அதிசய சுவையில் பூசணிக்காய் தயிர்க் குழம்பு: ரகசியம் இதோ!

மோர் குழம்பு, தயிர் குழம்பு என்றாலே பெரும்பாலும் அதில் மஞ்சள் தூள் சேர்த்து தாளித்துச் செய்வதே நம்முடைய வழக்கம். ஆனால்  வெள்ளை நிறத்தில் வெண்பூசணியை வைத்து சூப்பரான ஒரு தயிர் குழம்பு எப்படி செய்வது என்று பார்ப்போம்.

முதலில் 1/2 கிலோ வெண்பூசணியை தோல் சீவி சிறிய துண்டுகளாக வெட்டி ஒரு பாத்திரத்தில் போட்டு மூழ்கும் அளவிற்கு தண்ணீரை ஊற்றி, தேவையான அளவு உப்பு போட்டு, 2 பச்சை மிளகாய்களை கீறி இதனுடன் சேர்த்து பூசணிக்காயை கண்ணாடி பதத்திற்கு வேகவைத்து எடுத்துக்கொள்ளவும்.

ஒரு மிக்ஸியில்  தேங்காய் துருவல், பச்சை மிளகாய் - 3, இஞ்சி - சிறிய துண்டு, பூண்டு பல் - 3, சீரகம் - 1/2 ஸ்பூன் சேர்த்து கொஞ்சமாகத் தண்ணீர் ஊற்றி கொரகொரப்பாக அரைத்து எடுத்துக்கொள்ள வேண்டும்.

அடுப்பில் வாணலியை வைத்து 2 டேபிள் ஸ்பூன் எண்ணெய் ஊற்றி, கடுகு - 1/2 ஸ்பூன், சீரகம் - 1/2 ஸ்பூன், பொடியாக நறுக்கிய சின்ன வெங்காயம் – 10 , வர மிளகாய் - 3, கறிவேப்பிலை  சேர்த்து தாளிக்கவும். இதனுடன் வேக வைத்த வெண்பூசணியையும் தண்ணீரோடு ஊற்றி, பெருங்காயத்தூள் – 1/4 ஸ்பூன் சேர்த்து  இரண்டு நிமிடங்கள் நன்றாக கொதிக்கவிடவும்.

அடுப்பிலிருந்து இறக்கிய பிறகு  அரைத்து வைத்திருக்கும் தேங்காய் விழுதை ஊற்றி கலந்து நன்றாக ஆறவிடவும்.

சூடு முழுமையாக தணிந்தவுடன் 1/2 லிட்டர் அளவு புளிக்காத தயிரை கட்டிகள் இல்லாமல் அடித்து, வாணலியில் சேர்த்து தேவையான அளவு உப்பு போட்டு கலந்து 15 நிமிடங்கள் கழித்து பரிமாறவும்.

வெள்ளை வெளேர் நிறத்தில் வித்தியாசமான வெண்பூசணி தயிர்க்குழம்பு இவ்வளவு சுவையா என வியந்து போவீர்கள்.

பின்குறிப்பு:

*நன்கு புளித்த தயிரை இதற்கு பயன்படுத்தக்கூடாது.

*உப்பைக் கட்டாயமாக கடைசியில்தான் சேர்க்க வேண்டும்.

*அடுப்பை அணைத்துவிட்டுதான் தேங்காய் விழுதை வாணலியில் இருக்கும் காயோடு சேர்க்க வேண்டும். இல்லையென்றால் தேங்காய் திரிந்துவிடும்.

-இரவிசிவன்