முடி உதிர்தல்: அழகோடு ஆரோக்கியத்தையும் காக்கும் விழிப்புணர்வு!

தலைமுடி என்பது ஒருவரது அழகோடு, ஆரோக்கியத் தையும் பிரதிபலிப்பதாக உள்ளது. ஆனால் இன்றைய காலகட்டத்தில் இளம் வயதினருக்கும் முடி கொட்டுதல், முடி உடைதல், சொரசொரப்பு, பளபளப்பின்மை போன்ற பல காரணங்கள் முடி வளர்ச்சியை பாதித்து, பிரச்னைகளை தந்துவிடுகிறது. இதனால் நாளடைவில் முடி உதிர்வது ஆரம்பித்து வழுக்கைக்கு வழிகோலுகிறது.

ஆண்களுக்கு உச்சந்தலை தொடங்கி இரண்டு பக்கமும் வழுக்கை ஏற்பட்டு இளவயதிலேயே முதிர்ந்த தோற்றத்தை தந்துவிடுகிறது.

முடி உதிர்தல் பிரச்னைகளை அலோபேசியா என்பர். இதனால் நாளடைவில் முடியின் அடர்த்தி குறைந்து மண்டை பகுதி தெரிய ஆரம்பிக்கும். இதில் ஆண்ட்ரோ ஜெனிடிக் அலோபேசியா, டிஃப்யூஸ்ட் பால்டிங் (வழுக்கை), என வகை உள்ளது.

இதில் ஆண்கள் என்றால் அவர்கள் முன் தலையில் வி வடிவத்தில் முடிகள் உதிர்ந்து அந்த பகுதியில் வழுக்கை ஏற்படும். அதனைத் தொடர்ந்து பின் மண்டையிலும் முடிகள் உதிர்ந்து மண்டையின் நடுப்பகுதியில் வழுக்கை ஏற்படும். இதே பிரச்னை பெண்களுக்கு வரும்போது அவர்களது வகிடு எடுக்கும் இடத்தில் ஆரம்பித்து அகண்டு போய் முன்பகுதி முழுவதும் சொட்டையாகிவிடும்.

டிஃப்யூஸ்ட் பால்டிங். என்பது முடிகள் கொட்டுவதால் முடி அடர்த்தி குறைந்து, மெல்லியதாக காட்சியளிக்கும். முடிஉதிர்வுக்கு முக்கிய காரணம் டெஸ்டோஸ்ட்ரோன் (testosterone) ஹார்மோன். இந்த ஹார்மோன் பெண்களின் உடலிலும், இருக்கும். இது முடி கொட்டுதல் பிரச்னைகளை மரபியலாக ஏற்படுத்தும்.

அதாவது இது முடி கால்களில் தங்கிவிடுவதால் முடியின் வேர்ப் பகுதியை பாதித்து முடி உதிர்தலை ஏற்படுத்தி விடுகிறது. ஹார்மோன் பாதிப்பு ஏற்பட முக்கிய காரணம் கருப்பை பிரச்னைகள், ஹைப்போ தைராய்ட், நீரிழிவு, மெட்டபாலிக் சின்ட்ரோம், வைரல் ஜுர பாதிப்பு, ஹைபர் டென்ஷன் என பல காரணங்கள் உள்ளன.

சமச்சீரற்ற உணவினாலும், துரிதஉணவுகள் போன்றவை உடலில் இன்சுலின் அளவினை அதிகரிக்கும். இவை டெஸ்டோஸ்ட்ரோனுடன் இணையும்போது முடி கொட்டுவது மேலும் அதிகரிக்கும்.

அனிமியா, சத்து குறைபாட்டாலும் முடி உதிரும். டயட்சரியான முறையில் இல்லாமல் இருந்தாலும் முடி கொட்டுதல் உண்டாகி நாளடைவில் வழுக்கை விழ ஆரம்பித்துவிடும்.

இழந்த முடியை பெற சரியான சிகிச்சை முறையை தேர்வு செய்ய வேண்டும். வழுக்கை அளவு அதிகமானால் அதற்கு PRP. (Platelet rich plasma) சிகிச்சை மேற்கொள்ளலாம். நம்முடைய ரத்தத்தை எடுத்து அதில் பிளேட் லெட்டை தனியே பிரித்தெடுத்து அதை வழுக்கை உள்ள பகுதியில் ஊசி மூலமாக செலுத்துவதன் மூலம் முடி மீண்டும் வளர ஆரம்பிக்கும்.

மாத்திரை, ஊசிகள் மட்டுமில்லாமல் ஊட்டச்சத்து மிக்க உணவுகள், மட்டன், சிக்கன், முட்டை, புரத உணவுகள் பச்சை கீரை காய்கறிகள் என ஹெல்தியாக உண்டுவர முடி உதிர்தல் கட்டுப்படும்.

சருமம், தலைமுடி, நகம் தொடர்பான அனைத்து பிரச்னைகளுக்கும் முறையான சிகிச்சை, உணவு முறைகள் எடுத்துக்கொண்டால் நல்ல பலன் கிடைக்கும்.