சென்னை பட்டினத்தின் கதை!

வந்தாரை வாழ வைக்கும் சென்னை மாநகரம் தனது 384வது பிறந்தநாளை கொண்டாடிக்கொண்டிருக்கிறது. வரலாற்று ஆய்வாளர் முத்தையா, பதிப்பாளர் வின்சென்ட் டி சோஸா உள்பட சென்னை வரலாறு குறித்து ஆர்வமிக்கவர்கள் பலர் இணைந்து 2004ல் முதன்முதலாக சென்னை நகரத்தின் பழமையைக் கொண்டாடவேண்டும், அதன் முக்கியத்துவத்தை வெளிப்படுத்த வேண்டும் என்ற நோக்கத்தில் 'மெட்ராஸ் டே' நிகழ்ச்சியைத் தொடங்கினர்.

இதன் காரணமாக சென்னை நகரத்தின் பிறந்தநாள் என்று ஒரு நாளை குறிப்பிட வேண்டும் என்று எண்ணிய 'மெட்ராஸ் டே' குழுவினர், தற்போது புனித ஜார்ஜ் கோட்டை அமைந்துள்ள இடத்தின் ஒரு சிறுபகுதியை, அன்றைய விஜயநகர நாயக்கர்களின் வழிவந்த அய்யப்பன் நாயக்கர், வேங்கடப்பன் நாயக்கர் ஆகியோரிடமிருந்து 1639ம் ஆண்டு ஆகஸ்ட் 22ம் தேதி ஆங்கிலேயேர்களின் கிழக்கிந்திய கம்பெனியைச் சேர்ந்த பிரான்சிஸ் டே, ஆண்ட்ரூ கோகன் ஆகியோர் முறைப்படி வாங்கியதாகக் கூறப்படும் அந்நாளைச் சென்னை தினமாக அனுசரிக்கலாம் என்று முடிவு செய்யப்பட்டது.

384வது பிறந்தநாள் கொண்டாடும் சென்னை

இந்த பின்னணியில் சென்னை மாநகரம் தன்னுடைய 384வது பிறந்தநாளை இன்று கொண்டாடுகிறது. இந்நாளில் பல தன்னார்வ தொண்டு நிறுவனங்கள் சார்பில் சென்னையில் உள்ள வரலாற்றுச் சிறப்புமிக்க இடங்களான செயின்ட் ஜார்ஜ் கோட்டை, ரிப்பன் மாளிகை, சென்னை உயர் நீதிமன்றம், பாரிஸ் கார்னர், வடசென்னையில் உள்ள BINNY MILLS, ஜமாலியா, வண்ணாரப்பேட்டை, மைலாப்பூர் தெப்பக்குளம், திருவல்லிக்கேணி, கூவம் ஆற்றங்கரை, நேப்பியர் பாலம், கன்னிமாரா நூலகம், சென்னை பல்கலைக்கழகம் என பல பகுதிகளுக்கு பயணங்களுக்கு ஏற்பாடுகள் செய்யப்படுகின்றன இதுமட்டுமல்லாது சென்னை நகரத்தின் தொன்மை குறித்த கருத்தரங்கங்கள், புகைப்பட கண்காட்சிகள், மாணவர்களுக்கான போட்டிகள் என பல நிகழ்வுகள் நடத்தப்படுகின்றன.

தமிழ்நாட்டின் தலைநகரான சென்னை நகரத்தின் பிறந்த நாளான ஆகஸ்ட் 22ம் நாளில் மட்டும் நகரமே விழாக் கோலம் பூண்டு காணப்படும். அன்றைய தினத்தில் சென்னையின் பூர்வ குடிகளான மீனவர்கள், ஒடுக்கப்பட்ட மற்றும் பிற்படுத்தப்பட்ட மக்கள் முதல், வேலை நிமித்தமாகப் புலம்பெயர் தொழிலாளர்களாகச் சென்னைக்கு வந்தவர்கள் என இந்நகரத்தை தங்களின் தாய்வீடாக மாற்றிக்கொண்ட மக்கள் சாதி, மதம், இனம் மற்றும் மொழி கடந்து கொண்டாடும் மாபெரும் விழாவாக இன்றைக்கு சென்னை தினம் மாறியுள்ளது.

மனித சமூகத்தின் நாகரிக வளர்ச்சியைப் பற்றி ஆராய்ச்சி செய்யும் மானுடவியலாளர்களும் தொல்லியல் அறிஞர்களும், மனித சமூக வளர்ச்சி நதிக்கரை நாகரிகத்தில் தொடங்கியது என்கிறார்கள். அப்படி இந்தியாவில் நதிகரை நாகரிகங்களாக குறிப்பிடப்படுவது வைகை நதிநாகரிகம், பொருநை நதிநாகரிகம் மற்றும் சிந்து சமவெளி நாகரிகங்கள் முக்கியமானதாகும். இந்த வரலாற்று பின்புலங்களுடன் பார்க்கும்போது நன்னீர் ஆறுகளும், கடலும் அமையப்பெற்ற தென்னிந்தியாவின் வாசல் என்றழைக்கப்படும் சென்னை நகரத்திற்கு நீண்டதொரு வரலாற்று பின்புலம் உள்ளது.

சென்னை என எப்படி பெயர் வந்தது!

சென்னை நகரத்தின் வரலாற்று சுவடுகளுக்குள் செல்வதற்கு முன்பு தற்போது சென்னை என்றழைக்கப்படும் இந்நகரத்திற்கான பெயர் வந்த காரணத்தை அறிந்துக்கொள்வது அவசியமாகும். 1639-ல் கிழக்கிந்திய கம்பெனியைச் சேர்ந்த பிரான்சிஸ் டே, ஆண்ட்ரூ கோகன் ஆகியோர் செயின்ட் ஜார்ஜ் கோட்டை அமைந்துள்ள இடத்தை வாங்கினார்கள். அந்த இடத்தை விற்ற அய்யப்பன் நாயக்கர், வேங்கடப்பன் ஆகியோரின் தந்தை சென்னப்ப நாயக்கர் நினைவாக, கோட்டைக்கு வடக்கே உள்ள ஊர் சென்னப்பட்டினம் என்று பெயரிடப்பட்டதாக கூறப்படுகிறது.

அதேபோல் தமேரல்லா சென்னப்ப முத்திரிய நாயக்கரின் நிலங்கள் அவரின் பெயரில் முதிராசப்பட்டின என அழைக்கப்பட்டு வந்தது. பின்னர் 16ம் நூற்றாண்டில் சென்னை பகுதிக்கு வந்த போர்த்துகீசியர்கள் அவரிடமிருந்து நிலத்தை வாங்கி 1522ல் சாந்தோம் பகுதியில் துறைமுகத்தை நிறுவினார்கள். அப்போது அவர்கள் இந்நகரத்திற்கு முதிராப்பட்டினம் என பெயர் வைத்தார். பின்னாளில் முதிராசப்பட்டினம் எனும் இந்த பெயர் காலப்போக்கில் மருவி மாதராசபட்டினம் என அழைக்கப்பட்டதாக கூறப்படுகிறது.

அதன் பின்னர் 1688ல் இரண்டாம் ஜேம்ஸ் மன்னர் மதராஸ் நகரை முதல் நகரசபையாக அறிவித்தார். இதன் மூலம் இந்தியாவின் முதல் நகராட்சி என்ற பெருமையை மதராஸ் பெற்றது. ராபர்ட் கிளைவ் தனது ராணுவத் தளமாக மதராஸைத் தேர்ந்தெடுத்தபோது பிரிட்டிஷ் அரசின் இந்தியக் காலனி பகுதியில் இருந்த பம்பாய் மாகாணம், கொல்கத்தா மாகாணம், பர்மா மாகாணம் மற்றும் மதராஸ் மாகாணம் என நான்கு மாகாணங்களில் மதராஸ் மாகாணம் முக்கியமானதொரு மாகாணமாக இருந்தது.

1746ல் செயின்ட் ஜார்ஜ் கோட்டையையும் மதராஸ் மாகாணத்தையும் பிரெஞ்சு அரசு கைப்பற்றியது. மீண்டும் 1749ல் மதராஸை ஆங்கிலேயர் கைப்பற்றினர். அதனை அடுத்து திருவல்லிக்கேணி, புரசைவாக்கம், எழும்பூர், சேத்துப்பட்டு ஆகிய கிராமங்கள் சென்னைப் பட்டினத்துடன் இணைக்கப்பட்டன. அதன் தொடர்ச்சியாக, இந்தியாவின் முக்கிய நகரங்கள் ரயில் மூலம் மதராஸ் மாகாணத்தில் இருந்த சென்னை பட்டினத்துடன் இணைக்கப்பட்டது. இப்படியாக ஐரோப்பியர்களின் வருகையால் பொருளாதாரத் தலைமைப் பீடமாக வளர்ந்தது மதராஸ்.