வங்காள விரிகுடாவின் புயல் இந்தியாவை தாக்குவதன் ரகசியம்!

மழைக்காலம் தொடங்கிவிட்டாலே வெள்ளத்துக்கும் புயல்களுக்கும் பஞ்சமிருக்காது. இதுவரை பல்வேறு பெயர்களில் நிறைய புயல்கள் இந்திய நிலப்பரப்பைத் தாக்கி இருக்கின்றன. அவற்றில் சில புயல்கள் திசை மாறி அண்டை நாடுகளையும் தாக்கி இருக்கின்றன. குறிப்பாக, வங்காள விரிகுடா கடலில் உருவாகும் புயல்கள் இந்திய நிலப்பரப்பையே அதிகம் தாக்குகின்றன. இக்கடலில் உருவாகும் புயல்கள் இந்தியாவைத் தாக்குவதற்கான காரணங்கள் குறித்து இப்பதிவில் காண்போம்.

இந்தியா மூன்று பக்கம் கடலாலும், ஒரு பக்கம் நிலத்தாலும் சூழப்பட்டுள்ள தீபகற்ப பகுதி. மூன்று பக்கம் கடல் சூழப்பட்டு இருப்பதால் புயலின் தாக்கத்தால் அதிகம் பாதிக்கப்படும் நாடுகளில் ஒன்றாக இந்தியாவும் உள்ளது. அதிலும் குறிப்பாக, இந்தியாவின் தமிழ்நாடு, ஆந்திரா, ஒடிசா, கேரளா போன்ற மாநிலங்கள் புயலால் அதிகம் பாதிக்கப்படும் பகுதியாக உள்ளது.

இந்தியாவை சூழ்ந்துள்ள இந்திய பெருங்கடல், அரபிக் கடல்களை காட்டிலும் வங்காள விரிகுடாவில் ஏற்படும் புயல்களின் எண்ணிக்கை அதிகமாக இருக்கிறது.

வங்காள விரிகுடாவில் புயல் அதிகம் ஏற்படக் காரணம், அது அரபிக் கடலை காட்டிலும் குறைவான ஆழம் கொண்டது. இதனால் மிக விரைவாக வங்காள விரிகுடா கடலின் மேல்புறம் வேகமாக வெப்பமடைகிறது. இதன் காரணமாக நீர் ஆவியாகி பெரிய மேகக் கூட்டங்களாகத் திரண்டு விடுகின்றன.

மூன்று பக்கங்கள் நிலத்தால் சூழப்பட்டுள்ளதால் வங்காள விரிகுடவால் வெப்பத்தை அதிகம் வெளியிட வாய்ப்பு இல்லை. வடகிழக்கு பருவ காலங்களில் காற்று அதிகம் தமிழ்நாடு, ஆந்திரா, ஒடிசா போன்ற பகுதிகளை நோக்கி வீசுவதால் வங்காள விரிகுடாவில் உருவாகும் புயல்கள் நிலத்தை நோக்கி தள்ளப்படுகின்றன.

மேலும், நிலப்பரப்பில் அதிக அளவிலான வெப்பம் காணப்படுவதால் அவை புயலை விரைவாக இழுத்துக் கொண்டு மேகங்களைக் கரைகின்றன. இதனால் இந்தியாவில் அதிக அளவிலான மழைப்பொழிவு ஏற்படுகிறது. இவ்வாறு வங்காள விரிகுடாவில் உருவாகும் பெரும்பாலான புயல்கள் இந்தியப் பகுதிகளை நோக்கி நகர்கின்றன.

வங்காள விரிகுடாவில் உருவான புயல்கள் பெரும்பாலும் இந்திய நிலப்பரப்பையே அதிகம் தாக்கி உள்ளன. அதேசமயம் அரபிக் கடலில் உருவாகும் புயல்கள் மத்திய கிழக்குப் பகுதியை நோக்கிச் சென்று விடுவதால் இந்திய நிலப்பரப்பு ஓரளவு பாதுகாப்பானதாக இருக்கிறது.

க.இப்ராகிம்