பெருங்குடி குப்பைக் கிடங்கு; 2 நாட்களாகப் பரவும் பெரும் தீ!

சென்னை மாநகராட்சியின் பெருங்குடி குப்பைக் கிடங்கில் கொழுந்து விட்டு எரியும்  தீயை அணைக்க இன்று 2-ம் நாளாக தீயணைப்புத் துறையினர் கடுமையாக போராடி வருகின்றனர். சுற்றிலும்- கரும்புகை சூழ்ந்துள்ளதால் தீயைக் கட்டுப்படுத்துவதில் சிக்கல் ஏற்ப்பட்டுள்ளதாகத் தெரிவித்தனர்.

இதுகுறித்து  தீயணைப்புத்துறை அதிகாரி சையது முகமது தெரிவித்ததாவது;

சென்னை மாநகாராட்சியின் பெருங்குடி குப்பைக் கிடங்கில் நேற்று (ஏப்ரல் 27) மாலை 3 மணியளவில் திடீரென  தீ பற்றியது . கிடங்கின் நுழைவுவாயிலில் உள்ள இயற்கை உரம் தயாரிக்கும் இடம் அருகே  பற்றிய தீ , மளமளவென கிடங்கின் உட்புறம் வரை பரவியது. இதனால் கிடங்கில் மலை போல தேங்கிகிடந்த குப்பைகள் தீயினால் கருகி சாம்பல் மேடாக காட்சியளிக்கின்றன.

அதிலிருந்து தொடர்ந்து வெளியேறும் கரும்புகை  அப்பகுதி முழுவதும் சூழ்ந்து புகைமூட்டமாக காட்சியளிக்கின்றன. இன்று 2-வது நாளாக அத்தீயினை அணைக்க தீயணைப்பு வீரர்களும் , மாநகராட்சி பணியாளர்களும் தீவிரமாக ஈடுபட்டு வருகின்றனர். தீயணைக்கும் பணியில் 8 தீயணைப்பு வாகனங்கள்  ஈடுபட்டுள்ளன. ஆனால்  கரும்புகை சூழ்ந்துள்ளதாஉம், காற்றின் வேகமும் புகைமூட்டமும்  அதிகமாக இருப்பதால் தீயினை கட்டுப்படுத்துவதில் சவால் ஏற்பட்டுள்ளது.

-இவ்வாறு அவர் தெரிவித்தார்.

இந்நிலையில் தீ விபத்து ஏற்பட்ட கிடங்கில் மாநகராட்சி துணை மேயர் மகேஷ்குமார், சோழிங்கநல்லூர் எம்எல்ஏ அரவிந்த்ரமேஷ் ஆகியோர் நேரில் சென்று ஆய்வு செய்தனர். அப்போது பேசிய துணைமேயர் மேயர் மகேஷ்குமார் தெரிவித்ததாவது:

பெருங்குடி  கிடங்கில் ஏற்பட்ட தீ மேற்கொண்டு பரவாதவாறு கட்டுப்படுத்தப்பட்டுள்ளது. மேலும் இப்பகுதிக்கு அருகில் உள்ள சதுப்புநிலத்திற்கு தீ பரவாமல் தீயணைப்பு வீரரகள் திற்மையாக தடுத்துவிட்டனர். இன்னும் சில மணி நேரங்களில் தீ முழுமையாக அணிக்கப்பட்டு, கட்டுக்குள் கொண்டு வரப்படும்.

-இவ்வாறு அவர் தெரிவித்தார்.

சென்னை மாநகராட்சியில் நாளொன்றுக்கு சுமார் 5000 டன் கழிவுகள் சேகரிக்கப்பட்டு, அதில் சுமார் 2400 டன் குப்பைகள் பெருங்குடி கிடங்கிற்கு கொண்டு வரப்படுகிறது என்பது குறிப்பிடத்தக்கது.