வாசகர் ஜமாய்க்கிறாங்க!
– இந்திராணி தங்கவேல், மாடம்பாக்கம்
நவராத்திரியின் ஒன்பது நாட்களிலும் அம்பிகையை ஒன்பது விதமாக அலங்கரிப்பார்கள்.
முதல் நாள் – மது, கைடபர் என்ற அரக்கர்களின் அழிவிற்குக் காரணமாக விளங்கிய குமரி வடிவ அலங்காரம்.
இரண்டாவது நாள் – மகிஷாசுரனை வதம் செய்யப் புறப்பட்ட ராஜராஜேஸ்வரிஅலங்காரம்.
மூன்றாவது நாள் – மகிஷாசுர வதம் முடித்து, சூலத்தைக் கையில் ஏந்தி மகிஷத்தின் தலை மீது வீற்றிருக்கும் கல்யாணி வடிவம்.
நான்காம் நாள் – சிம்மாசனத்தில் அமர்ந்து, இன்னல்களிலிருந்து விடுபட்ட தேவர்களும், முனிவர்களும் செய்யும் தோத்திரங்களை ஏற்று, அவர்களுக்கு அருள்பாலிக்கும் ஜெயதுர்கை அலங்காரம்.
ஐந்தாம் நாள் – சுகாசனத்தில் வீற்றிருந்து, சும்பன் என்ற அசுரனால் அனுப்பப்பட்ட தூதுவனாகிய சுக்ரீவன் சொல்வதைக் கேட்டுக்கொண்டிருக்கும் பாவனையில் துர்கை அலங்காரம்.
ஆறாம் நாள் – சர்ப்ப ராஜ ஆசனத்தில் அமர்ந்திருக்கும் சண்டிகா தேவி அலங்காரம்.
ஏழாம் நாள் – சண்ட, முண்டர்கள் என்ற அசுரர்களை வதம் செய்த பின், பொற்பீடத்தில் அமர்ந்து, வீணை வாசிக்கும் சாம்பவி கோலம்.
எட்டாம் நாள் – ரக்தபீஜன் வதைக்குப் பிறகு, கருணை நிறைந்தவளாய், அஷ்ட ஸித்திகளும் புடைசூழ வீற்றிருக்கும் கோலம்.
ஒன்பதாம் நாள் – அரக்கர்களை அழித்து முடித்து, கரங்களில் வில், பாசம், அங்குசம், சூலம் ஏந்தியவளாக சிவசக்தி வடிவமாகக் காட்சி தரும் காமேஸ்வரி கோலம்.
விஜயதசமி நாளன்று அம்பிகை பார்வதியின் ஸ்தூல வடிவமான விஜயாம்பாளாக அலங்கரிக்கபடுகிறாள்.
