பிளமிங்கோ பறவைகள் பற்றி சில தகவல்கள்!

இவைகளை தமிழில் பூ நாரை அல்லது செங்கல் நாரை என்று அழைப்பார்கள். நாரை வகையை சார்ந்தவை.

பல நூற்றுக் கணக்கான பிளமிங்கோ பறவைகள் ஒன்றாக கூடி நீர் நிலையில் ஆக்கிரமித்து இருக்கும் காட்சி கண் கொள்ளா காட்சி ஆகும்.

இதன் ஆங்கிலப் பெயரான பிளமிங்கோ இலத்தீன் மொழியிலிருந்து வந்தது.

இதன் அலகு மிகவும் நீண்டு இருக்கும். வளைந்தும் காணப்படும். அலகு வெள்ளையில் ஆரம்பித்து கறுப்பில் முடியும்.

கடல் ஓரப் பகுதிகள், ஆழம் குறைந்த ஏரிகள், குளங்கள் இவற்றில் சிறிய அல்லது பெரிய குழுக்களாக இரை தேடும்.

ஆழம் குறைந்த பகுதிகளில் கழுத்தைத் தாழ்த்தி தலையை முழுவதும் நீரில் செலுத்தி இரை தேடும்.

மீன்கள், நண்டுகள், புழுக்கள், இறால்கள், பூச்சிகள், பாசிகள் ஆகியவற்றை உண்ணும்.

பறக்கின்ற பொழுது இறக்கைகளில் இருக்கும் கரு நிறம் நன்றாக தெரியும்.

பூ நாரைகள் நமது நாட்டின் கட்ச் பகுதியில் கூடுகள் அமைகின்றன. அங்கு இலட்சக் கணக்கான பறவைகள் இனப் பெருக்கத்தில் ஈடுபடுகின்றன.

தரையிலிருந்து 30 செமீ உயரத்துக்கு மண்ணைக் கொண்டு சிறிய மண் பானை வடிவில் கூடுகள் அமைக்கும் திறமை கொண்டவை இந்த வகை பறவைகள்.

வருடத்துக்கு ஒரேயொரு முட்டைதான் இடும். பிளமிங்கோ குஞ்சு பருவத்தில் சாம்பல் நிறத்தில் இருக்கும். வளர்ந்ததும் இளஞ் சிவப்பு வண்ணத்தை பெறுகின்றன. இவை சராசரியாக 30 - 40 வயது வரை உயிர் வாழுகின்றன.

வகைகளுக்கு ஏற்ப பிளமிங்கோ பறவைகளின் உயரம், எடை ஆகியவை வேறுபடும்.

பொதுவாக பிளமிங்கோ பறவைகள் தங்கள் உணவுகளை அப்படியே உண்ணாது. வடி கட்டிய (filter) பிறகு விழுங்கி விடும்.

இவை உணவுகளுக்காக இடம் பெயரும் தன்மை உடையவை.

கூட்டமாக ஆகாயத்தில் பறக்கும் காட்சி தனி தன்மை பெற்றது. பார்ப்போரை பரவசம் அடைய வைக்கும்.