வங்கி தேவையில்லை, ஆப்ஸ் தேவையில்லை! வைர வணிகத்தை ஆளும் 10 ரூபாய் நோட்டின் வலிமை!

இன்றைய டிஜிட்டல் யுகத்தில், யுபிஐ, மொபைல் வாலட்கள் மற்றும் இணைய வங்கிச் சேவைகள் பணப் பரிமாற்றங்களை மிக எளிதாக்கிவிட்டன. ஆனால், இந்தியாவின் மிகப்பெரிய வர்த்தக மையமான மும்பையின் நகை மற்றும் வைர சந்தையில், அதிநவீன தொழில்நுட்பங்களை விட, பல தலைமுறைகளாகத் தொடரும் 'நம்பிக்கை' என்ற அடித்தளமே இன்றும் உள்ளது.

அங்குள்ள வியாபாரிகள் கோடிக்கணக்கான ரூபாய் மதிப்புள்ள தங்கம் மற்றும் வைரங்களை அனுப்ப, எந்தவொரு வங்கியையோ அல்லது செயலியையோ சார்ந்து இருப்பதில்லை; மாறாக, வெறும் 10 ரூபாய் நோட்டை மட்டுமே ஒரு பாதுகாப்புக் குறியீடாகப் பயன்படுத்துகின்றனர். இதற்கு அங்கடியா முறை என்று பெயர்.

அங்கடியா முறை (Angadia System):

மும்பையின் ஜவேரி பஜார் போன்ற இடங்களில் நடக்கும் வர்த்தகங்கள் பெரும்பாலும் 'அங்கடியா' என்றழைக்கப் படும் பாரம்பரிய விநியோக முறையைச் சார்ந்தே இருக்கின்றன. இது பல தசாப்தங்களாகக் குடும்பங்களாகச் செய்து வரும் ஒரு நம்பகமான வணிகச் சங்கிலி. மும்பை, சூரத், அகமதாபாத் மற்றும் ராஜ்கோட் போன்ற முக்கிய வர்த்தக நகரங்களுக்கு இடையே தங்கம், வைரங்கள், ரொக்கம் மற்றும் ஆவணங்களை இந்த அங்கடியா ஊழியர்கள் தங்கள் கைகளாலேயே பத்திரமாக எடுத்துச் செல்கின்றனர்.

இந்த முறையில் பரிமாற்றம் நடக்கும் விதம் மிகவும் சுவாரஸ்யமானது. டிஜிட்டல் கடவுச்சொற்களுக்குப் பதிலாக, இங்கே 'நம்பிக்கையின் அடையாளம்' ஒரு கரன்சி நோட்டாக மாறுகிறது.

முதலில், அனுப்புநரும் பெறுநரும் ஒரு குறிப்பிட்ட ரூபாய் நோட்டைத் (எ.கா: ₹10 அல்லது ₹50) தேர்ந்தெடுக்கிறார்கள்.

அந்த நோட்டின் தனித்துவமான வரிசை எண் (Serial Number) ரகசியமாகப் பரிமாறிக் கொள்ளப்படுகிறது.

பொருட்கள் இலக்கைச் சென்றடைந்ததும், பெறுநர் அதே வரிசை எண் கொண்ட நோட்டைப் காண்பித்தால் மட்டுமே, அந்தப் பொருள்கள் அவரிடம் ஒப்படைக்கப்படும்.

இந்த மிக எளிமையான சரிபார்ப்பு முறை, நவீன கால தொழில்நுட்பத்தை விட அதிக பாதுகாப்பாக வியாபாரிகளால் கருதப்படுகிறது.

ஏன் இந்த பழைய முறை இன்னும் அழியவில்லை?

நவீன வங்கிகள் இருக்கும்போது, ஏன் வியாபாரிகள் இதைத் தொடர்கிறார்கள்? இதற்குப் பல காரணங்கள் உள்ளன. முதலாவதாக, 24 மணி நேரத்திற்குள் மிக வேகமான டெலிவரி. இரண்டாவதாக, ஒரு இயந்திரத்திற்குப் பதிலாக ஒரு குறிப்பிட்ட மனிதர் அந்தப் பொருளுக்குப் பொறுப்பேற்கிறார்.

மூன்றாவதாக, மிகக்குறைந்த கட்டணம் மற்றும் சிக்கலான ஆவணங்கள் ஏதுமற்ற செயல்முறை. இத்தகைய காரணங்களால், பல தலைமுறைகளாக ஒரே அங்கடியா குடும்பங்களுடன் வியாபாரிகள் வணிகத் தொடர்பைப் பேணி வருகின்றனர்.

பலருக்கு 'அங்கடியா' முறையானது சட்டவிரோதமான 'ஹவாலா' பரிமாற்றத்தோடு தொடர்புடையதாக இருக்கலாம் என்ற சந்தேகம் உண்டு. ஆனால் உண்மையில், இவை இரண்டும் முற்றிலும் வேறுபட்டவை. அங்கடியா என்பது சட்டப்பூர்வமாகப் பொருட்களை ஒரு இடத்திலிருந்து மற்றொரு இடத்திற்கு நேரடியாகக் கொண்டு செல்லும் ஒரு போக்குவரத்துச் சேவை ஆகும். ஆனால், ஹவாலா என்பது பணத்தை நேரில் நகர்த்தாமல் காகித வடிவில் கணக்குகளை மட்டும் சரிசெய்யும் முறை. எனவே, அங்கடியா முறை இந்தியச் சட்டங்களுக்கு உட்பட்டு வெளிப்படையாகச் செயல்படுகிறது.

இந்தத் துறை இப்போது அரசாங்கத்தின் தீவிர கண்காணிப்பில் உள்ளது. கோடிக்கணக்கான ரூபாய் மதிப்புள்ள பொருட்கள் கையாள்வதால், வரி ஏய்ப்பு மற்றும் கடத்தலைத் தடுக்க அதிகாரிகளும் அவ்வப்போது ஆய்வுகளை மேற்கொள்கின்றனர்.

யுபிஐ புரட்சி இந்தியாவை ஒரு பணமில்லாப் பொருளாதாரமாக மாற்றி வரும் வேளையிலும், மும்பையின் வைர வர்த்தகர்கள் ஒரு 10 ரூபாய் நோட்டின் மூலம் கோடிக்கணக்கான மதிப்பிலான வர்த்தகத்தை மேற்கொள்வது, மனித உறவுகள் மற்றும் நம்பிக்கையின் வலிமையைக் காட்டுகிறது. தொழில்நுட்பம் எவ்வளவு வளர்ந்தாலும், மனித நம்பிக்கை என்பது எந்திரங்களை விட சக்தி வாய்ந்ததாகவே நீடிக்கிறது என்பதை இந்த அங்கடியா முறை நமக்கு உணர்த்துகிறது.