மயக்கம் போடாதீங்க! இந்த வாட்ச் விலை 484 கோடியாம்! அப்படி என்ன இருக்கு இதுல?

பொதுவாக நாம் கைக்கடிகாரம் அணிவது நேரத்தைப் பார்ப்பதற்காகத்தான். நடுத்தர வர்க்கத்தினர் சில ஆயிரங்களில் வாட்ச் வாங்கினால், பணக்காரர்கள் சில லட்சங்களில் வாங்குவார்கள். ஆனால், ஒரு குட்டித் தீவையே விலைக்கு வாங்கும் அளவிற்கு ஒரு கைக்கடிகாரத்தின் விலை இருந்தால்?

உலகில் உள்ள சில கடிகாரங்கள் வெறும் நேரம் காட்டும் கருவிகள் அல்ல; அவை பொறியியல் அதிசயங்கள் மற்றும் வைரங்களால் இழைக்கப்பட்ட கலைப்படைப்புகள். உலகக் கோடீஸ்வரர்கள் மட்டுமே கனவு காணக்கூடிய, உலகின் மிக விலையுயர்ந்த கடிகாரங்களைப் பற்றித் தெரிந்துகொள்ளும்போது நிச்சயம் தலைசுற்றும்.

• இந்தப் பட்டியலில் உச்சத்தில் இருப்பது 'கிராஃப் டைமண்ட்ஸ் ஹாலுசினேஷன்' (Graff Diamonds Hallucination). இதன் விலை இந்திய மதிப்பில் சுமார் 484 கோடி ரூபாய் என்றால் நம்புங்கள். இதை ஒரு வாட்ச் என்று சொல்வதை விட, பிளாட்டினத்தில் செய்யப்பட்ட ஒரு வைரச் சிற்பம் என்றே சொல்லலாம். சுமார் 110 கேரட் எடையுள்ள பல வண்ண வைரற்கற்களைக் கொண்டு இது வடிவமைக்கப்பட்டுள்ளது. இதை உருவாக்குவதற்காகவே பல ஆண்டுகள் தீவிர ஆராய்ச்சி செய்திருக்கிறார்கள்.

• அடுத்ததாக நம்மை வியக்க வைப்பது 'படேக் பிலிப் கிராண்ட்மாஸ்டர் சைம்' (Patek Philippe Grandmaster Chime). இதன் விலை சுமார் 272 கோடி ரூபாய். இதில் அப்படி என்ன இருக்கிறது என்றால், இது முன்பக்கம் மற்றும் பின்பக்கம் என இரண்டு டயல்களைக் கொண்டுள்ளது. 20-க்கும் மேற்பட்ட சிக்கலான மெக்கானிக்கல் தொழில்நுட்பங்களை உள்ளடக்கிய இது, ஒரு பொறியியல் அற்புதம்.

• அதே நிறுவனத்தின் மற்றுமொரு தயாரிப்பான 'ஹென்றி கிரேவ்ஸ் சூப்பர் காம்ப்ளிகேஷன்' (Henry Graves Supercomplication) சுமார் 211 கோடி ரூபாய் மதிப்புடையது. ஒரு வங்கி அதிகாரிக்காகப் பிரத்யேகமாக உருவாக்கப்பட்ட இந்தக் கடிகாரம், 24 விதமான நுட்பமான செயல்பாடுகளைக் கொண்டது.

• வரலாற்றை விரும்புபவர்களுக்கு 'மேரி அன்டொய்னெட்' (Marie Antoinette) ஒரு கனவு. பிரெகுட் கிராண்டே நிறுவனத்தால் உருவாக்கப்பட்ட இதன் மதிப்பு 264 கோடி ரூபாய். ஆச்சரியமான விஷயம் என்னவென்றால், இந்த ஒற்றைக் கடிகாரத்தை முழுமையாகச் செய்து முடிக்க 40 ஆண்டுகள் ஆகியுள்ளது. வானியல் கணிதங்களைத் துல்லியமாகக் காட்டும் இதன் வடிவமைப்பு, அந்தக் காலத்து தொழில்நுட்பத்தின் உச்சம்.

• மிகச் சிறிய மெக்கானிசம் கொண்ட 'ஜேகர்-லெகோல்ட்ரே' (Jaeger-LeCoultre) கடிகாரம் சுமார் 228 கோடி ரூபாய் மதிப்புடையது. அதேபோல, 874 கேரட் வைரங்களால் இழைக்கப்பட்ட சோபார்ட் (Chopard) கடிகாரமும் 220 கோடி ரூபாய் மதிப்புடன் கண்களைப் பறிக்கிறது.

• ஹாலிவுட் நடிகர் பால் நியூமன் பயன்படுத்திய ரோலக்ஸ் (Rolex Paul Newman Daytona) கடிகாரம், சுமார் 155 கோடி ரூப்பாய்க்கு ஏலம் போனது. இது வைரங்களுக்காக அல்லாமல், அதன் வரலாற்றுப் பின்னணிக்காகவும், அந்த நடிகரின் பயன்பாட்டிற்காகவும் இவ்வளவு விலை போனது குறிப்பிடத்தக்கது.

மேலே பார்த்த கடிகாரங்கள் அனைத்தும் மனிதனின் கைவினைத் திறனுக்கும், பொறுமைக்கும், தொழில்நுட்ப அறிவுக்கும் சான்றாக விளங்குகின்றன. 100 ரூபாய் வாட்ச்சாக இருந்தாலும், 400 கோடி ரூபாய் வாட்ச்சாக இருந்தாலும் காட்டப்போவது என்னவோ ஒரே நேரத்தைத்தான். ஆனால், அந்தக் கலையை ரசிப்பதற்கும், அதைச் சேகரிப்பதற்கும் உலகில் ஒரு தனி கூட்டம் இருந்துகொண்டுதான் இருக்கிறது.