ஆன்மிக ஐயங்களும் அவசியம் அறிந்துகொள்ள வேண்டிய விடைகளும்!

தினசரி வாழ்வில் ஏற்படும் சில ஆன்மிக சந்தேகங்களுக்கான விடைகளை அறிந்து வைத்திருப்பது அவசியம்தான். அதுபோன்ற சில சந்தேகங்களும் அவற்றுக்கான விடைகள் குறித்தும் இந்தப் பதிவில் காண்போம்.

* கடலிலிருந்து கிடைப்பதால் ‘மகாலட்சுமி வம்சம்’ என்று போற்றப்படும் உப்பிற்கு வேறு பெயர்கள் உண்டா?

சமுத்திர ஸ்வர்ணம், வருண புஷ்பம், சமுத்திர மணி, நீர் படிகம், ஜல மாணிக்கம், சமுத்திரக்கனி, பேரளம், கோவளம், கடல் தங்கம், பூமி கற்பம் போன்று பல பெயர்களால் உப்பு போற்றப்படுகிறது.

* சில நட்சத்திரங்களுக்கு பொருத்தம் பார்க்காமல் திருமணம் செய்யலாம் என்பது உண்மையா?

இது முற்றிலும் தவறு. ஒருவருடைய முழுமையான ஜாதகத்தை நட்சத்திரம் மட்டுமே தீர்மானிப்பதில்லை. லக்னம், ராசி மற்றும் கிரகங்கள் எல்லாம் சேர்ந்துதான் தீர்மானிக்கின்றன. எனவே, பொருத்தம் பார்த்துதான் திருமணம் செய்ய வேண்டும்.

* கல்வியும், பன்மொழி ஆற்றலும் கிடைக்க வணங்க வேண்டிய தெய்வம்?

கல்விக் கடவுளாக சரஸ்வதி தேவியையும், ஹயக்ரீவரையும், தட்சிணாமூர்த்தியையும் வணங்க, கல்வியில் மேன்மையும், பன்மொழிப் புலமையும் பெறலாம்.

* சிதம்பரத்தை ‘தில்லை அம்பலம்’ என்று அழைக்கக் காரணம்?

ஒரு காலத்தில் தில்லை மரங்கள் நிறைந்திருந்த இடமாக இருந்த காரணத்தாலும், தில்லை வனத்தில் அமைந்த கோயில் என்பதாலும் தில்லை அம்பலமாயிற்று. ‘அம்பலம்’ என்றால் கோயில் என்று பொருள்.

* சிதம்பர ரகசியம் என்பது?

பஞ்சபூதங்களான நிலம், நீர், நெருப்பு, காற்று, ஆகாயம் என்பதில் சிதம்பரம் ஆகாய தலமாகக் குறிப்பிடப்படுகிறது. இங்குள்ள பொற்சபையில் அண்ணாந்து பார்க்க வெட்டவெளி தெரியும். எல்லையற்ற பரந்த ஆகாயத்தைப் போல் கடவுளும் எல்லையற்றவர். யாராலும் அறிய முடியாத ரகசியமாக உள்ளவர். இதைத்தான் 'சிதம்பர ரகசியம்' என்பார்கள்.

* சப்த ரிஷிகள் எனப்படுபவர்?

அத்ரி, பிருகு, புலஸ்தியர், வசிஷ்டர், ஆங்கிரசர், கௌதமர், மரீசி ஆகியோரே சப்த ரிஷிகளாவர்.

* முதன் முதலில் பிரதோஷ வழிபாடு நடைபெற்ற இடம் எது?

ஆந்திர மாநிலம், சித்தூர் மாவட்டம் நாகலாபுரம் அருகில் அமைந்துள்ள சுருட்டப்பள்ளி எனும் இடத்தில்தான் முதன் முதலில் பிரதோஷ வழிபாடு நடைபெற்றது. ஆலகால விஷம் அருந்திய சிவபெருமான், பார்வதியின் மடியில் தலை வைத்து படுத்ததால் இத்தலத்திற்கு சுருட்டப்பள்ளி என்று பெயர் வந்தது. இங்கு விநாயகர், முருகன், பெருமாள், சிவன், குரு பகவான் என அனைத்து தெய்வங்களும் தங்கள் மனைவியருடன் காட்சி தருகின்றனர்.

* எமதர்மராஜனுக்கு கோயில் எங்கு உள்ளது?

மயிலாடுதுறை மாவட்டம் தருமபுரம், திருக்கடையூர், திருவாரூர் மாவட்டம் ஸ்ரீவாஞ்சியம் கோயில்களில் எமனுக்கு என்று தனிச் சன்னிதி உள்ளது. இவரை சனிக்கிழமைகளில் வழிபட ஆயுள் பெருகும் என்பது நம்பிக்கை.

* அடிக்கடி கெட்ட கனவுகள் வந்து தூக்கம் தடைப்பட்டால் என்ன செய்வது?

சிலருக்கு தீய கனவுகளால் தூக்கம் தடைப்படும்; நிம்மதி கெடும். இதற்கு தினமும் கருடனை வழிபடுவதும், கருட மந்திரம் ஜபிப்பதும் நல்லது.

* ஆத்ம பிரதட்சணம் என்றால்?

தன்னைத்தானே சுற்றிக்கொண்டு வழிபடுவதற்கு ஆத்ம பிரதட்சணம் என்று பெயர். ஒவ்வொரு மனிதனுக்குள்ளும் இறை சக்தி உண்டு. நமக்குள் இருக்கும் இறை சக்தியான பரமாத்மாவை எண்ணி வழிபடுவதைத்தான் ஆத்ம பிரதட்சணம் என்று அழைக்கிறோம்.