சாம் வொர்திங்டன் மற்றும் ஜோ சல்டானா முன்னிலையில், ஜேம்ஸ் கேமரூன் அவதார் மூன்றாம் பாகத்தின் டைட்டிலை அறிவித்துள்ளார். இப்படத்திற்கு 'அவதார்: பயர் அண்ட் ஆஷ்' எனத் தலைப்பு வைக்கப்பட்டுள்ளது. இத்திரைப்படத்தில் ஸ்டீபன் லாங், சிகோர்னி வீவர், கேட் வின்ஸ்லெட், பிரிட்டன் டால்டன், கிளிப் கர்டிஸ், திலீப் ராவ் மற்றும் எடி பால்கோ ஆகியோரும் இடம் பெற்றுள்ளனர் என்பது குறிப்பிடத்தக்கது.

மூன்றாம் பாகத்தின் தலைப்பைப் பார்க்கும் போது, இத்திரைப்படத்தில் நெருப்பு தொடர்பான காட்சிகள் அதிகமாக இருக்கும் எனத் தெரிகிறது. மேலும், இத்திரைப்படத்தில் ரசிகர்கள் 'பார்த்திராத பல பண்டோராக்களைக் காண்பீர்கள் என்றும், மிகவும் உணர்ச்சிகரமாக உணர்வீர்கள்' என்றும் இயக்குநர் தெரிவித்துள்ளார். கடந்த இரண்டு பாகங்களை விடவும் மூன்றாம் பாகத்தின் கதைக்களம் வித்தியாசமாக இருக்கப் போகிறது என்பதில் ஐயமில்லை.

எது எப்படியோ அவதார் மூன்றாம் பாகம் தலைப்புக்கு ஏற்ப சும்மா ஜொலிக்கப் போவது மட்டும் உறுதி. எப்போது இத்திரைப்படம் திரைக்கு வரும் என்ற தகவல் இனி தான் வெளியாகும். அவதாரின் புதிய பரிமாணத்தைக் கண்டுகளிக்க அதுவரை நாமும் காத்திருப்போம்.