ரெகுலர் கண்டிஷனர் Vs லீவ்-இன் கண்டிஷனர்: எது சிறந்தது?

முடியைப் பராமரிப்பதில் கண்டிஷனர்கள் முக்கிய பங்கு வகிக்கின்றன. ஆனால், கடைகளில் சாதாரண கண்டிஷனர் (Regular Conditioner) மற்றும் லீவ்-இன் கண்டிஷனர் (Leave-in Conditioner) என இரண்டு வகைகள் இருக்கின்றன. இந்த இரண்டுக்கும் உள்ள வேறுபாடு என்ன? உங்கள் முடிக்கு எது சிறந்தது? பார்ப்போம்...

சாதாரண கண்டிஷனர்

சாதாரண கண்டிஷனர் என்பது, ஷாம்பூ பயன்படுத்திய பிறகு பயன்படுத்தப்படும் ஒரு தயாரிப்பு. இது முடியின் ஈரப்பதத்தை தக்கவைத்து முடியை மென்மையாக்கும்.

பயன்படுத்தும் முறை:

ஷாம்பூ போட்டு அலசிய பிறகு, முடியில் (வேர்க்கால்களைத் தவிர்த்து) தடவி, 2 முதல் 5 நிமிடங்கள் வரை வைத்திருந்து, பின்னர் தண்ணீரால் முழுமையாகக் கழுவ வேண்டும். இதன் ஃபார்முலா அடர்த்தியாக இருக்கும் என்பதால், முடியில் அதிக நேரம் இருக்க வேண்டியதில்லை.

இது முடிக்கு உடனடியாக பளபளப்பையும், மென்மையையும் தருகிறது. மேலும், முடி சிக்கலாவதைத் தடுத்து, சீவுவதை எளிதாக்குகிறது. இது முடியின் வெளிப்புற அடுக்கான 'கியூட்டிகிள்' பகுதியை மூடி, ஊட்டச்சத்தைப் பூட்டுகிறது.

லீவ்-இன் கண்டிஷனர்

லீவ்-இன் கண்டிஷனர் என்பது, முடியில் தடவிய பிறகு கழுவத் தேவையில்லாத (leave-in) ஒரு தயாரிப்பு ஆகும். இது பொதுவாக ஒரு கிரீம், ஸ்ப்ரே அல்லது லோஷன் வடிவில் இருக்கும்.

பயன்படுத்தும் முறை: குளித்த பிறகு முடி ஈரமாக இருக்கும்போது பயன்படுத்த வேண்டும். இதைத் தடவிய பிறகு, முடியை வழக்கம் போல் ஸ்டைலிங் செய்யலாம். இது தினசரி பயன்படுத்த ஏற்றது.

இது முடிக்கு நீண்ட நேர ஈரப்பதத்தையும் (Moisture), பாதுகாப்பையும் அளிக்கிறது. சீரான ஈரப்பதம் காரணமாக, முடி வறண்டு போவதைத் தடுக்கிறது, பிளவுபட்ட முனைகளைக் (Split Ends) குறைக்கிறது. வெப்ப ஸ்டைலிங் கருவிகளால் ஏற்படும் சேதத்தில் இருந்தும் ஓரளவு காக்கிறது.

இது முடியில் ஒட்டாமல், நாள் முழுவதும் மென்மையையும் பாதுகாப்பையும் அளிக்கும். சுருள் முடி (Curly Hair) கொண்டவர்களுக்கும், மிக வறண்ட முடி (Dry Hair) கொண்டவர்களுக்கும் இது மிகவும் அவசியமானது.

• உங்கள் முடி ஆரோக்கியமாக இருக்க, வாரம் இருமுறை சாதாரண கண்டிஷனர் பயன்படுத்துவது அவசியம்.

• கூடுதலாக, உங்கள் முடி வறண்டு காணப்பட்டால் அல்லது ஸ்டைலிங் கருவிகளைப் பயன்படுத்தினால், லீவ்-இன் கண்டிஷனரை தினசரி பாதுகாப்பு கவசமாகப் பயன்படுத்தலாம்.

• முடி பராமரிப்பில், இந்த இரண்டு கண்டிஷனர்களும் வெவ்வேறு பணிகளைச் செய்கின்றன என்பதைப் புரிந்துகொண்டு, உங்கள் தேவைக்கேற்ப பயன்படுத்தினால், உங்கள் கூந்தலை பளபளப்பாகவும், ஆரோக்கியமாகவும் வைத்துக்கொள்ளலாம்.