விலா எலும்புகளைப் போல் செதுக்கப்பட்டுள்ள பாறைகள்-எங்கே உள்ளன தெரியுமா?

மகாராஷ்டிரா மாநிலத்திலிருந்து 15 கிலோமீட்டர் தொலைவில் அவுரங்காபாத்தின் வடமேற்கில் அமைந்துள்ள எல்லோரா குகைகள் சிறந்த சுற்றுலா தலங்களில் ஒன்றாகும்.

ஒரே பாறையைக் குடைந்து கட்டப்பட்ட உலக புகழ்பெற்ற குகைகோயில்கள் இவை.

பொதுவாக எல்லோரா என்றாலே கைலாசநாதர் கோயிலைப் பற்றித்தான் அதிகம் பேசப்படும். ஆனால், அங்குள்ள பௌத்த, சமண குகை கோயில்களும் மிகவும் சிறப்பாக வடிவமைக்கப்பட்டுள்ளன.

எல்லோரா குகைகள் 8ஆம் நூற்றாண்டில் ராஷ்டிரகூட வம்ச மன்னர் கிருஷ்ணா என்பவரால் கட்டப்பட்டவை. கைலாசநாதர் கோயில் செங்குத்தான பெரியமலையை உச்சியிலிருந்து குடைந்து உருவாக்கப்பட்டது.

பிரம்மாண்டமான புத்தர்சிலையும், பெரிய போதிமரமும், துறவிகளின் சிற்பங்களும் செதுக்கப்பட்டுள்ள புத்தகுகைகள் மிகவும் சிறப்பானவை.

34 குடைவரை கோயில்களில் 1 முதல் 12 வரை புத்த குகைகள் உள்ளன. ஐந்து சமண குகைகளும் உள்ளன. 

பௌத்தகுகைகள் 11 மற்றும் 12, ஒருபாறையில் வெட்டப்பட்ட மூன்று அடுக்கு பௌத்த மடங்களாகும். இவை 600-730 CE இடையே  கட்டப்பட்டவை.

மடாலய குகைகளில் கௌதமபுத்தர், போதி சத்துவர்கள் மற்றும் துறவிகளின் சிற்பங்கள் உள்ளிட்ட சன்னதிகள் உள்ளன.

பௌத்தகுகை 10 – சைத்யா மண்டபம். இதன் மேற்குபகுதியில் ஒரு ஸ்தூபி உள்ளது. இங்கு வியாக்யான முத்திரையில் அதாவது கற்பிக்கும் தோரணையில் ஒரு பிரம்மாண்டமான புத்தர்சிலை செதுக்கப்பட்டுள்ளது. 

இவரது பின்புறத்தில் ஒருபெரிய போதிமரம் செதுக்கப்பட்டுள்ளது. மண்டபத்தின் கூரையில் விலா எலும்புகளைப் போல் பாறையில் செதுக்கப்பட்டுள்ளது. 

தூண்களுக்கு மேல் நாகாரணிகள், நடனக்கலைஞர்கள் மற்றும் இசைக்கலைஞர்கள் செதுக்கப்பட்டுள்ளனர். 

பௌத்த குகைகளில் குகை எண் 10 (விஸ்வகர்மாஅல்லது தச்சர்குகை), குகை 11 மற்றும் குகை 12 (மூன்று மாடி மடாலயம்) ஆகியவை மிகப்பெரியவை. இவை மூன்றும் முக்கியமான பௌத்த குகைகளாகும். 

இந்தக் குகைகள் பௌத்தத்தின் வஜ்ராயன வடிவத்தின் வளர்ச்சியையும், பல பௌத்த தெய்வங்களையும் குறிக்கின்றன.

சமண குகைகளில் 30 - 34 நேர்த்தியாக செதுக்கப்பட்ட நுட்பமான சிற்பங்கள் உள்ளன.

எல்லோரா குகைகள் மூன்று பெரிய மதங்களுக்கு அதாவது புத்தமதம், இந்து மதம் மற்றும் சமண மதத்தின் சகிப்புத்தன்மையின் உணர்வைப் பிரதிபலிக்கும் விதத்தில் அமைந்துள்ளன.

சுல்தான்கள் கோயிலை அழிக்க பல முயற்சிகள் செய்தும் அவர்களால் சிலைகளின் சிறுபாகங்களை மட்டும்தான் உடைக்கமுடிந்தது.

இந்தக் கோயில்கள் யுனெஸ்கோவின் உலக பாரம்பரியச் சின்னங்கள் பட்டியலில் ஒன்றாக உள்ளது. ‌‌