கொஞ்சம் சிரிங்க பாஸ்

வாசகர் ஜோக்ஸ்

ஓவியம்: ரஜினி

"கூண்டில் ஏறியதும் தலைவர் சோடா கேட்டாராமே?"

"பொதுக்கூட்ட மேடையில் ஏறிய நினைப்பில் கேட்டுவிட்டாராம்."

– சி.ஸ்ரீரங்கம், திருவெறும்பூர்

அப்பா: "ஸ்கூல் போனியோ டீச்சர்கிட்ட என்ன கேட்டே?"

பையன்: "அடுத்த லாக்டவுன் எப்ப டீச்சர்னு கேட்டேன்."

– பி.பாலாஜி கணேஷ், சிதம்பரம்

"மன்னர் ஏன் மிகவும் கலக்கமாக உள்ளார்?"

"அவர் போர்க்களத்திலிருந்து ஓடிவந்ததைப் படம் எடுத்து யாரோ ஓ.டி.டி.யில் வெளியிடப் போவதாகக் கூறினார்களாம்."

– வெ.பாலாஜி, சென்னை

"மாப்பிள்ளை பையன், பொண்ணுக்குப் பக்கத்துல உட்கார்ந்திருந்த தோழி கழுத்துல தாலி கட்டிட்டானாமே?"

"பெண்ணைவிட தோழி நிறைய நகையும் மேக்-அப்பும் போட்டிருந்ததால பையன்  ஜெர்க் ஆயிட்டானாம்."

– விரேவதி, தஞ்சை

"என்ன சார், அந்த ஆபிசு  பத்திகிட்டு எரியுதுன்னு சொல்றாங்க?"

"அதுவா… அங்க உள்ளவங்க  'தீயா' வேலை  செய்கிறார்களாம்!"

– ஆர். சுந்தரராஜன், சிதம்பரம்

"பளுதூக்கும் போட்டிக்கு நம் நாட்டின் சார்பில் யாரை அனுப்பிவைக்கப் போகிறார்கள் மந்திரியாரே?"

"என்ன சேடிப்பெண்ணே, இப்படிக் கேட்டுவிட்டாய்… மகாராணியார் பல்லக்குத் தூக்கிகளை அனுப்பி வைத்தால் பதக்கம் நிச்சயம்!"

– சு.அருண்பிரகாஷ், குமாரகிரி