வீட்டின் அருகே நட்டக்கூடாத 6 மரங்கள்: அஸ்திவாரமே தகர்ந்துவிடும்!

வீடு கட்டுவது என்பது பலரின் வாழ்நாள் கனவு. ஆனால், வீட்டைச் சுற்றி நாம் ஆசையாக நட்டு வைக்கும் சில மரங்களின் வேர்கள், நாளடைவில் கட்டடத்தின் அடித்தளத்தையே (அஸ்திவாரம்) தகர்க்கும் வல்லமை கொண்டவை. ஆபத்தான மரங்கள் வேர்கள் நீரையும் ஊட்டச்சத்துக்களையும் தேடி நிலத்தடியில் வெகுதூரம் பரவும்போது, சுவர்கள் மற்றும் தரைகளில் விரிசல்கள் ஏற்படுகின்றன.

அஸ்திவாரத்தை பாதிக்கும் முக்கிய மரங்கள்:

அரச மரம் மற்றும் ஆல மரம்: இவை மிக வேகமாகவும் ஆழமாகவும் பரவக்கூடிய வேர்களைக் கொண்டவை. வீட்டின் அருகே இருந்தால், கட்டிடத்தின் சுவர்களையும் அடித்தளத்தையும் மிக எளிதில் பிளந்துவிடும்.

தூங்குமூஞ்சி மரம் (Rain Tree): இதன் வேர்கள் நிலத்தடிக்கு அடியில் கிடைமட்டமாக மிக நீளத்திற்குப் பரவி, தரையை மேலே தூக்கி நிறுத்தும் அளவுக்கு வலிமை வாய்ந்தவை.

யூகலிப்டஸ் (தைல மரம்): மண்ணில் உள்ள நீர்ச்சத்தை பெருமளவில் உறிஞ்சும். இதனால் நிலத்தடி மண் சுருங்கி, அஸ்திவாரம் நிலைகுலைய வாய்ப்புள்ளது.

மூங்கில்: மூங்கிலின் வேர்ப் பிணைப்புகள் (Rhizomes) மிகக் கடினமானவை. கான்கிரீட் தளங்களைக் கூட ஊடுருவிச் செல்லும் ஆற்றல் கொண்டவை.

வேப்ப மரம் மற்றும் புளியமரம்: இவற்றை வீட்டிற்கு மிக அருகில் நடும்போது, இவற்றின் தடிமனான வேர்கள் அஸ்திவாரத்திற்கு அடியில் அழுத்தத்தை உண்டாக்கும்.

பாதிப்புகள் எவ்வாறு ஏற்படுகின்றன?: மரங்களின் வேர்கள் அஸ்திவாரத்தை நேரடியாக உடைப்பதைவிட, மண்ணின் அமைப்பை மாற்றுவதாலேயே அதிக பாதிப்பு ஏற்படுகிறது. களிமண் போன்ற நிலங்களில் மரங்களின் வேர்கள் அதிக நீரை உறிஞ்சும்போது மண் சுருங்குகிறது (Soil Shrinkage). இதனால் அஸ்திவாரம் ஒருபுறமாக சாய்கிறது. மழைக்காலத்தில் மண் மீண்டும் உப்பும்போது விரிசல்கள் அதிகரிக்கின்றன. மேலும், குடிநீர் குழாய்கள் மற்றும் கழிவுநீர்க் குழாய்களில் உள்ள சிறிய கசிவுகளைத் தேடி வேர்கள் சென்று, குழாய்களை உடைத்து சேதப்படுத்துகின்றன.

அஸ்திவாரம் மற்றும் சுவர்களில் தோன்றும் விரிசல்களை கண்டறிவது;

படி வடிவ விரிசல்கள் (Step Cracks): செங்கற்கள் அல்லது பிளாக்குகளுக்கு இடையே “படிக்கட்டு” போன்ற அமைப்பில் மூலைகளிலோ அல்லது சுவர்களிலோ விரிசல் ஏற்படும்.

சாய்வு / கிடைமட்ட விரிசல்கள்: அஸ்திவாரப் பகுதிக்கு அருகில் பக்கவாட்டில் நீண்ட விரிசல்கள் தோன்றும்.

விரிசல் பெரிதாவது: மழைக்காலத்தில் விரிசல்கள் சுருங்குவதும், வெயில் காலத்தில் மண் வறண்டு வேர்கள் நீரை உறிஞ்சும்போது விரிசல்கள் அகலமாவதும் நடக்கும்.

தரைத்தளம் மற்றும் டைல்ஸ் சேதமடைதல்: வீட்டின் உட்புறத் தரை அல்லது வெளிப்புற நடைபாதையில் உள்ள டைல்ஸ் திடீரென மேல்நோக்கி எழும்புவது (Buckling) அல்லது பிளவுபடுவது. தரைச்சமநிலை மாறி, ஒரு குறிப்பிட்ட பகுதியில் மட்டும் பள்ளம் ஏற்படுவது.

கதவுகள் மற்றும் ஜன்னல்கள் அடைப்பதில் சிக்கல்: அஸ்திவாரம் ஒருபக்கமாக இறங்கும்போது அல்லது நகரும்போது நிலைகளிள் (Frames) வடிவம் லேசாக மாறும். இதனால் கதவுகள் மற்றும் ஜன்னல்களை வழக்கம்போல எளிதாக மூட முடியாமல் உராயும்.

குழாய்களில் அடைப்பு மற்றும் நீர் லீக்கேஜ்: கழிவுநீர்க் குழாய்கள் அல்லது குடிநீர்க் குழாய்கள் அடிக்கடி அடைத்துக்கொள்வது. மரத்தின் வேர்கள் குழாய்களுக்குள் ஊடுருவி வளர்வதால், நீர் ஓட்டம் தடைபடும் அல்லது குழாய்கள் உடைந்து வீட்டின் அடியில் நீர் கசியத் தொடங்கும்.

பாதுகாப்பு மற்றும் தடுப்பு முறைகள்;

பாதுகாப்பான இடைவெளி பெரிய மரங்களை வீட்டின் அஸ்திவாரத்தில் இருந்து குறைந்தபட்சம் 20 முதல் 30 அடிகள் தள்ளியே நடவேண்டும்.

மரம் நடப்படும்போதே கான்கிரீட் அல்லது பிளாஸ்டிக் தடுப்புகளை நிலத்தடியில் அமைத்து வேர்கள் பக்கவாட்டில் பரவுவதைத் தடுக்கலாம்.

வீட்டைச் சுற்றிப் பசுமையை உருவாக்குவது அவசியம்தான். ஆனால், வீட்டின் பாதுகாப்பைக் கருத்தில் கொண்டு சரியான மரங்களைத் தேர்ந்தெடுத்து, உரிய இடைவெளியில் நடுவதே புத்திசாலித்தனமாகும்.

வீட்டுத் தோட்டம் அமைக்கும் போது அழகோடு சேர்த்து பாதுகாப்பையும் உறுதிசெய்யும் தெளிவான வழிகாட்டுதல் கிடைக்கும். பெரிய மரங்களை எவ்வளவு இடைவெளியில் நட வேண்டும்,Root Barriers பயன்பாடு என்ன போன்ற தொழில்நுட்பத் தகவல்களை அறிவதன் மூலம் வீட்டின் மதிப்பையும் ஆயுளையும் தலைமுறை கடந்து பாதுகாக்க முடியும்.