தலைக்கனம் உடைக்கும் சிறிய வாசல்: ஜப்பானிய தேநீர் கலையும் தியானமும்!

கலை என்பது மனித மனதை உன்னதப்படுத்துவது. இதற்கு மிகச்சிறந்த உதாரணம் ஜப்பானியர்களின் பாரம்பரிய தேநீர் சடங்கான ‘சானோயு’ (Chanoyu) அல்லது ‘சாதோ’ (Chado) ஆகும். ஜப்பானிய கலாசாரத்தில் தேநீர் அருந்துவது என்பது கலை, ஆன்மீகம், விருந்தோம்பல் மற்றும் தியானம் ஆகியவை ஒன்றிணைந்த ஒரு உன்னதமான சடங்காகும்.

பன்னிரண்டாம் நூற்றாண்டில் சீனாவிலிருந்து அறிமுகப்படுத்தப்பட்ட ‘மச்சா’ (Matcha) தேநீர், காலப்போக்கில் ஜப்பானிய சென் (Zen) பௌத்த தத்துவங்களுடன் இணைந்து இந்த உன்னத கலை வடிவமாக உருவெடுத்தது. மனிதர்களுக்குள் இருக்கும் அகந்தையை நீக்கி, இணக்கம், மரியாதை, தூய்மை மற்றும் மன அமைதி ஆகிய நான்கு முக்கிய தூண்களின் அடிப்படையில் இந்த சடங்கு  நடத்தப்படுவதை இந்த கட்டுரையில்  காண்போம்.

இச்சடங்கு நான்கு முக்கிய தூண்களின் அடிப்படையில் நடத்தப்படுகிறது.

வா (Wa): இணக்கம் (Harmony)

கெய் (Kei): மரியாதை (Respect)

செய் (Sei): தூய்மை (Purity)

ஜாகு (Jaku): அமைதி (Tranquility)

ஜப்பானிய தேநீர் சடங்கு (சானோயு) என்பது மிகவும் அமைதியான சூழலில், ஒவ்வொரு அசைவையும் கவனமாகச் செய்யும் ஒரு கலை வடிவமாகும். இச்சடங்கு பொதுவாக ‘சாஷித்சு’ (Chashitsu) எனப்படும் பாரம்பரிய தேநீர் அறையில், கீழ்க்கண்ட நிலைகளின்படி நடத்தப்படுகிறது:

தேநீர் சடங்கு நடைபெறும் முறைகள்:

1.விருந்தினர்களை வரவேற்பது மற்றும் தூய்மைப்படுத்துதல்: விருந்தினர்கள் ஒரு அழகான தோட்டம் வழியாக தேநீர் அறைக்கு வருவார்கள். அறைக்குள் நுழையும் முன், அங்கிருக்கும் ஒரு கல் தொட்டியில் உள்ள நீரால் தங்கள் கைகளையும் வாயையும் கழுவி, வெளி உலக அசுத்தங்களை நீக்கி தங்களைத் தூய்மைப்படுத்திக் கொள்வார்கள்.

2.அறைக்குள் நுழைதல் மற்றும் அமர்தல்: தேநீர் அறையின் கதவு மிகவும் சிறியதாக (தாழ்வாக) இருக்கும். விருந்தினர்கள் அனைவரும் தங்களின் தலைக்கனத்தைக் குறைத்து, பணிவோடு குனிந்துதான் உள்ளே நுழைய வேண்டும். உள்ளே நுழைந்ததும் ‘டாடாமி’ (Tatami) எனப்படும் வைக்கோல் பாயில் முழங்காலிட்டு அமர்வார்கள்.

3.உபகரணங்களைச் சுத்தம் செய்தல்: தேநீர் தயாரிப்பவர் (Host) விருந்தினர்கள் முன்னிலையிலேயே பட்டுத் துணியைப் பயன்படுத்தி தேநீர் கிண்ணம் (Chawan), மூங்கில் கரண்டி (Chashaku) மற்றும் மூங்கில் கலக்கி (Chasen) ஆகியவற்றை மிகுந்த கவனத்துடன் துடைத்துச் சுத்தம் செய்வார்.

4.தேநீர் தயாரித்தல்: சுத்தம் செய்த கிண்ணத்தில் பச்சை தேயிலைத் தூளை (Matcha) போட்டு, சூடான நீரை ஊற்றுவார். பின்னர்,   ‘சாசென்’ (Chasen) எனப்படும் மூங்கில் கலக்கியால் நுரை வரும் வரை தேநீரை மிக நேர்த்தியாகக் கலக்குவார்.

5.தேநீர் வழங்குதல் மற்றும் அருந்துதல்: தயாரான தேநீர் கிண்ணத்தை முதன்மை விருந்தினரிடம் வழங்குவார். தேநீரின் கசப்பைச் சமன் செய்ய, அதற்கு முன் ‘வகாஷி’ (Wagashi) என்ற பாரம்பரிய இனிப்பு வழங்கப்படும். விருந்தினர் கிண்ணத்தை வாங்கி, தயாரித்தவருக்கு மரியாதை செலுத்தும் விதமாக கிண்ணத்தை இரண்டு முறை கடிகாரச் சுற்றில் திருப்பி, பின்னர் தேநீரைப் பருகுவார்.

இந்தச் சடங்கின்போது தேநீர் அறைக்குள் அத்தியாவசியமற்ற பேச்சுகள் தவிர்க்கப்படும். பாத்திரங்கள் உரசும் சத்தம், கொதிக்கும் நீரின் ஓசை மற்றும் அமைதி மட்டுமே அந்த அறையை நிறைத்திருக்கும்.

அவசரமும் பரபரப்பும் நிறைந்த இன்றைய நவீன உலகில், ‘இக்கணம் மட்டுமே உண்மையானது’ (Ichigo Ichie) என்ற தத்துவத்தை இச்சடங்கு நமக்கு நினைவூட்டுகிறது. தேநீர் அறையின் சிறிய வாசல் மனிதனின் தலைக்கனத்தை உடைக்கிறது; அங்கு நிலவும் அமைதி மனதை ஒருமுகப்படுத்துகிறது.

பகிரப்படும் தேநீர் மனிதர் களிடையே பிணைப்பை ஏற்படுத்துகிறது. வெறும் ஒரு கிண்ணம் பச்சை தேநீருக்குள் ஒட்டுமொத்த பிரபஞ்சத்தின் அமைதியையும், மனித ஒழுக்கத்தையும் அடக்கி வைத்திருக்கும் ஜப்பானியர்களின் இந்தத் தேநீர் சடங்கு, கலாசார எல்லைகளைக் கடந்து உலகத்தாரால் வியந்து போற்றப்படும் ஒரு உன்னத வாழ்வியல் கலையாகத் திகழ்கிறது.