கோடையில் இத மட்டும் செய்யலைன்னா உங்க AC வெடிப்பது உறுதி… ஜாக்கிரதை!

கோடை வெயிலின் தாக்கம் அதிகரித்து வரும் நிலையில், ஏசி எனப்படும் குளிர்சாதனப் பெட்டி பல வீடுகளில் அத்தியாவசியமாகிவிட்டது. சுட்டெரிக்கும் வெயிலில் இருந்து தப்பிக்க ஏசி ஒரு சிறந்த தீர்வாக இருந்தாலும், அதைச் சரியாகப் பராமரிக்காவிட்டால் எதிர்பாராத விபத்துகள் ஏற்பட வாய்ப்புள்ளது. குறிப்பாக, ஏசி வெடிக்கும் அபாயம் குறித்துப் பலரும் அறிவதில்லை. இந்த அபாயத்தைத் தவிர்த்து, ஏசியைப் பாதுகாப்பாகப் பயன்படுத்துவது எப்படி என்பதைப் பார்ப்போம்.

ஏசி வெடிப்பதற்குப் பல காரணங்கள் இருக்கலாம். மின்சாரக் கோளாறுகள், குளிரூட்டும் வாயு கசிவுகள், அல்லது சிஸ்டத்தில் ஏற்படும் அதிகப்படியான அழுத்தம் போன்றவை முக்கியக் காரணங்களாகக் கூறப்படுகின்றன. இவை உயிருக்கும், உடைமைகளுக்கும் பெரும் சேதத்தை ஏற்படுத்தக்கூடும். எனவே, ஏசியைப் பாதுகாப்பாகப் பராமரிப்பது மிகவும் முக்கியம்.

ஏசி வாங்கும்போதே தரமான மற்றும் நம்பகமான பிராண்டைத் தேர்ந்தெடுப்பது அவசியம். விலை சற்று அதிகமாக இருந்தாலும், நீண்ட காலப் பயன்பாட்டிற்கும் பாதுகாப்பிற்கும் இதுவே சிறந்தது. ஏசியை நிறுவும்போது, தகுந்த பயிற்சி பெற்ற நிபுணர்களைக் கொண்டு நிறுவுவது முக்கியம். தவறான நிறுவல் குளிரூட்டும் வாயு கசிவுகளுக்கு வழிவகுத்து, வெடிப்பு அபாயத்தை அதிகரிக்கலாம்.

ஏசியின் செயல்திறனைப் பராமரிப்பதும், வெடிப்பு அபாயத்தைக் குறைப்பதும் ஒன்றோடொன்று தொடர்புடையவை. ஏசிக்கு வழக்கமான சர்வீஸ் செய்வது மிகவும் முக்கியம். ஏர் ஃபில்டர்களைக் குறைந்தபட்சம் 15 நாட்களுக்கு ஒருமுறை சுத்தம் செய்ய வேண்டும். ஃபில்டர்களில் தூசி அதிகமாகச் சேர்ந்தால், அது சிஸ்டத்தில் அழுத்தத்தை அதிகரித்து பிரச்சனைகளை உருவாக்கலாம். அவுட்டூர் யூனிட்டையும் அவ்வப்போது பரிசோதிப்பது நல்லது.

ஏசியில் இருந்து அசாதாரணமான சத்தம் கேட்டாலோ, மின்சார பில் திடீரென வழக்கத்திற்கு மாறாக அதிகரித்தாலோ, ஏசியில் கசிவு அல்லது வேறு ஏதேனும் பிரச்சனை இருக்கலாம் என்பதற்கான அறிகுறிகளாகும். இதுபோன்ற சமயங்களில் உடனடியாக ஏசியை அணைத்துவிட்டு, அங்கீகரிக்கப்பட்ட டெக்னீஷியனை அழைத்துச் சரிபார்க்க வேண்டும். ஏசியில் இருந்து புகை வந்தாலோ அல்லது தீப்பிடித்தாலோ, உடனடியாக மெயின் மின் இணைப்பைத் துண்டித்துவிட்டு, தீயணைப்புத் துறையைத் தொடர்புகொள்ள வேண்டும்.

ஏசி அதிக மின்சாரம் பயன்படுத்தும் சாதனம் என்பதால், மின் கோளாறுகள் வெடிப்புக்கு வழிவகுக்கலாம். எனவே, வோல்டேஜ் ஸ்டேபிலைசர் பயன்படுத்துவது நல்லது. மேலும், ஏசிக்குத் தனி மின் இணைப்பு வழங்குவது பாதுகாப்பானது. பல சாதனங்களை ஒரே சாக்கெட்டில் இணைப்பதைத் தவிர்க்கவும்.

வருடத்திற்கு இரண்டு முறை, அதாவது கோடைக்காலம் தொடங்குவதற்கு முன்பும், கோடைக்காலம் முடிந்த பின்பும் ஏசியை சர்வீஸ் செய்வது மிகவும் அவசியம். இதற்கு ஏசி பிராண்டின் அதிகாரப்பூர்வ சேவை மையத்தைத் தொடர்புகொள்வது சிறந்தது. சரியான பராமரிப்பு மற்றும் பாதுகாப்பு வழிமுறைகளைப் பின்பற்றுவதன் மூலம், ஏசி வெடிப்பு போன்ற பெரும் விபத்துக்களில் இருந்து நம்மைப் பாதுகாத்துக்கொள்ளலாம்.