மலேசியாவில் நடைபெற்று வரும் 'பிச்சைக்காரன் 2' படப்பிடிப்பில் நடிகர் விஜய் ஆண்டனிக்கு காயம் ஏற்பட்டு கோலாலம்பூரில் உள்ள மருத்துவமனையில் அனுமதிக்கப்பட்டுள்ளதாக தகவல் வெளியாகியுள்ளது.

தமிழ் சினிமாவில் இசையமைப்பாளராக அறிமுகமாகி தற்பொழுது நடிகராக வலம் வருபவர் விஜய் ஆண்டனி. இவர் நடித்த நான், சலீம் ஆகிய படங்கள் சிறப்பாக ஓடியதால் வரிசையாக படங்களில் நடித்தார். கடந்த 2016-ம் ஆண்டு சசி இயக்கத்தில் விஜய் ஆண்டனி நடிப்பில் வெளியான படம் 'பிச்சைக்காரன்'. தமிழ், தெலுங்கில் வெளியாகி சூப்பர் ஹிட்டான இப்படத்தின் இரண்டாம் பாகம் குறித்து சில மாதங்களுக்கு முன் அறிவிப்பு வெளியானது. இந்தப் படத்தின் படப்பிடிப்பு மலேசியாவில் பல்வேறு பகுதிகளில் நடைபெற்று வருகிறது. தற்போது லங்காவி தீவில் படப்பிடிப்பு நடைபெற்று வருகிறது.

2016 ஆம் ஆண்டு அவர் நடிப்பில் வெளியான பிச்சைக்காரன் திரைப்படம் அவரை கமர்சியல் கதாநாயகனாக மாற்றியது. தமிழில் மட்டுமல்லாது தெலுங்கிலும் பிச்சைக்காரன் திரைப்படம் படம் பிரம்மாண்டமான வெற்றியை பெற்றது.

பிச்சைக்காரன் படத்தின் இரண்டாம் பாகத்தை அவரே இயக்கி நடித்து வருகிறார். இந்த படத்தின் ஷூட்டிங் மலேசியாவில் உள்ள லங்காவி தீவில் நடந்துள்ளது. அதில் கடல் பகுதியில் ‘வாட்டர் ஸ்கூட்டியில்’ அவரும் கதாநாயகியும் செல்வது போன்ற காட்சிகளை படமாக்கியுள்ளனர்.அப்போது அங்கு ஏற்பட்ட பெரும் விபத்தில் விஜய் ஆண்டனி சிக்கிக்கொண்டார் .

விஜய் ஆண்டனி ஓட்டிய ‘வாட்டர் ஸ்கூட்டிவாகனம்' கட்டுப்பாட்டை இழந்து மற்றொரு படகின் மீது மோதி, கடலில் கவிழ்ந்துள்ளதாக சொல்லப்படுகிறது.இதில் விஜய் ஆண்டனிக்கு முகத்தில் தீவிரமான காயங்கள் ஏற்பட்டதாகவும், அவர் கடலில் விழுந்ததால் கடல் தண்ணீரை குடித்ததால் மூச்சு விட முடியாமல் சிரமப்பட்டதாகவும் தகவல்கள் வெளியாகியுள்ளன.

தற்போது நடிகர் விஜய் ஆண்டனி அங்குள்ள மருத்துவமனையில் அளிக்கப்பட்ட சிகிச்சைக்குப் பிறகு நினைவு திரும்பியது என்றும் இப்போது விஜய் ஆண்டனி உடல்நிலை சீராக உள்ளதாகவும், விரைவில் அவர் இந்தியாவுக்கு வரவழைக்கப்பட்டு இங்குள்ள மருத்துவமனையில் சிகிச்சை அளிக்கப்படுவார் எனவும் தகவல் வெளியாகியுள்ளது.