'ஸ்ட்ரெஸ்' (Stress) தான் பிசினஸ்: பெண்களின் மன அழுத்தத்தை வைத்து கல்லா கட்டும் நிறுவனங்கள்!

சமூகம் எப்போதுமே பெண்களை ஒரு குறிப்பிட்ட அளவுகோலுக்குள் அடைத்து வைக்கவே அதிக ஆர்வம் காட்டுகிறது. அவர்கள் எப்படி இருக்கவேண்டும், எப்படி ஆடை அணியவேண்டும் என்பது போன்ற பல எழுதப்படாத விதிகளை கார்ப்பரேட் நிறுவனங்கள் தங்களின் அதீத லாபத்திற்காக மிகவும் தந்திரமாகப் பயன்படுத்துகின்றன. 

பெண்கள் தங்களின் தோற்றம் குறித்து இயல்பாகக் கொள்ளும் சிறு சிறு கவலைகளை மிகப்பெரிய வியாபாரமாக மாற்றி பல தொழில்கள் இன்று கோடிக்கணக்கில் பணம் சம்பாதிக்கின்றன. ஒருவரின் தன்னம்பிக்கையை உடைத்து அதையே தங்களின் பிசினஸ் மாடலாக மாற்றும் அந்த மாய வலைகளைப் பற்றி இப்போது பார்ப்போம்.

அழகை அளவிடும் ஆபத்தான வியாபாரம்!

முதலில் நிறத்தை வைத்து நடக்கும் வியாபாரம் மிக மிக மோசமானது. மாநிறமாகவோ அல்லது கருப்பாகவோ இருப்பது ஏதோ ஒரு குறை என்பது போலவும், வெள்ளையாக இருப்பவர்கள் மட்டுமே அழகானவர்கள் என்ற ஒரு போலியான பிம்பத்தையும் விளம்பரங்கள் வாயிலாக நம் மனதிற்குள் ஆழமாக விதைக்கிறார்கள்.

அதேபோலத்தான் உடல் எடையைக் குறைக்கும் மையங்களும் செயல்படுகின்றன. ஒல்லியான உடலமைப்பு தான் சிறந்தது என மூளைச்சலவை செய்து, எக்கச்சக்கமான கட்டணங்களை வசூலிக்கும் ஸ்லிம்மிங் சென்டர்கள் நாளுக்கு நாள் பெருகி வருகின்றன. 

இதையெல்லாம் தாண்டி, வயதாவது ஏதோ ஒரு பெரிய பாவம் என்பதுபோல ஒரு மாயையை ஏற்படுத்தி, முகச்சுருக்கங்களை மறைக்கிறோம் என பல ரசாயனங்கள் கலந்த பொருட்களை பல ஆயிரங்களுக்கு விற்கிறார்கள். இயற்கையான முதுமையை கூட இந்த சமூகம் நிம்மதியாக அனுமதிக்க மறுக்கிறது என்பதுதான் நிதர்சனமான உண்மை.

செயற்கை தோற்றம், பகட்டான வாழ்க்கை!

இன்னும் சில நிறுவனங்கள் ஒரு படி மேலே போய், உங்களின் மூக்கு வடிவம் சரியில்லை, உதடு அழகாக இல்லை என குறைகூறி பிளாஸ்டிக் சர்ஜரி செய்யத் தூண்டுகின்றன. இதற்காக லட்சக்கணக்கில் பணத்தை செலவழித்து தங்கள் உடலையே அறுவை சிகிச்சை மூலம் வருத்திக்கொள்ளும் பெண்களும் ஏராளமாக இருக்கிறார்கள்.

அதுமட்டுமில்லாமல், பளபளப்பான சருமம் வேண்டும் என தினமும் பத்து விதமான கிரீம்களையும் சீரம்களையும் முகத்தில் பூசும் பழக்கம் இப்போது ஒரு ஃபேஷனாகவே மாறிவிட்டது. தேவையற்ற இந்த கெமிக்கல்கள் நீண்ட கால அடிப்படையில் சருமத்தை கடுமையாகப் பாதிக்கும் என்பதைப் பலரும் உணர்வதில்லை. 

நிஜ உலகில்தான் இந்த தொல்லை என்றால், சோஷியல் மீடியாக்களில் தங்களின் உண்மையான முகத்தை மறைத்து, விதவிதமான ஃபில்டர்களை பயன்படுத்தி போலியான தோற்றத்திற்கு அடிமையாக்கும் ஆப்ஸ்களும் இந்த கார்ப்பரேட் வியாபாரத்தின் ஒரு முக்கிய பகுதிதான்.

இதோடு ஆடம்பரப் பொருட்களின் மோகமும் பெண்களைப் பெரும் அளவில் அச்சுறுத்துகிறது. கழுத்து நிறைய விலையுயர்ந்த நகைகள் போட்டால் மட்டுமே சமூகத்தில் ஒரு பெரிய மதிப்பும் அந்தஸ்தும் கிடைக்கும் என்ற பொய்க் கௌரவத்தை மிக எளிதாக உருவாக்கு கிறார்கள். அதோடு, பார்ப்பதற்கு ஸ்டைலாக இருக்கிறது என்பதற்காக, கால்களுக்குக் கடுமையான வலியைக் கொடுக்கும் மிக உயரமான செருப்புகளை அணிவதைக் கூட ஒரு ட்ரெண்டாக மாற்றிவிட்டார்கள்.

இந்த மாய வலையில் இருந்து பெண்கள் முழுமையாக விடுபடுவது இன்றைய காலகட்டத்திற்கு மிக மிக அவசியம். அடுத்தவர்கள் நம்மை எப்படிப் பார்க்கிறார்கள் என்பதை விட, நாம் நம்மை எப்படி நேசிக்கிறோம் என்பதுதான் உண்மையான அழகு.