நாட்டின் முதல் சூதாட்ட விடுதி கட்டுவதற்கான சர்ச்சைக்குரிய திட்டங்களுக்கு ஒப்புதல் அளித்தது ஜப்பான்!

இந்த சூதாட்ட விடுதி வளாகம் 2029 இல் மேற்கு நகரமான ஒசாகாவில் திறக்கப்படும் என்பதாகத் தகவல்.

ஜப்பானில் நீண்ட காலமாகவே கேசினோக்கள் சட்டவிரோதமாகவே கருதப்பட்டு வந்தன. ஆனால் 2018 இல் ஒரு சட்டம் இயற்றப்பட்டது, அந்த சட்டம் இயற்றப்பட்டதன் நோக்கம் வருவாய் ஈட்டுவதும் , வேலை வாய்ப்புகளை உருவாக்குவதும் என்று கூறப்பட்டது. அந்த சட்டமானது போக்கர் அல்லது பேக்கரட் போன்ற விளையாட்டுகளுக்கு விதிவிலக்கு அளித்தது, புதிய வேலை வாய்ப்புகளை உருவாக்கவும் மற்றும் சுற்றுலாவை மேம்படுத்தவும் அந்த திட்டம் உதவும் என அரசு கருதியது.

ஜப்பானிய அரசின் இந்தச் சட்டம் குறித்து பொதுமக்கள் அதிருப்தி தெரிவித்தே வந்தனர். இதன் மூலமாக வேலைவாய்ப்பு பெருகுகிறதோ இல்லையோ குற்றச்செயல்கள் மற்றும் சூதாட்ட அடிமைத்தனம் அதிகரித்து விடக்கூடும் என பொதுமக்கள் மற்றும் தன்னார்வலர்கள் சிலர் கவலையுடன் இருந்தனர். அதனடிப்படையில் இந்த ஒரு விஷயத்தில் அரசும், பொதுமக்களும் கருத்து ரீதியாகப் பிளவுபட்டிருந்தனர்.

சூதாட்ட விடுதி தவிர, 5.3 மில்லியன் சதுர அடி (49 ஹெக்டேர்) வளாகத்தில் ஒரு ஹோட்டல், மாநாட்டு மையம், வணிக வளாகம் மற்றும் அருங்காட்சியகம் ஆகியவற்றையும் அமைக்கும் நோக்கில் இருக்கிறது ஜப்பான் அரசு.

பிரதம மந்திரி ஃபுமியோ கிஷிடாவின் கூற்றுப்படி, "ஜப்பானின் அழகை உலகிற்கு ஊக்குவிக்கும் ஒரு சுற்றுலா தளமாக (சூதாட்ட விடுதி) மாறும் என்று நாங்கள் நம்புகிறோம்.

இந்தத் திட்டமானது 1.8tn யென் ($13.5bn, £10.7bn) ஆரம்ப முதலீட்டைக் கொண்டுள்ளது, அமெரிக்காவைச் சேர்ந்த கேசினோ ஆபரேட்டர் MGM மற்றும் ஜப்பானின் Orix குழுமம் ஆகியவை தலா 40% பங்குகளை இந்நிறுவனத்தில் வைத்துள்ளன.

மற்ற 20% உள்ளூர் நிறுவனங்களான மேற்கு ஜப்பான் ரயில், கன்சாய் எலக்ட்ரிக் பவர் மற்றும் ஒசாகாவை தளமாகக் கொண்ட பானாசோனிக் நிறுவனங்களுக்குச் சொந்தமானதாக இருக்கும்.

ஜப்பானிய செய்தி சேவையின்படி, இந்த ரிசார்ட் ஆண்டுதோறும் சுமார் 20 மில்லியன் பார்வையாளர்களை ஈர்க்கும் மற்றும் வருடாந்த பொருளாதார நன்மைகளில் சுமார் 1tn யென்களைக் கொண்டுவரும் என்று அதிகாரிகள் எதிர்பார்க்கிறார்கள்.

இந்த திட்டம் பல ஆண்டுகளுக்கு முன்பே முன்மொழியப்பட்டது, ஆனால் கோவிட்-19 தொற்றுநோய் மற்றும் கேசினோ கொள்கையின் பொறுப்பில் இருந்தபோது லஞ்சம் பெற்றதாக குற்றம் சாட்டப்பட்ட ஆளும் கட்சி சட்டமன்ற உறுப்பினர் சம்பந்தப்பட்ட ஊழல் வழக்கு காரணமாக இது தாமதமானது.

பொதுவில் ஜப்பான் சூதாட்டத்திற்கான ஒரு நம்பிக்கைக்குரிய சந்தையாகக் காணப்படுகிறது. இது சுமார் 126 மில்லியன் மக்கள்தொகையுடன் உலகின் மூன்றாவது பெரிய பொருளாதார நாடாகும்.

இது பணக்கார ஆசிய சூதாட்டக்காரர்களுக்கு, குறிப்பாக சீனாவிலிருக்கும் சூதாட்ட ஆர்வலர்களுக்கு மிக நெருங்கிய அருகாமையில் உள்ளது. கேசினோ சூதாட்டம் சட்டப்பூர்வமாக இருக்கும் ஒரே சீன நகரம் மக்காவ்.

இதேபோன்ற திட்டம் நாகசாகி ப்ரிஃபெக்ச்சரால் ஹுயிஸ் டென் போஷ் என்ற டச்சு-தீம் பார்க் என்ற இடத்தில் ஒரு சூதாட்ட விடுதியை உருவாக்குவதற்கு சமர்ப்பிக்கப்பட்டுள்ளது.

வருங்காலத்தில் மேலும் சில பகுதிகளிலும் இத்தகைய சூதாட்ட விடுதிகள் திறக்கப்படலாம் என்பதால் சூதாட்ட விடுதிகள் திறக்க அனுமதி அளிக்கும் சட்டத்தைப் பொருத்தவரை பொதுமக்கள் மற்றும் அரசுக்கு இடையிலான கருத்து வேறுபாடு மேலும் அதிகரிக்கலாம் என நம்பப் படுகிறது. ஆயினும் ஜப்பானிய அரசு இந்த விஷயத்தில் மும்முரமாக இயங்கி வருவது குறிப்பிடத்தக்கது.