புற்றுநோய் முதல் பல் வலி வரை... சர்வ ரோக நிவாரணி எது தெரியுமா?

இந்தியாவில் 7000-க்கும் மேற்பட்ட மருத்துவ தாவரங்கள் உள்ளன. அவற்றில் தெருக்கள் மற்றும் வயல்கள் ஓரம் கேட்பாரற்று இருக்கும் நாயுருவி என அழைக்கப்படும் செடியும் ஒன்று. இதன் அறிவியல் பெயர் 'Achyranthes Aspera'. ஆன்மீக ரீதியாக மிகவும் புனிதமானதாகக் கருதப்படுகிறது. புதன் கிரகத்திற்குரியதாக கருதப்படுகிறது. அதேபோல ஆயுர்வேதத்தில் இது மிகுந்த முக்கியத்துவத்தைக் கொண்டுள்ளது. இந்த செடி பல நோய்களுக்கு ஒரு அருமருந்தாக செயல்படுகிறது. இது பாரம்பரியமாக பாம்பு கடி போன்ற பல்வேறு நோய்களுக்கு நாட்டு மருந்தாக பயன்படுத்தப்படுகிறது.

நாயுருவி செரிமான அமைப்பைத் தூண்டி செரிமானத்தை ஊக்குவிக்கிறது. அஜீரணம், வீக்கம் மற்றும் மலச்சிக்கலை நீக்குகிறது. சிறந்த ஊட்டச்சத்து உறிஞ்சுதலை ஊக்குவிக்கிறது. இது ஒரு டையூரிடிக் ஆக செயல்பட்டு, சிறுநீர் வழியாக நச்சுகளை அகற்றி சிறுநீரக பிரச்சனைகளை தவிர்க்க உதவுகிறது.

இதிலுள்ள அழற்சி எதிர்ப்பு மற்றும் ஆண்டி மைக்ரோபியல் பண்புகள் சரும பிரச்சனைகளுக்கு தீர்வாகிறது. இதிலுள்ள அழற்சி எதிர்ப்பு பண்புகள் உடலில் ஏற்படும் வீக்கத்தைக் குறைத்து மூட்டுவலி மற்றும் பிற அழற்சி நிலைகளுக்கு ஒரு நல்ல தீர்வாக அமைகிறது.

மழைக் காலத்தில் துளிர்விடும் இளம் நாயுருவி இலை ஆற்றல் மிக்கது மற்றும் சிறந்தது என்கிறது சித்த மருத்துவம். இருமலைத் தடுக்க, இதன் இலையைப் பருப்புடன் சேர்த்து சமைத்து வாரம் இருமுறை சாப்பிட்டு வர நுரையீரல் சுற்றிய சளி குணமாகும். நாயுருவி வேர் பொடியை மிளகு மற்றும் தேனுடன் கலந்து மழை காலங்களில் ஏற்படும் இருமலை குணப்படுத்த பயன்படுத்தலாம்.

நாயுருவி இலை பொடி:

நாயுருவி இலையை பொடியாக செய்து பயன்படுத்தலாம். 1-2 டீஸ்பூன் நாயுருவி பொடியை வெதுவெதுப்பான நீரில் கலந்து குடிக்க அது செரிமானத்தை மேம்படுத்தி, வயிற்று உப்புசத்தை போக்கவும் உதவும். 100 மில்லி தண்ணீரில் சுமார் 5 கிராம் நாயுருவி பொடியை கொதிக்க வைத்து, வடிகட்டி, காலை உணவுக்கு முன் அல்லது இரவு உணவிற்கு பிறகு குடிக்கவும். குறிப்பாக, வயிற்றில் அசாதாரண நிலைமைகள் ஏற்பட்டால், மோருடன் சாப்பிட்டால் வயிற்றுப்போக்கை குணப்படுத்தவும் பயன்படுத்தலாம்.

நாயுருவி இலை, குப்பைமேனி இலை, கறிவேப்பிலை இவற்றை சம அளவு எடுத்து கழுவி அதை சின்ன வெங்காயத்தை நறுக்கி போட்டு நெய்யில் வதக்கி வாரத்திற்கு இரண்டு முறை சாப்பிட கண் பார்வை மேம்படும்; கிட்டப்பார்வை மற்றும் தூரப்பார்வை கூட நாளடைவில் சரியாகும்.

நாயுருவி ஊட்டச்சத்து மாவு:

நாயுருவி விதை-100 கிராம், சிவப்பு அரிசி -100 கிராம், பாசிப்பருப்பு, கடலைப்பருப்பு, வெள்ளரி விதை, பூசணி விதை, முந்திரிப் பருப்பு, கருப்பு எள் தலா 50 கிராம், ஏலக்காய்-20 எடுத்துக் கொள்ள வேண்டும்.

நாயுருவி விதையை வெறும் வாணலியில் லேசாக வறுத்து, துணியில் வைத்து கசக்கினால், உமியும் விதையும் தனித்தனியாகப் பிரியும். விதையை மட்டும் எடுத்து தனியாக வைக்கவும். பின்னர் ஏலக்காய் தவிர்த்து மற்ற பொருட்களையும் வெறும் வாணலியில் இளம் வறுவலாக வறுத்து எல்லா பொருட்களையும் ஒன்று சேர்ந்து மாவாக அரைத்துக் கொள்ளவும். பின்னர் அதை வெல்லம் சேர்த்து இனிப்பு உருண்டைகளாக செய்து சாப்பிடலாம். இதனால் உடலுக்கு தேவையான ஆற்றல் கிடைக்கும். மூல நோய்க்கு சிறந்த மருந்தாகும். சிறுநீரகக் கற்களை கரைக்கும், பற்களுக்கு வலிமை தரும்.

நாயுருவி இலைகளின் அரைத்த பேஸ்ட்டை விஷ பூச்சி கடிக்கு சிகிச்சையளிக்க பயன்படுத்தலாம். வெங்காயத்துடன் கலக்கும்போது, சரும நோய்களைக் குணப்படுத்த பயன்படுத்தலாம். உடலில் அரிப்பு அதிகமாக இருக்கும்போது, நாயுருவி இலைகளோடு, குப்பைமேனியைச் சேர்த்து அரைத்து, உடலில் தேய்த்துக் குளிக்கலாம். நாயுருவி இலைச் சாறை நீரில் கலந்து, சிறிதளவு உட்கொள்வதாலும் சரும நோய்கள் குணமாகும். ஆறாத புண் ஆகியவற்றிக்கு இதன் இலையை அரைத்துக் கட்டி வர குணமாகும்.

நாயுருவி இலையை அரைத்து நெல்லிக்காய் அளவு எருமைத் தயிரில் காலை வெறும் வயிற்றில் சாப்பிட்டு வந்தால் இரத்தமூலம் குணமாகும். மேக நோய், சிறுநீரில் வெள்ளை ஒழுக்கு, பேதி குணமாகும். சிறுநீரை அதிகமாக வெளியேற்றும் தன்மை உடையதால் வீக்கம், நீரடைப்பு போன்ற நோய் நிலைகளில் நாயுருவி சிறந்த மருந்து. வயிற்றுப் புண்ணைக் குணமாக்க, நாயுருவி, மிளகு, மண்டூரம் சேர்த்துச் செய்யப்படும் சித்த மருத்துவ மருந்து பயன்படுகிறது.

நாயுருவி வேரைக் கொண்டு பல் துலக்க, பற்கள் பலமாவதோடு நுண்கிருமிகளின் தாக்கமும் குறையும். இதன் வேரைப் பற்குச்சியாகப் பயன்படுத்தினால் ‘முகத்தில் வசீகரம் உண்டாகும்’ என்கிறது சித்த மருத்துவம். ஹீமோகுளோபின், ரத்தத் தட்டணுக்களின் எண்ணிக்கையை அதிகரிக்க நாயுருவி உதவுவதாக ஆய்வுகள் தெரிவிக்கின்றன. புற்றுநோய் செல்களின் வளர்ச்சி வேகத்தை இதிலுள்ள ஃப்ளேவனாய்ட்கள் கட்டுப்படுத்துகின்றன. சில நபர்கள் நாயுருவியை அதிக அளவுகளில் எடுத்துக் கொள்ளும்போது வாந்தி அல்லது குமட்டலை அனுபவிக்கலாம்.

(முக்கிய குறிப்பு: இந்தத் தகவல்கள் பொதுவான விழிப்புணர்வுக்காக மட்டுமே. மருத்துவ ஆலோசனைக்கு சரியான தகுந்த மருத்துவரை அணுகவும்)