கே.எஸ்.கிருஷ்ணவேனி
வயிற்றில் பை உள்ள மாமிச உண்ணி. மார்சுபியல் இனத்தைச் சேர்ந்த பாலூட்டி.
ஆஸ்திரேலியாவின் டாஸ்மேனியா பகுதியில் மட்டும் காணப்பட்டதால், இதற்கு டாஸ்மேனியன் டெவில் என்று பெயர் வந்தது.
இது 20 முதல் 30 அங்குல அளவு வரை வளரும். இதன் எடை 6-10 கிலோ வரை இருக்கும். உலகின் மிகப்பெரிய மாமிச உண்ணி (சதை உண்ணும்) மார்சுபியலாகும்.
இந்த அணில் அளவுள்ள பாலூட்டியின் பூர்வீகம் ஆஸ்திரேலியாவில் உள்ள டாஸ்மேனியா என்னும் ஒரு சிறிய தீவாகும்.
இவை கனமான முன் பகுதிகள், பலவீனமான பின்பகுதிகள் மற்றும் பெரிய சதுர தலையுடன் கரடி போன்ற தோற்றம், அடர்த்தியான கருப்பு ஃபர் கோட், வலுவான மற்றும் கூர்மையான பற்கள் கொண்டவை.
இறந்த செம்மறி ஆடு போன்ற விலங்குகளின் மாமிசத்தை உண்பதுடன் சில வண்டுகளின் லார்வாக்களையும் உட்கொள்கின்றன. இப்படி இறந்த உடல்களை உண்ணும் பழக்கம்கொண்ட இந்த டெவில்கள், பயம் ஏற்படுத்தும் அளவுக்குப் பயங்கரமாக அலறுவதால் இப்பெயர் உண்டானது.
இதன் கர்ப்பக் காலம் மூன்று வாரங்களாகும். இந்த வகை உயிரினங்கள் பை போன்ற அமைப்பில் இளம் உயிர்களைப் பாதுகாக்கின்றன. இவை சுமார் ஐந்து மாதங்கள் பையில் இருக்கும்.
கங்காரு, வாலபி, கோவாலா போன்றவை இவ்வகை உயிரினங்களில் நன்கு அறியப்பட்ட விலங்குகளாகும்.
புதிதாகப் பிறந்த குட்டிகள் இளஞ்சிவப்பு நிறத்தில் ரோமங்கள் இல்லாமல் தெளிவற்ற முக அம்சங்கள்கொண்டு பிறக்கும்.
டாஸ்மேனியன் டெவில்களின் பற்கள் மற்றும் தாடைகள் பல அம்சங்களில் ஹைனாவைப் போலவே உள்ளன.
இந்த விலங்கு ஆஸ்திரேலியாவில் 3000 ஆண்டுகளுக்கு முன்பு அதிக எண்ணிக்கையில் இருந்ததாகவும் பின் படிப்படியாகக் குறைந்து அழிவின் விளிம்புக்குச் சென்றதாகவும் கூறப்படுகிறது.
இந்நிலையில் இந்த விலங்கைப் பாதுகாக்கவும், அதிகரிக்கவும் ‘ஆஸி ஆர்க்’ என்ற அமைப்பு டாஸ்மேனியன் டெவில் விலங்குகளை இனப்பெருக்கம் செய்தது.
அதன்பயனாக தற்பொழுது 25 ஆயிரம் டாஸ்மேனியன் டெவில் விலங்குகள் இருப்பதாக வனத்துறை அதிகாரிகள் தெரிவித்துள்ளனர்.