வீட்டில் தெய்வ சக்தியை அதிகரித்து வளம் கூட்டும் அற்புதப் பரிகாரம்!

‘முயற்சி செய்தும் வாழ்வில் முன்னேற்றமில்லை, திறமைகள் இருந்தும் வாய்ப்புகள் இல்லை, இவை இரண்டும் கிடைத்தால் கூட நாம் விரும்பிய இடத்தை நம்மால் அடைய முடியவில்லை,‌ எதற்காக இந்தக் கஷ்டங்கள்? நமக்கு தெய்வத்தின் ஆசீர்வாதம் இருக்கிறதா, இல்லையா? நம் வீட்டில் கெட்ட சக்தி குடி கொண்டுள்ளதா? எதனால் தொடர் பிரச்னைகள், பாதிப்புகள் இருந்துகொண்டே வருகிறது? சந்தர்ப்பம் கிடைத்தும் சாதிக்க  முடியாத சூழல் ஏன் வருகிறது? இறைவன்மீது அதிக பக்தி இருப்பதால் நம்மை சோதித்துப் பார்க்கிறாரா? அல்லது நம் தலைவிதியே இதுதானா?’ இப்படி எத்தனை பேர்கள், எப்படியெல்லாமோ புலம்பிக் கொண்டுதான் இருக்கிறோம்.

வீட்டில் தெய்வம் குடியிருந்தால் நம் பிரச்னைகளில் பாதி தீர்ந்துவிடும். வீட்டில் இருக்கக்கூடிய வாய்ப்பு, நேர்மறை ஆற்றலைத் தூண்டுவதற்கும், நம் வீட்டில் இருக்க எல்லா பிரச்னைகளுக்கும் தீர்வு தரும் விஷயங்கள் பற்றி இப்பதிவில் தெரிந்து கொள்வோம்.

அந்தக் காலத்திலேயே நமது முன்னோர்கள் சொல்லி வைத்திருக்கும் அபூர்வமான விஷயங்களில் இதுவும் ஒன்று. அதாவது, இது ஒரு காய் வகையைச் சேர்ந்தது. இதை வலம்புரிக் காய், இடம்புரிக் காய் என்று சொல்வார்கள். இடதுபக்கம் சுருள் கொண்ட காயை இடம்புரிக் காய் எனவும், வலப்புறம் சுருள் கொண்ட காயை வலம்புரிக் காய் என்றும் சொல்வார்கள். பொதுவாக, ‘ஓம்’ என்ற ஒலிக்கு அதீத சக்தி உண்டு என்பது நாம் எல்லோரும் அறிந்த ஒன்றுதான். இந்த ‘ஓம்’ என்ற பிரணவ மந்திரத்தின் சக்தியை உள்வாங்கக்கூடிய ஆற்றல் இந்த இரண்டு காய்களுக்கும் உண்டு.

இந்த இரண்டு காய்களையும் வாங்கி மஞ்சள் தண்ணீரில் கழுவி காய வைத்து மஞ்சள் குங்குமம் இட வேண்டும். இதை நிழலிலேயே உலர்த்த வேண்டும். அடுத்ததாக, குடும்பத் தலைவனோ, தலைவியோ இந்தக் காய்களை உள்ளங்கையில் வைத்து இரு கைகளையும் சாமி கும்பிடுவது போல் வைத்துக் கொண்டு உங்கள் குலதெய்வம் மற்றும் சிவபெருமானை நினைத்து ‘ஓம்’ என்ற மந்திரத்தை உச்சரிக்க வேண்டும். இந்த மந்திரத்தை பத்து நிமிடம் கூட உச்சரிக்கலாம்.‌

நீங்கள் எவ்வளவு முறை ‘ஓம்’ என்ற மந்திரத்தை உச்சரித்து அந்தக் காய்க்கு சித்தி  ஏற்றுகிறீர்களோ அந்த அளவு உங்கள் வீட்டில் தெய்வ சக்தி குடிகொள்ளும். நீங்கள் ஒலிக்கும் மந்திரத்தை அந்த இரண்டு காய்கள் உள்வாங்கிக் கொண்டு வீட்டில் மந்திரத்தை ஒலிக்கச் செய்து கொண்டேயிருக்கும்.

வீட்டில் உள்ள துர்சக்தி வெளியேறும்.‌ அதன் பின் கையில் இருக்கும் காயை ஒரு சுத்தமான டப்பாவில் போட்டுக்கொள்ளவும். பிளாஸ்டிக் வேண்டாம்.‌ இந்தக் காய்கள் உள்ள டப்பா வாசனை உள்ளதாக இருக்க அதில் பச்சை கற்பூரம் போட்டு வையுங்கள். இதை பீரோவிலோ அல்லது பூஜை அறையிலோ வைக்கலாம். நீங்கள் பூஜையின்போது தூபத்தை அந்தக் காய்க்கும் காட்ட வேண்டும். டப்பாவை மூடாமல் ஒரு துணியால் மூடவும்.

முடிந்தவர்கள் தினமும் இந்தக் காய்களை வைத்துக் கொண்டு மந்திரம் உச்சரிக்கலாம். ‘ஓம் என்ற மந்திரத்தை இதில் உருவேற்றி வைக்க தெய்வ சக்தி கூடும். இந்தக் காயை வருடத்திற்கு ஒரு முறை மாற்றலாம். இதன் மூலம் வீட்டில் தெய்வ சக்தியை அதிகரிக்கச் செய்து அனுகூலம் பெறலாம்.