அலுவலகத்தையும் வீட்டையும் அழகாக்கும், மன அழுத்தத்தைப் போக்கும் செடிகள்..!

அலங்காரச் செடிகள் முதல் அவசியமான செடிகள் வரை விதவிதமாக வளர்க்கும் ஆசை உள்ளவரா நீங்கள்? இதைக் கட்டாயம் படியுங்க!

சில செடிகளை நாம் வீட்டின் உட்புறத்தில் வளர்க்க அவை நம் வீட்டை அழகுபடுத்துவதுடன் மன அழுத்தத்தையும் குறைத்து, நம்மை நல்ல மனநிலையில் வைத்திருக்க உதவும். 

அடுக்குமாடி குடியிருப்பில் இருப்பவர்கள் பால்கனிகளிலும், சமையலறை, கம்ப்யூட்டர் டேபிள், குளியலறை என பல இடங்களில் தொட்டிகளை வைத்து வளர்க்கின்றனர்.

நாம் என்ன செடிகள் வாங்கப் போகிறோம் என்பதை முடிவு செய்து அதற்கு ஏற்ற சூழ்நிலை, எப்படிப் பராமரிப்பது என்று தெரிந்து அவற்றை கடைகளில் சென்று வாங்கலாம்.

செடிகளை வாங்கி தொட்டியில் வைப்பதுடன் நில்லாமல், அதற்கு அழகு சேர்க்க செடியின் அடிப்பகுதிகளில் கூழாங்கற்களைப் போட்டு வைக்க, எளிமையானதாகவும் அதே சமயம் மிக அழகானதாகவும் தோன்றும்.

தினமும் செடிகளுக்குத் தண்ணீரை அதன் இலைகளில் ஸ்பிரே செய்ய, இலைகளில் இருக்கும் தூசிகள் நீங்கி பளிச்சென இருக்கும்.

சூரிய ஒளி தேவைப்படும் செடிகளை வாரம் ஒரு முறை சூரிய ஒளி படுமாறு வெளியில் வைத்து எடுக்கலாம்.

செடிகளை பூச்சிகள் தாக்காமல் இருக்க இயற்கையான பூச்சி விரட்டிகளை ஸ்பிரே செய்யலாம்.

சில செடிகளை வளர்ப்பது எளிது. அதிக பராமரிப்பு தேவைப்படாத செடிகளை வாங்கலாம். மணி பிளான்ட் செடி இந்த வகையைச் சார்ந்தது.

அத்துடன் மன அழுத்தத்தைப் போக்கும் செடிகளும் கிடைக்கின்றன. ஸ்பைடர் பிளான்ட், பீச் லில்லி, சைனீஸ் எவர்கிரீன், ரேபிஸ் பாம்(rhapis palm) போன்ற செடிகள் நம் மன அழுத்தத்தைப் போக்கும் செடிகளாகும்.

துளசியில் ஆன்டிஹைபோக்சிக் விளைவு இருப்பதால், சுற்றுச்சூழலை புத்துணர்வுடன் வைத்திருக்க உதவும். இவற்றை வீட்டில் வளர்ப்பதால் பாசிட்டிவ் வைப்ரேஷன் இருக்கும்.

லாவண்டர் செடியின் அழகிய பர்பிள் நிற பூக்களில் இருந்து வரும் மென்மையான வாசனை நம் மன பதட்டத்தைப் போக்கி மனதை அமைதிப்படுத்தி, மன அழுத்தத்தைக் குறைக்கக் கூடியது.

மல்லிகை பூக்கள் நம் மனநிலையை மாற்றும் சக்தி கொண்டவை. அதன் சுகந்தமான மணம் நம் மனதை லேசாக உணர வைக்கும்.

புதினா செடிகளில் இருக்கும் மெந்தாலில் நம் மன அழுத்தத்தைக் குறைக்கும் பண்புகள் நிறைய உள்ளன.

இப்படிப் பார்த்து பார்த்து செடிகளை வளர்த்தால் நம் மன அழுத்தம் வெகுவாக குறைவதுடன் உற்சாகமும் புத்துணர்ச்சியும் கூடும்.