spot_img
0,00 INR

No products in the cart.

திருநீறு பட்டையும்; உத்திராட்சக் கொட்டையும்!

மதுரை ஆர்.கணேசன்

சுரேஷ் அன்புமாரி தம்பதியின் ஒரே மகள் எஸ்.எஸ்.யாழினி. ஸ்ரீசாரதா வித்யாவனம் மெட்ரிக் பள்ளியில் ஏழாம் வகுப்பு படித்து வருகிறார். சிவ புராணக் கதைகள் மற்றும் தேவாரம், திருவாசகம் பாடல்கள் பாடியும், சொற்பொழிவு ஆற்றிக்கொண்டும் வரும் யாழினி, ‘திருநாவுக்கரசர் இசை ஆராய்ச்சி கல்வி அறக்கட்டளை’ அமைப்பு சார்பில் நடந்த திருவாசகம், தேவாரம் ஒப்புவித்தல் போட்டியில் கலந்துகொண்டு சிறப்பு முதல் பரிசு பெற்று இருக்கிறார்.

எஸ்.எஸ்.யாழினி

தாம்பிராஸ் அறக்கட்டளை’ சார்பில் திருப்பாவை, திருவெம்பாவை ஒப்புவித்தல் போட்டியில் முதல் பரிசு, ‘தமிழ் இசை சங்கம்’ நடத்திய போட்டியில் முதல் பரிசு என பட்டியல் நீள்கிறது.

பள்ளிச் சீருடையுடன் கனிந்த முகம், நடு உச்சி எடுத்து தலைவாரிய வகுடு, நெற்றியிலும், இரண்டு கைகளிலும் திருநீறு பட்டை, கழுத்தில் உத்திராட்ச கொட்டையுடன் இந்த வயதிலேயே பழுத்த பழமாகப் பீடு நடை போடுகிறார் யாழினி.

மதுரை, பொன்மேனி பகுதியில் யாழினி குடியிருக்கும் அக்கம் பக்கத்திலும் மற்றும் பள்ளிக்குச் செல்லும் வழியிலும், ‘பட்டை யாழினி வந்து விட்டாள்’ என்கிற வரவேற்பு எகிறுகிறது!

சிவபெருமான் மீது நாட்டம் வந்ததற்குக் காரணம், திருவாசகத்தில் 43ஆம் திருவார்த்தை என்ற தலைப்பில் ஆறாம் பாடல், ‘…வேவத் திரிபுரம் செற்றவில்லி வேடுவ…’ என்று சொல்லிவிட்டு ராகத்துடன் பாடி காட்டுகிறார். நாமும் அதைக் கேட்போமா?

திருநீறு, பட்டை இல்லாமல் ஸ்கூலுக்குப் போக மாட்டேன்” எனக்கூறும் யாழினியிடம் பேசியபோது

என்னுடைய பெற்றோர் தினமும் அதிகாலையில் வீட்டு பூஜை அறையில் திருமுறை பாடல்கள் பாடுவது வழக்கம். அதை நான் தூக்கத்தில் கேட்டு கேட்டு, எனது ஆன்மிக சிந்தனை தூண்டப்பட்டது.

அப்பா, அம்மாவுடன் சேர்ந்து நானும் பாட ஆரம்பித்தேன். தேவாரம், திருவாசகம் பாடல்களின் அர்த்தத்தை மிகத் தெளிவாகப் புரிந்துகொண்டதால் அனைத்தையும் பாராயணம் செய்தேன்.

நானும் காலையில் ஆறு மணிக்கு எழுந்து குளித்து விட்டு, உடம்பில் பதினாறு இடங்களில் திருநீறு பூசிக்கொண்டு அனுஷ்டானம் பண்ணி, சிவலிங்கத்திற்கு அபிஷேகம் பண்ணுவேன். தினமும் பஞ்சபுராணம், சிவபுராணம் மற்றும் திருவாசகத்திலிருந்து ஒரு பதிகம் பாடுவதை வழக்கமாகக் கொண்டுள்ளேன்.

திருமுறை பாடல்களை நான்கு வயதிலிருந்து விரும்பிப் படிக்கத் தொடங்கினேன். அதேபோல, தேவாரம், திருவாசகம் தெரிந்திருப்பதால் திருவாவடுதுறை ஆதினத்தில் ஏழு வயதிலேயே, ‘தீட்சை’ பெற்றிருக்கிறேன்.

திருஞானசம்பந்தர், திருநாவுக்கரசர், சுந்தரமூர்த்தி நாயனார் ஆகியோர் தேவாரத்தை அருளினார்கள். மாணிக்கவாசகர் சொல்லச் சொல்ல, சிவபெருமான் கரம் வருந்தி எழுதி அருளியது திருவாசகம்.

திருமுறைகள் நம் வாழ்க்கையை செம்மைப்படுத்துகின்றன. புகழ் பெறவும், நோய்கள் தீரவும் கடன் தீரவும், செல்வச் செழிப்பு கூடவும், வீடு வாங்கவும் பதிகங்களில் பாடல்கள் கூறப்பட்டுள்ளன. அவற்றை தினமும் படித்து வந்தாலே, நினைத்தது எல்லாம் நடக்கும்.

படிப்பிலும் கவனம் செலுத்தி நன்றாகப் படிக்கின்றேன். பரதமும் பயின்று வருகிறேன்.

எனக்கு உத்திராட்சக் கொட்டையும் திருநீறு பட்டையுமே அடையாளம். தேவாரம், திருவாசகத்தை குழந்தைகளுக்குக் கொண்டு சேர்க்கணும் என்ற லட்சியமும் உண்டு. தற்போது ஐந்து குழந்தைகளுக்கு இலவசமாகப் பாடல்கள் கற்றுக் கொடுக்கிறேன்.”

யாழினியின் பெற்றோர் சுரேஷ் அன்புமாரியிடம் பேசியபோது

எங்க குடும்பம் சைவ சமயத்தைச் சார்ந்தது. எனக்குத் திருமணமாகி யாழினி பிறந்த பிறகு எங்களுக்குத் திருமுறை மற்றும் திருவாசகத்தின் மீது மிகுந்த பற்று ஏற்பட்டது.

அதை எப்படிப் படிப்பது? வழிமுறைகள் என்ன? என்று தேடி அலைந்து, பல சிவனடியார்கள் உதவியின்பேரிலும் திருவாசகத்தை ராகத்துடன் பாடக் கற்றுக்கொண்டோம்.

திருவாசகத்தை கற்றதுடன், எம்பெருமான் மீது பிடிப்பு அதிகமாயிற்று. ஈசனைத் தவிர வேறு எதையும் நினைக்கத் தோன்றவில்லை. அதேபோல, தீட்சை பெற வழியைத் தேடினோம்.

இப்படி ஒவ்வொன்றாய் தேடித் தேடி எம்பெருமான் திருவருள் பெற்றோம். அப்படியே ஒவ்வொரு நிலையிலிலும் எங்க குழந்தை யாழினியையும் வளர்த்து வந்தோம். அவளும் ஆர்வமுடன் கேட்டுக் கொண்டு அனைத்தையும் கற்றுக் கொண்டாள்.

இளைய தலைமுறையினரிடம் திருமுறையை அறிமுகப்படுத்துவதே எங்களின் நோக்கம். நம்முடைய இந்து மத பண்பாடு, கலாசாரம் புதுப்பொலிவு பெற்று எங்கும் நிறைந்திருக்க வேண்டும்.”

1 COMMENT

Other Articles

Stay Connected

263,924FansLike
1,887FollowersFollow
3,050SubscribersSubscribe

To Advertise Contact :

Other Articles

திருக்குறளில் உலக சாதனை!

- சுசீலா மாணிக்கம் முப்பால், உலகப்பொதுமறை (உலகப்பொது வேதம்), உத்தரவேதம் (இறுதி வேதம் ), தெய்வநூல், பொய்யாமொழி, தமிழ்மறை என திருக்குறளுக்கு இன்னும் பல சிறப்புப் பெயர்களை அடுக்கிக்கொண்டே போகலாம். ஒரு தனி மனிதன் மேற்கொள்ளவேண்டிய...

சிறுதானிய மாவும்; பலகாரங்களும்!

- ஸ்ரீரங்கம் திருநாவுக்கரசு. ‘‘கொரோனா ஊரடங்கு தொடங்கிய நாட்களில் என் மனதுக்குள் ஒரு மின்னல். நம்முடைய பாரம்பரிய அரிசி வகைகளிலும் சிறுதானியங்களிலும் பல்வேறுவிதமான மாவு வகைகளைத் தயாரிக்கலாமே... அவற்றில் பல்வேறு வகையான பலகாரங்களையும் செய்து...

தன்னம்பிக்கையே வாழ்வின் வெற்றி!

  நேர்காணல்: ஜெனிபர் கொரோனா தாக்கத்தால், சாவின் விளிம்பைத் தொட்டுப் பார்த்து மீண்டு(ம்) வந்தவர், இன்று திருமதி உலக அழகிப் போட்டிக்குத் தேர்வாகியுள்ளார். மனநல நிபுணர், தொழில் முனைவோர், எழுத்தாளர், மொழி பயிற்றுனர் என பல்துறை...

மனித நேயம் மலரட்டும்!

நேர்காணல் : ஸ்ரீரங்கம் திருநாவுக்கரசு “அரசு வேலைக்குப் போகணும். அதுவே, பொதுமக்களுக்கு நேரடியாக சேவை செய்கிற வேலையாக இருக்கணும். அது, சவால் மிகுந்ததாகவும் இருக்கணும்... இப்படியெல்லாம் தீர்மானித்து தேர்வு செய்த வேலைதான் இது. மனமார...

கடவுளின் குழந்தைகள்; தாளமிடும் விரல்கள்!

- ஸ்ரீரங்கம் திருநாவுக்கரசு மனநலம் குன்றிய சிறுவர்களின் இல்லம் தேடிச் சென்று, மிருதங்கம் வாசிப்பதில் அவர்களுக்குச் சிறப்புப் பயிற்சி அளித்து வரும் மிருதங்கக் கலைஞர் ரமேஷ் பாபு, மதுரை கோயில் பாப்பாக்குடி சிக்கந்தர் சாவடி...