0,00 INR

No products in the cart.

எப்படிப் பிறந்தாள் புதுமைப்பெண்?

அத்தியாயம் – 7
– நிரஞ்சன் பாரதி

பராசக்தியின் அம்சங்கள்!

பாரதியாருக்கு ஒரு தனித்துவமான குணமிருந்தது. தான் எழுதிய பாடல்களின் பரிசோதனைக் கூடமாக அவர் தன்னையே அவ்வப்போது மாற்றிக்கொள்வார். ஒரு மகாகவிஞனுக்கு இருக்கும் விநோதமான இலக்கணங்களில் இதுவும் ஒன்றோ என்னவோ? அவர் பரிசோதனை செய்வதைப் பார்க்கின்ற பாக்கியம் ஒரு நாள் எட்டயபுரத்துக்கு வாய்த்தது.

எட்டயபுரம் அரண்மனைக்கு அருகே ராஜா தோட்டம் என்ற ஓர் இடமுண்டு. பற்பல பழ மரங்கள் நிறைந்த மனோரம்மியமான ஒரு சோலை அது. ஒரு நாள் பாரதியார், அங்கே தன் மனைவி செல்லம்மாவோடு உலா போகலாம் என்று முடிவெடுத்தார். இதைக் கேட்டவுடன் செல்லம்மா பதறிப்போய், ‘கணவருடன் ஒரு பெண் உலா சென்றால் ஊராரின் தூற்றுதலுக்கு ஆளாக நேரிடுமே’ என்று அஞ்சினார். இதைக் கேட்டவுடன், ‘நம்முடைய மனிதர் தூஷிப்பதும் நமக்கு ஆனந்தமல்லவா, புறப்படு’ என்றார் பாரதியார்.
இந்த நிகழ்ச்சியை மிக விரிவாக, ‘பாரதியார் சரித்திரம்’ என்ற தனது நூலில் செல்லம்மா பாரதி எழுதியிருக்கிறார்.

– நிரஞ்சன் பாரதி

பாரதியார் உறுதியாகச் சொன்னதால் மறுபேச்சின்றி வெளியே செல்லப் புறப்பட்டார் செல்லம்மா. இருவரும் கைகோத்துக் கொண்டு தெருவில் நடந்து சென்றார்கள். அப்போது சிலர், ‘ஓகோ, பைத்தியங்கள் எங்கேயோ உலாவப் போகிறதுகள் பார்’ என்று நகைத்தார்கள். ஆனால், பாரதியாரோ கொஞ்சமும் அசராமல் செல்லம்மாவின் கையை இன்னும் இறுகப் பற்றிக்கொண்டு,
‘நிமிர்ந்த நன்னடை நேர்கொண்ட பார்வையும்
நிலத்தில் யார்க்கும் அஞ்சாத நெறிகளும்,
திமிர்ந்த ஞானச் செருக்கும் இருப்பதால்
செம்மை மாதர் திறம்புவ தில்லையாம்
அமிழ்ந்து பேரிரு ளாமறி யாமையில்
அவல மெய்திக் கலையின்றி வாழ்வதை
உமிழ்ந்து தள்ளுதல் பெண்ணற மாகுமாம்
உதய கன்னி உரைப்பது கேட்டிரோ!’
என்று சத்தமிட்டுப் பாடியபடியே தொடர்ந்து பீடு நடை போட்டார்.

கணவர் என்ன சொன்னாலும் எதிர்ப்பில்லாமல் அப்படியே ஏற்கும் செல்லம்மாவின் போக்கைச் சக பெண்களே கண்டித்தது காலத்தின் ஆகப்பெரிய முரண்களில் ஒன்று. ‘இப்படி ஒரு புருஷனோடு வாழ்வதைக் காட்டிலும், நாங்களாயிருந்தால் ஒரு செம்பைத் தேய்த்துக்கொண்டு, நாலு வீடு சென்று பிச்சை எடுத்து வயிறு வளர்ப்போம்’ என்பார்களாம் அவர்கள்.

தன் மனைவியைப் புதுமைப்பெண்ணாகப் பார்க்க ஆசைப்பட்டு பாரதியார் நிகழ்த்திய பரிசோதனைக்கு எப்பேர்ப்பட்ட எதிர்வினைகள்! அவர் மட்டும் அந்த ஏச்சுமொழிக்கு அகம் உடைந்திருந்தால் இன்று பெண்கள் தலை நிமிர்ந்து நடக்க முடியுமா? தங்களைப் பற்றி நினைக்காமல் சமூகத்தில் உள்ள பெண்களின் நிலை முன்னேற வேண்டும் என்று பாரதியும் செல்லம்மாவும் சிந்தித்தது அவர்கள் ஆற்றிய விலை மதிப்பற்ற பெருந்தொண்டு.

வீட்டுக்குள்ளே பெண்களைப் பூட்டி அடக்கி வைப்பதும் அதேசமயம் நாகரிகம் என்று சொல்லிக்கொண்டு பெண்கள் வரம்பு மீறி நடந்துகொள்வதும் பாரதியாருக்கு அறவே பிடிக்காது. ஆடவர்களைக் கண்டு பெண்கள் அஞ்சித் தலை குனிவதும் ஒவ்வாது.

‘பெண்கள் மனத்தில் களங்கமின்றி ஆண் மக்களோடு பழக வேண்டும். அங்ஙனமே ஆடவர்களும் ஸ்தீரிகளின் மத்தியில் உள்ளத்தில் மாசின்றி உறவாட வேண்டும். இப்படி ஜாக்கிரதையுடன் சிறிது காலம் நடந்தால் தனியே ஒவ்வொருவர் மனமும் பரிசுத்தமாகி விடும்’ என்பது பாரதியாரின் நிலைப்பாடு.

ன்னதான் புதுமைப்பெண்ணைக் கிட்டத்தட்ட செதுக்கி உருவாக்கிவிட்டாலும் பாரதியாரின் மனதில் ஒரு குறை இருந்தது. இன்னும் இது முழுமையடையாதிருக்கிறதே என்று உள்ளுணர்வு நெருடியது. இறுதியில் பளிச்சென்று அவர் மனதில் ஒரு சிந்தனை மின்னல் வெட்டியது.

இந்த உலகத்தை இயக்கி, உயிர்களை வாழவைத்துக் கொண்டிருப்பவள் ஜகன்மாதாவாகிய பராசக்தி அல்லவா! ஏன் அப்படிச் செய்கிறாள்?

இதற்குச் சைவ சித்தாந்தத்தின் அடிப்படையைக் கொஞ்சம் தெரிந்துகொள்ள வேண்டும். சிவனும் சக்தியும் ஒன்றா? வேறு வேறா? இறைவனும் இறைவனது அருளும் ஒன்றா? வேறு வேறா?

கடவுளையும் அவனது கருணையையும் எப்படிப் பிரிக்க முடியாதோ, அதேபோல் சிவம், சக்தி ஆகிய இரண்டையும் பிரிக்க முடியாது. இயக்கமற்ற நிலையில் இருக்கும் இறையின் பெயர் சிவம். அதே இறைநிலை இயங்கத் தொடங்கினால் அதற்குப் பெயர் சக்தி. சிவனே என்று இருந்தேன் என்ற பழமொழியின் உண்மையான பொருள் இதுவே.

இறைநிலை அருள்கொண்டு இயங்கும்போதுதான் பிரபஞ்சம் உண்டாகி, உலகம் உண்டாகி பிறகு உயிர்களெல்லாம் உருவாகின்றன. நம் நாட்டு மரபின்படி பெண்கள், கருணையின் வடிவங்கள். அதனால்தான் சக்தி என்னும் தெய்வ நிலையை நாம் பெண் தெய்வமாக வழிபட்டோம். பராசக்தியான அவளே இந்த உலகத்து உயிர்கட்கெல்லாம் தாய். பாரதியாருக்கும் அவள்தான் தாய்.

அவள், இந்த உலகெனும் மாயையை எதற்காக உண்டாக்கினாள்? இன்பங்களையும், துன்பங்களையும் ஏன் மாறி மாறிக் கொடுக்கிறாள்? மெய் போலத் தோற்றமளிக்கும் இந்தப் பொய்யுலக வாழ்வைக் கடந்து மனித உயிர் இறைவனோடு கலக்க வேண்டும் என்பதற்காகத்தான்.

இந்த விழுமியத்தை மஹாகாளியின் புகழ் என்ற தலைப்பில், ஓர் அற்புதமான காவடிச் சிந்துப் பாடலைப் பாரதியார் எழுதியிருக்கிறார்.
‘காலமாம் வனத்திலண்டக் கோலமா மரத்தின் மீது
காளிசக்தி யென்றபெயர் கொண்டு – ரீங்
காரமிட் டுலவுமொரு வண்டு
அன்புவடி வாகிநிற்பள் துன்பெலா மவளிழைப்பள்
ஆக்கநீக்கம் யாவுமவள் செய்கை – இதை
ஆர்ந்துணர்ந்த வர்களுக்குண் டுய்கை….
இப்பேர்ப்பட்ட பராசக்தியை விடுத்து, நாம் எதையும் சிந்தித்ததில்லையே! அவ்வாறெனில் புதுமைப்பெண்ணை எப்படி நாம் பராசக்தியோடு இணைந்து சிந்திக்கத் தவறினோம்! அடடா! காணும் பெண்கள் யாவரும் அந்தப் பராசக்தியின் அம்சங்களே!

புதுமைப்பெண்ணும் அந்த உலகநாயகியின் இன்னோர் உருவே! ஆம்! இப்போதுதான் என், ‘புதுமைப்பெண்’ முழுமை அடைகிறாள். தெய்வாம்சம் துளியும் இல்லாமல் நாம் எந்தவொரு விழுமியத்தையும் முன்னிறுத்துவதில்லையே! தன் மனதில் எழுந்த இந்த எண்ணத்துண்டுகளையெல்லாம் ஒன்றாகக் கோத்து ஓர் அற்புதமான சித்திரமாக்கினார் பாரதியார். பூமிக்கு அவர் அளித்த கொடையாகக் குன்றென நிமிர்ந்து நின்றாள் புதுமைப்பெண்.
‘ஆணும் பெண்ணும் நிகரெனக் கொள்வதால்
அறிவி லோங்கி இவ் வையம் தழைக்குமாம்
பூணு நல்லறத் தோடிங்குப் பெண்ணுருப்
போந்து நிற்பது தாய்சிவ சக்தியாம்’
தன் மனைவியைப் புதுமைப்பெண்ணாக மட்டும் அவர் பார்க்கவில்லை. பராசக்தியின் வடிவமாகவும் கண்டு மெய்சிலிர்த்தார்.
‘காதல் செய்யும் மனைவியே சக்தி கண்டீர்
கடவுள் நிலை அவளாலே எய்தல் வேண்டும்’
சக்தியின் வடிவமாகப் பிறப்பெடுத்திருக்கும் சகத்துப் பெண்களையும் அவர்தம் பெண்மையையும் ஆசை தீரக் கொண்டாடியவர் பாரதியார்.
‘பெண்மை வாழ்கென்று கூத்திடு வோமடா
பெண்மை வெல்கென்று கூத்திடு வோமடா
தண்மை இன்பம்நற் புண்ணியஞ் சேர்ந்தன
தாயின் பெயரும் சதியென்ற நாமமும்.
அன்பு வாழ்கென் றமைதியில் ஆடுவோம்
ஆசைக் காதலைக் கைகொட்டி வாழ்த்துவோம்
துன்பம் தீர்வது பெண்மையி னாலடா
சூரப் பிள்ளைகள் தாயென்று போற்றுவோம்.
வலிமை சேர்ப்பது தாய்முலைப் பாலடா
மானஞ் சேர்க்கும் மனைவியின் வார்த்தைகள்
கலி யழிப்பது பெண்க ளறமடா
கைகள் கோத்துக் களித்துநின் றாடுவோம்
பாரதியாருக்கு இருக்கும் தெளிவான தொலைநோக்குப் பார்வை நம்மை வியப்பில் ஆழ்த்துகிறது. ஒரு பெண்ணைச் சக உயிரியாக முதலில் மதித்து, பிறகு சம உயிரியாக மதித்து, இறுதியில் சக்தி உயிரியாகச் சிகரத்தில் கொண்டுபோய் ஓர் ஆண் நிறுத்த வேண்டும் என்பது பாரதியாரின் அவா. ‘Be the change you want to be’ என்றார் மகாத்மா காந்தி. அதையே வேதவாக்காகக் கொண்டு தன் வாழ்க்கையில் நடத்திக் காட்டினார் பாரதியார். இதுபோல் பல பரிசோதனைகளை அவர் செய்திருக்கிறார். அவ்விதத்தில் பார்த்தால் அவர் ஒரு சமூக விஞ்ஞானி. பிற மனிதர்களின் எள்ளல்களை அவர் எட்டுணை அளவும் பொருட்படுத்தவில்லை. பற்பல ஆண்டுகள் பின் தங்கியிருந்த மக்களைக் கண்டு அவருக்கு இரக்கம்தான் ஏற்பட்டது.

தான் எழுதிய புதுமைப்பெண் கவிதையை இவ்வாறு நிறைவு செய்கிறார் பாரதியார்,
‘போற்றி, போற்றி, ஜயஜய போற்றிஇப்
புதுமைப் பெண்ணொளி வாழிபல் லாண்டிங்கே
மாற்றி வையம் புதுமை யுறச்செய்து,
மனிதர் தம்மை அமரர்க ளாக்கவே
ஆற்றல் கொண்ட பராசக்தி யன்னைநல்
அருளினா லொரு கன்னிகை யாகியே
தேற்றி உண்மைகள் கூறிட வந்திட்டாள்
செல்வம் யாவினும் மேற்செல்வம் எய்தினோம்.
பாரதியார் காட்டிய நெறியில் சக்தியின் வடிவங்களாக, சாதனைச் சிகரங்களாக நம்மிடையே வாழ்ந்து வரும் புதுமைப்பெண்களை மனமார வாழ்த்துவோம். புதுமைப்பெண் என்னும் ஒப்பற்ற கருத்தாக்கத்தை மீட்டெடுத்து புதுப்பொலிவோடு புவனத்துக்கு அளித்த மகாகவி பாரதியாரைப் போற்றி வணங்குவோம்.
(நிறைந்தது)

5 COMMENTS

  1. எப்படி பிறந்தால் புதுமைப் பெண் என்ற தொடரில் முண்டாசு கவிஞன் மனதில் புகுந்து,அவர் சிந்தனையை உள்வாங்கி
    அவர் கண்டபெண்ணை நமதுள்ளும் விதத்துவிட்டார் நிரஞ்சன் பாரதி.
    பெண்ணால் ஆண் கடவுள் நிலை எய்த
    வேண்டும் என்ற பாரதியின் வரிகள் எக்காலத்திலும் பொருந்தும்.
    நிரஞ்சன் அவரின் ஒவ்வொரு வரியையும் மேற்கோளாக கொண்டு அழகாக தொடரை வடித்துள்ளார்.
    தாமே புதுமை பெண்ணை செல்லாமாவிடம் கண்ட கவிஞன் நிலை மெய் சிலிர்க்கவைக்கிறது.
    பரதிவீட்டு இளங்கன்று நன்றாக வளர்ந்து முப்பாட்டனுக்கு பெருமை சேர்க்கும் என்பது திண்ணம்.

  2. அன்னை பராசக்தூயை வணங்கிய பாரதிக்கு பெண் பராசக்தியின் வடிவமாக தெரிந்ததில் வியப்பில்லை.
    மற்றவர்களால் எளிதில் நிகழ்த்த முடியாத அருஞ்செயல்களை, அருட் செயல்களை செய்து முடிப்பீர்கள் தான் சித்தர்கள்.
    பெண்ணடிமை எனும் விலங்கினை உடைக்க வித்திட்ட சித்தர் பாரதியின் கனவு இன்று நனவாகியுள்றது.

    தேசிய பெண் குழந்தைகள் தினம் கொண்டாடும் 24/1/2022 நாளில் இக்கட்டுரை வாசித்தது பெரும் கொடுப்பினை.
    அருமையான ஓவியங்கள்.
    அருமையான கருத்தாழம் மிக்க கட்டுரை.
    கவிஞர் நிரஞ்சன் பாரதியின் ஈர்க்கும் எளிய நடை.
    மங்கையர் மலருக்கு பாராட்டுகள்.

  3. அன்னை பராசக்தூயை வணங்கிய பாரதிக்கு பெண் பராசக்தியின் வடிவமாக தெரிந்ததில் வியப்பில்லை.
    மற்றவர்களால் எளிதில் நிகழ்த்த முடியாத அருஞ்செயல்களை, அருட் செயல்களை செய்து முடிப்பவர்கள் தான் சித்தர்கள்.
    பெண்ணடிமை எனும் விலங்கினை உடைக்க வித்திட்ட சித்தர் பாரதியின் கனவு இன்று நனவாகியுள்றது.

    தேசிய பெண் குழந்தைகள் தினம் கொண்டாடும் 24/1/2022 நாளில் இக்கட்டுரை வாசித்தது பெரும் கொடுப்பினை.
    அருமையான ஓவியங்கள்.
    அருமையான கருத்தாழம் மிக்க கட்டுரை.
    கவிஞர் நிரஞ்சன் பாரதியின் ஈர்க்கும் எளிய நடை.
    மங்கையர் மலருக்கு பாராட்டுகள்.

  4. இந்த அத்தியாயத்தோடு நிறைந்தது என்று கண்டவுடன் இன்னும் சில அத்தியாயங்கள் எழுதி இருக்கலாமே என்று தோன்றியது.
    இக்காலத்தது
    பாரதி ஆர்வலர்கள் அறிய வேண்டிய அரிய செய்திகள் எவ்வளவோ உள்ளன.
    பாரதி பற்றி பல பக்தர்கள் எழுதியிருந்தாலும் பாரதியாரின் எள்ளுப்பெயரர் கவிஞர் நிரஞ்சன் பாரதியின் எழுத்தை வாசிக்கும் போது பாரதியே தனது அகத்தை விவரிப்பதாக தோன்றியது.

    நிரஞ்சன் பாரதி அவர்களின் இலக்கிய படைப்புகள் கல்கி குழும இதழ்களில் தொடர்ந்து வெளிவர வேண்டும்.

    வாழ்க பாரதம்
    வாழ்க பாரதி
    வாழ்க நிரஞ்சன் பாரதி
    மங்கையர் மலருக்கு பாராட்டுகள்.

  5. இன்றைய பெண்களின் சுதந்திரத்தை அன்றே கணித்தவர் .. பெண் தான் பராசக்தி.. அருமை…

நிரஞ்சன் பாரதி
மகாகவி சுப்பிரமணிய பாரதியாரின் எள்ளுப்பேரன். புகழ்பெற்ற கர்நாடக இசைக்கலைஞர் ராஜ்குமார் பாரதியின் மகன். கவிஞர், திரைப்படப் பாடலாசிரியர், எழுத்தாளர், பேச்சாளர். MYTAMILGURU என்ற இணைய வழி தமிழ்ப்பள்ளியை நண்பர்களுடன் இணைந்து நிறுவி உலகெங்கும் உள்ள மாணாக்கர்களுக்குத் தமிழ் பயிற்றுவித்து வருகிறார். இதுமட்டுமல்லாது "பசுமைக் கவிஞன்" என்ற YOUTUBE CHANNEL ஐயும் நடத்திவருகிறார். படித்தது பொறியியலும் மேலாண்மையும் என்றாலும் பிடித்தது தமிழும் இயற்கையும்தான்.

Stay Connected

261,614FansLike
1,915FollowersFollow
7,420SubscribersSubscribe

Other Articles

தமிழக புராதன வைணவத் திருத்தலங்கள்!

பகுதி - 3 ஆலயம் ஒன்று; திவ்யதேசம் நான்கு! -Dr. சித்ரா மாதவன் ’நகரேஷூ காஞ்சி’ என்று போற்றப்படும் காஞ்சிபுரம் திருத்தலத்தில் அமைந்துள்ளது உலகளந்த பெருமாள் திருக்கோயில். மகாவிஷ்ணுவின் தசாவதாரங்களில் ஐந்தாவது அவதாரமான திரிவிக்ரமருக்கான பிரத்யேகத் திருக்கோயில்...

ஜப்பானியர்தான் புதிய உலகின் ஏகலைவன்.

0
உலகக் குடிமகன் -  22 - நா.கண்ணன் ஏ.என்.எஸ். மிக உற்சாகமாக என்னைக் கடை கண்ணிகளுக்கு அழைத்துப் போனார். ஆனால் எல்லாக்கடைக்குள் நுழையும் போது, “சுமிமாசேன்” என்று சொல்லிவிட்டு உள்ளே போனார். இது அலிபாபாவும் நாற்பது...

“விடுதலைப்புலிங்ககிட்டேயிருந்து ஆயுதங்களைப் பிடுங்கிடுங்க”

0
ஒரு நிருபரின் டைரி - 22 - எஸ். சந்திரமெளலி ஆயுத காண்டம்   எம்.ஜி.ஆர். ஆட்சிக் காலத்தில் தமிழக காவல் துறையில் பணியாற்றிய டி.ஜி.பி. மோகன்தாஸ் ஒரு சுவாரசியமான மனிதர். எம்.ஜி.ஆருக்கு மிகவும் நெருக்கமானவர்; இவரை ஆலோசனை...

பாட்டொன்று கேட்டேன்!

இது மங்கையர்மலரின் விவிதபாரதி...  பகுதி - 5  -ஆதிரை வேணுகோபால் மங்கையர்மலர் விவிதபாரதியில் நாம் இன்று கேட்க விரும்பும் பாடல்... 80's காதலர்கள் கொண்டாடிய பாடல்! காதல் சோகப்பாடல்! அனுபவம் மிக்க வார்த்தைகள்,  தாள வாத்தியம் இசை, டி.எம்.எஸ்...

பறக்கும்  பாவைகள் – 2

எங்களாலும் பறக்க முடியும்... -ஜி.எஸ்.எஸ். பயணிகள் அடங்கிய ஒரு விமானத்தை முதலில் ஓட்டிய பெண்மணி ஹெலன் ரிச்சி. அமெரிக்காவிலுள்ள பென்சில்வேனியா மாநிலத்தில் பிறந்தவர் இவர். அவர் தந்தை ஜோசப் ரிச்சி பள்ளிகளில் மேற்பார்வையாளர். பள்ளியில் படிக்கும்போதே தன்னை...