கவரிங் நகைகள் பல வருடம் உழைக்க இதை மட்டும் பண்ணுங்க.. நிறம் மங்கவே மங்காது!

இப்போதெல்லாம் தங்க நகைகளை விட பெண்களின் மிகப்பெரிய விருப்பமாக இருப்பது ஃபேஷன் ஜுவல்லரி தான். ஆடைக்கு தகுந்தபடி தினமும் விதவிதமாக மாற்றி அணிந்து கொள்ள இவை மிகவும் வசதியாக இருக்கின்றன. குறைந்த விலையில் அருமையான தோற்றத்தை கொடுக்கும் இந்த செயற்கை நகைகள், சில நாட்களிலேயே கருத்துப் போய் அதன் பொலிவை இழந்துவிடுவது பலருக்கும் ஒரு பெரிய கவலையாக இருக்கிறது. 

உங்களுக்கு பிடித்தமான நெக்லஸ் அல்லது கம்மல் நிறம் மாறிவிட்டால் அதை மீண்டும் அணிந்து செல்ல மனம் வராது. ஆனால், சில சின்னச் சின்ன விஷயங்களை சரியாகக் கடைப்பிடித்தால் இந்த நகைகளை பல வருடங்களுக்கு நிறம் மங்காமல் புத்தம் புதிதாகவே வைத்திருக்க முடியும். 

சரியான முறையில் சேமிக்கும் கலை!

செயற்கை நகைகள் தானே என்று அவற்றை மொத்தமாக ஒரு பிளாஸ்டிக் டப்பாவில் கொட்டி வைப்பது மிகப்பெரிய தவறாகும். இப்படி செய்வதால் நகைகள் ஒன்றோடு ஒன்று உரசிக் கொண்டு கீறல்கள் விழ அதிக வாய்ப்புள்ளது. உங்களின் ஜிமிக்கி, நெக்லஸ், ஒட்டியாணம் போன்ற ஒவ்வொரு நகையையும் தனித்தனி பெட்டிகளில் அல்லது பஞ்சு, வெல்வெட் துணிகளில் சுற்றி வைப்பது மிகவும் பாதுகாப்பானது. 

இப்படி பிரித்து வைப்பதன் மூலம் அவசரமாக கிளம்பும் நேரத்தில் நகைகள் சிக்கிக் கொள்ளாமல் எளிதாக எடுக்க முடியும். மேலும், அவசரமாக கிளம்பும் போது கூட நகைகளை ஜன்னல் ஓரம் அல்லது சூரிய ஒளி நேரடியாக படும் இடங்களில் கழற்றி வைக்க கூடாது. அதிகப்படியான வெயிலின் தாக்கம் நகையின் பளபளப்பை உடனடியாக குறைத்து அதனை டல்லாக மாற்றிவிடும் என்பதை நினைவில் கொள்ளுங்கள்.

ரசாயனங்கள் வேண்டாம்!

நாம் முகம் மற்றும் உடலுக்கு பயன்படுத்தும் லோஷன்கள், வாசனை திரவியங்கள் இந்த ஃபேஷன் நகைகளுக்கு மிகப் பெரிய எதிரியாகும். நீங்கள் மேக்கப் போட்டு, பெர்ஃபியூம் அடித்த பிறகுதான் நகைகளை அணிய வேண்டும். நேரடியாக நகைகளின் மீது இந்த ரசாயனங்கள் பட்டால் அது உடனே கருப்பாக மாறிவிடும். 

அதே போல, கடினமான வேலைகள் செய்யும் போதும், தூங்கும் போதும் இந்த நகைகளை அணிந்திருக்க கூடாது. நமது உடலில் இருந்து வெளியேறும் வியர்வை பட்டு நகையின் ஆயுள் மிக வேகமாக குறைந்துவிடும். எனவே வீட்டிற்கு வந்தவுடன் முதலில் நகைகளை கழற்றி வைத்து விடுவது ஒரு சிறந்த பழக்கமாகும்.

சுத்தம் செய்யும் முறை!

எல்லா நகைகளையும் தண்ணீரில் போட்டு பிரஷ் வைத்து தேய்த்து சுத்தம் செய்ய கூடாது. பித்தளை அல்லது செம்பு கலந்த உலோக நகைகளை ஒரு மென்மையான துணியில் சிறிதளவு எண்ணெய் தொட்டு லேசாக துடைத்து எடுக்க வேண்டும். இப்படி செய்வதால் அதிலிருக்கும் அழுக்குகள் நீங்கி மீண்டும் புதுப் பொலிவு கிடைக்கும். கற்கள் வைக்கப்பட்ட நகைகளை மட்டும் லேசான சோப்பு தண்ணீரில் நனைத்து மிகவும் மென்மையாக சுத்தம் செய்யலாம். 

எந்த ஒரு கடினமான ரசாயனத்தையும் சுத்தம் செய்ய பயன்படுத்தவே கூடாது. வெளியூர், பார்ட்டி, ஆபிஸ் சென்று விட்டு வீட்டிற்கு வந்ததும், நகையை கழற்றி ஒரு சுத்தமான மற்றும் மென்மையான காட்டன் துணியால் துடைத்து வைக்க வேண்டியது மிக மிக அவசியமான ஒரு செயலாகும். அதில் ஒட்டியிருக்கும் அழுக்குகளை உடனுக்குடன் நீக்குவது நல்லது.

ஒரே நகையை தினமும் அணிவதை விட, உங்களிடம் உள்ள நகைகளை தினமும் மாற்றி மாற்றி அணிவது உங்களின் தோற்றத்தை ட்ரெண்டியாக காட்டுவதோடு மட்டுமல்லாமல் நகையின் அதிகப்படியான தேய்மானத்தையும் வெகுவாக குறைக்கும். உங்களின் மனதிற்கு பிடித்த அழகிய ஃபேஷன் நகைகளை மேற்சொன்ன எளிய முறைகளை பின்பற்றி பத்திரமாக பாதுகாத்து வாருங்கள். 

இப்படி செய்வதன் மூலம் பல வருடங்கள் கடந்தாலும் உங்கள் நகைகள் கடையில் வாங்கிய முதல் நாள் போலவே எப்போதுமே பளபளப்பாக ஜொலிக்கும்.