அனைவருக்குமான கண் பராமரிப்புக் குறிப்புகள்!

நமது கண்கள் நமது உடல் ஆரோக்கியத்தின் மிக முக்கியமான பகுதியாக விளங்குகிறது . பெரும்பாலான மக்கள் தங்களைச் சுற்றியுள்ள உலகத்தைப் பார்க்கவும் உணரவும் தங்கள் கண்களை நம்பியிருக்கிறார்கள். ஆனால் சில கண் நோய்கள் பார்வை இழப்புக்கு வழிவகுக்கும், எனவே கண் நோய்களை முன்கூட்டியே கண்டறிந்து சிகிச்சையளிப்பது அவசியம். உங்கள் உடல்நலப் பாதுகாப்பு வழங்குநர் பரிந்துரைக்கும்போது அல்லது உங்களுக்கு ஏதேனும் புதிய பார்வைக் குறைபாடுகள் இருந்தால், உங்கள் கண்களை அடிக்கடி பரிசோதிக்க வேண்டும். மேலும் உடலை ஆரோக்கியமாக வைத்திருப்பது எவ்வளவு முக்கியமோ, அதே போல கண்களையும் ஆரோக்கியமாக வைத்துக் கொள்ள வேண்டும்.

கண் பராமரிப்பு குறிப்புகள்...

உங்கள் கண்களை ஆரோக்கியமாக வைத்துக் கொள்ளவும், உங்களது சிறந்த பார்வைத் திறத்தை நீங்கள் உணர்கிறீர்கள் என்பதை உறுதிப்படுத்தவும் நீங்கள் செய்யக்கூடிய சில விஷயங்கள் உள்ளன:

ஆரோக்கியமான, சீரான உணவை உண்ணுங்கள்: உங்கள் உணவில் நிறைய பழங்கள் மற்றும் காய்கறிகள், குறிப்பாக ஆழமான மஞ்சள் மற்றும் பச்சைநிறத்து இலை காய்கறிகள் இருக்க வேண்டும். சால்மன், டியூனா மற்றும் ஹாலிபட் போன்ற ஒமேகா-3 கொழுப்பு அமிலங்கள் நிறைந்த மீன்களை அடிக்கடி உண்பதும் கூட உங்கள் கண்களுக்கு உதவும்.

ஆரோக்கியமான எடையை பராமரிக்கவும்: அதிக எடை அல்லது உடல் பருமன் இருப்பது நீரிழிவு நோயை உருவாக்கும் அபாயத்தை அதிகரிக்கிறது. நீரிழிவு இருந்தால், நீரிழிவு ரெட்டினோபதி அல்லது கிளௌகோமா ஏற்படும் அபாயம் அதிகம்.

வழக்கமான உடற்பயிற்சி செய்யுங்கள்: நீரிழிவு, உயர் இரத்த அழுத்தம் மற்றும் அதிக கொலஸ்ட்ரால் ஆகியவற்றைத் தடுக்க அல்லது கட்டுப்படுத்த உடற்பயிற்சி உதவும். இந்த நோய்கள் சில கண் அல்லது பார்வை பிரச்சனைகளுக்கு வழிவகுக்கும். எனவே நீங்கள் தொடர்ந்து உடற்பயிற்சி செய்தால், இந்த கண் மற்றும் பார்வை பிரச்சினைகள் வருவதற்கான ஆபத்தை குறைக்கலாம்.

சன்கிளாஸ் அணியுங்கள்: சூரிய ஒளி உங்கள் கண்களை சேதப்படுத்தும் மற்றும் கண்புரை மற்றும் வயது தொடர்பான மாகுலர் சிதைவு அபாயத்தை அதிகரிக்கும். எனவே அந்தப் பிரச்சனையைத் தவிர்க்க UV-A மற்றும் UV-B கதிர்வீச்சை 99 முதல் 100% வரை தடுக்கும் சன்கிளாஸைப் பயன்படுத்தி உங்கள் கண்களைப் பாதுகாக்கவும்.

பாதுகாப்பு கண் கவசங்களை அணியுங்கள்: கண்களில் காயங்கள் ஏற்படுவதைத் தடுக்கவும், சில விளையாட்டுகளை விளையாடும் போதும், தொழிற்சாலை வேலை மற்றும் கட்டுமானம் போன்ற வேலைகளில் பணிபுரியும் போது மற்றும் உங்கள் வீட்டில் பழுதுபார்ப்பு அல்லது திட்டங்களைச் செய்யும்போது உங்களுக்கு கண் பாதுகாப்பு தேவை.

புகைபிடிப்பதை தவிர்க்கவும்: புகைபிடித்தல் வயது தொடர்பான கண் நோய்களான மாகுலர் சிதைவு மற்றும் கண்புரை போன்றவற்றை உருவாக்கும் அபாயத்தை அதிகரிக்கிறது மற்றும் அது பார்வை நரம்பை சேதப்படுத்தும் என்றும் கண் மருத்துவர்கள் கூறுகிறார்கள். எனவே அந்தப் பழக்கத்தை தவிர்ப்பது நல்லது.

உங்கள் குடும்ப மருத்துவ வரலாற்றை அறிந்து கொள்ளுங்கள்: சில கண் நோய்கள் பரம்பரையாக வருவதால், உங்கள் குடும்பத்தில் யாருக்கேனும் அவை இருந்ததா என்பதைக் கண்டறிய வேண்டியது அவசியம். இது உங்களுக்கு கண் நோயை உருவாக்கும் அதிக ஆபத்தில் உள்ளதா என்பதை தீர்மானிக்க உதவும்.

உங்கள் மற்ற ஆபத்து காரணிகளை அறிந்து கொள்ளுங்கள்: உங்களுக்கு வயதாகும்போது, வயது தொடர்பான கண் நோய்கள் உண்டாகக் கூடிய ஆபத்துகள் அதிகம் உள்ளன. உங்களாது சில நடத்தைகள் மற்றும் நடவடிக்கைகளை மாற்றுவதன் மூலம் உங்கள் ஆபத்தை குறைக்க முடியும் என்பதால் ஆபத்து காரணிகளை நீங்கள் அறிந்து கொள்வது மிகவும் அவசியம்.

நீங்கள் லென்ஸ் அணிபவராக இருந்தால், கண் நோய்த்தொற்றுகளைத் தடுக்க நடவடிக்கை எடுக்கவும். உங்கள் காண்டாக்ட் லென்ஸ்கள் போடுவதற்கு அல்லது வெளியே எடுப்பதற்கு முன் உங்கள் கைகளை நன்கு கழுவுங்கள். அவற்றை எவ்வாறு சரியாக சுத்தம் செய்வது என்பதற்கான வழிமுறைகளைப் பின்பற்றவும், தேவைப்படும்போது அவற்றை மாற்றவும்.

உங்கள் கண்களுக்கு தேவையான ஓய்வு கொடுங்கள். அதிக நேரம் கம்ப்யூட்டரைப் பயன்படுத்தினால், கண்களை இமைக்க மறந்து, கண்கள் சோர்வடையும். கண் அழுத்தத்தைக் குறைக்க, அப்போதெல்லாம் 20-20-20 விதியை முயற்சிக்கவும்: ஒவ்வொரு 20 நிமிடங்களுக்கும், 20 வினாடிகளுக்கு உங்கள் முன் 20 அடி தூரத்தில் பார்க்கவும்.

மேற்கண்ட பாதுகாப்பு வழிமுறைகளை முறையாகப் பின்பற்றினால் கண் பார்வைக்குறைபாடு மற்றும் பிற கண் நோய் பிரச்சனைகளில் இருந்து நாம் விடுபடலாம்.