பூமியின் சுற்றுச்சூழல் பாதுகாப்பிற்கு உறுதுணையாக விளங்கும் டரான்டுலாக்கள்!

டரான்டுலாக்கள் (Tarantulas) என்பவை மிகப்பெரிய சிலந்தி வகையை சேர்ந்தவை. பார்வைக்கு அச்சமூட்டும் இந்த சிலந்திகள் பூமியின் சுற்றுச்சூழல் பாதுகாப்பிற்கு உறுதுணையாக விளங்குகின்றன. அதனால்தான் அமெரிக்காவில் ஆகஸ்ட் 8ம் தேதியன்று டரான்டுலாக்கள் பாராட்டு தினத்தை கொண்டாடுகிறார்கள்.

உடல் அமைப்பு: டரான்டுலாக்கள் உலகின் மிகப்பெரிய சிலந்திகளில் ஒன்றாகும். இவற்றின் உடல் நீளம் 2.5 முதல் 10 சென்டி மீட்டர்கள் (1 முதல் 4 அங்குலம்) வரை இருக்கும். கால் இடைவெளிகள் 30 சென்டி மீட்டர்கள் (12 அங்குலம்) அல்லது அதற்கும் அதிகமாக இருக்கும். இவற்றின் உடலின் முன் பகுதியில் தலை மற்றும் மார்பு ஒன்றாக இணைக்கப்பட்டுள்ளன. உடலின் பின்பகுதியில் வயிறு உள்ளது. இது பெரும்பாலும் குமிழ் போன்ற வடிவத்தில் இருக்கிறது. டரான்டுலாக்களுக்கு 8 நீளமான கால்கள் உள்ளன. ஒவ்வொன்றும் முடியால் மூடப்பட்டிருக்கும். மேலும் இவற்றில் நகங்களும் உண்டு.

பாதுகாப்பு அரணாக விளங்கும் முடிகள்: இவற்றின் உடல்கள் மற்றும் கால்கள் மெல்லிய முடிகளால் மூடப்பட்டிருக்கும். அவை அதிர்வுகளை உணர்தல் மற்றும் பாதுகாப்பு வழிமுறைகளை வழங்குகின்றன. சிலசமயம் தங்களை வேட்டையாடுபவர்களை தாக்குவதற்கு இந்த முடிகள் உதவுகின்றன. இவற்றின் வயிற்றிலும் பிரத்தியேகமான முடிகள் உள்ளன. இந்த சிறுநீர்ப்பை முடிகள் தங்களை வேட்டையாடுபவர்களின் உடல் சருமப் பகுதியில் எரிச்சலையும், அரிப்பையும், அசௌகரியத்தையும் ஏற்படுத்தும்.

கோரைப்பற்கள்: இவற்றுக்கு விஷத்தை கக்கும் திறன் கொண்ட பெரிய சக்தி வாய்ந்த கோரைப்பற்கள் உள்ளன. இவற்றின் உதவியால் தங்கள் இரையைப் பிடித்து அடக்கிக்கொள்ள முடிகின்றது. தற்காப்புக்காகவும் தங்கள் கோரை பற்களை இவை பயன்படுத்துகின்றன.

கண்கள்: இவற்றுக்கு இரண்டு அல்லது மூன்று வரிசைகளில் எட்டு சிறிய கண்கள் உள்ளன. ஆனால், அவற்றின் பார்வை பொதுவாக மோசமாக உள்ளது. தங்கள் உணவை கண்டறிவதற்கும் சுற்றுச்சூழலில் பயணிப்பதற்கும் பார்வையை நம்பாமல் தொடு உணர்வு மற்றும் அதிர்வுகளைத்தான் அதிகம் இவை நம்பி உள்ளன.

வாழ்விடம்: இவை பொதுவாக வெப்பமண்டல மழைக்காடுகள், புல்வெளிகள், பாலைவனங்கள் மற்றும் புதர்க்காடுகள் உள்ளிட்ட பல்வேறு வாழ்விடங்களில் வசிக்கின்றன. முக்கியமாக, நிலப்பரப்புகளில் வாழ்கின்றன. சில மரத்தில் வாழ்கின்றன. சில டரான்டுலாக்கள் தரையில் துளைகளைத் தோண்டி அவற்றில் வசிக்கின்றன. இந்தத் துளைகள் வேட்டையாடுபவர்களிடமிருந்தும் கடுமையான சுற்றுச்சூழல் நிலைகளில் இருந்தும் தங்களைப் பாதுகாத்துக்கொள்ளும் தங்குமிடமாக இவை அமைகின்றன.

உணவு முறை: இவை மாமிச உண்ணிகள். பூச்சிகள் பல்லிகள், எலிகள் மற்றும் பறவைகள் போன்றவற்றை உண்ணுகின்றன. தங்கள் இரையைப் பிடிக்க திருட்டுத்தனமாக ஒரு இடத்தில் பதுங்கி இருந்து விரைவாக தாக்கி அவற்றை வேட்டையாடுகின்றன. இவற்றின் உடலில் இருக்கும் விஷம் இரையை அசையாமல் பாதுகாக்கவும் உதவுகிறது. இவற்றின் விஷம் மனிதர்களுக்கு ஆபத்தானது அல்ல என்றாலும், இவை கடித்தால் வலி, வீக்கம் மற்றும் எரிச்சல் ஏற்படும்.

அமெரிக்கர்கள் ஏன் டரான்டுலாக்கள் பாராட்டு தினம் கொண்டாடுகிறார்கள்?

பெரிய அளவு மற்றும் பயங்கரமான தோற்றம் இருந்தபோதிலும், டரான்டுலாக்கள் பல விலங்குகளுக்கு இரையாகின்றன. வெனிசுலா, கம்போடியாவில் மனிதர்கள் தங்கள்  உணவுக்காக டரான்டுலாவை கொல்கிறார்கள். பொதுவாக, இவை ஆக்ரோஷமானவை, ஆபத்தானவை என்பது போன்ற கட்டுக்கதைகள் மக்களிடையே பரவியுள்ளன. அந்தத் தவறான எண்ணங்களை அகற்றுவதும் இந்த உயிரினங்களுக்கு சிறந்த பாதுகாப்பு அளிப்பதை நோக்கமாகக் கொண்டும், இவை சுற்றுச்சூழலுக்கு மிகவும் முக்கியத்துவம் வாய்ந்தவை என்பது பற்றி மக்களுக்கு எடுத்துச் சொல்லவே இந்த நாளை அமெரிக்கர்கள் கொண்டாடுகிறார்கள். பூமியின் பல்லுயிர்ப் பெருக்கத்திற்கு மிகவும் உதவியாக இருப்பவை இந்த டரான்டுலாக்கள்.