காய்கறி மற்றும் பழங்களை நாம் மெல்லிய துண்டங்களாக நறுக்குவது வழக்கம். உளவியலில் மெல்லியத்துண்டு (Thin slicing) என்கிற ஒரு பதம் உபயோகப்படுத்தப்படுகிறது. இதனுடைய பொருள் மற்றும் செயல்பாடுகளைப் பற்றி இந்தப் பதிவில் பார்க்கலாம்.
ஒரு மனிதரை சந்தித்த சில வினாடிகளுக்குள் அவரைப் பற்றிய மிகக்குறைந்த தகவல்களை வைத்து அவரைப் பற்றிய துல்லியமான தீர்ப்புகளை வழங்கும் திறனே ‘மெல்லிய துண்டம்’ எனப்படுகிறது. அனுபவத்தின் ஒரு சிறிய பகுதியில் இருந்து விரைவான முடிவுகளை எடுக்கும் செயல்முறை இது. சில சமயங்களில் துல்லியமாக இருக்கும். அதேசமயம் எல்லா நேரங்களிலும் சரியான மதிப்பீடுகளை வழங்காது.
மெல்லிய துண்டம் எப்படிச் செயல்படுத்தப்படுகிறது?
பொதுவாக, ஒரு நபரையோ அல்லது பலரையோ பார்த்த மாத்திரத்தில் அவருடன் பேசாதபோதும் அவருடைய முக பாவங்கள், உடல் மொழி, குரல் தொனி, அவருடைய சூழல் இவற்றை வைத்து அவரைப் பற்றிய கணிப்பை, தீர்ப்பை ஒருவரால் வழங்க முடியும். ஏனென்றால், அவரைப்போல ஒரு நபரை அதேமாதிரி சூழ்நிலையில் அவர் சந்தித்திருக்கலாம். எனவே, தனது கடந்த கால அனுபவத்தின் விளைவால் அவர் புதிய நபரைப் பற்றிய தீர்ப்பு சொல்கிறார். இதுவே மெல்லிய துண்டம் (தின் ஸ்லைசிங்) என அழைக்கப்படுகிறது.
மெல்லிய ஸ்லைஸ் முறை என்பது பொதுவாக 5 நிமிடங்களுக்கும் குறைவான இடைவெளியில் ஒரு சிறிய தீர்ப்பை தருவது. நாம் தொடர்பு கொள்ளும் அல்லது சந்திக்கும் நபர்களின் உணர்ச்சிகள் மற்றும் அணுகுமுறைகளில் துல்லியமான முடிவுகளை எடுக்க முடியும். இந்த அவதானிப்புகள் பெரும்பாலும் பலருக்கு ஆச்சரியமாக, மதிக்கும் வகையில் துல்லியமாக இருக்கும்.
இந்த முறை ஆராய்ச்சி செய்யப்பட்டு அதன் துல்லியம் பற்றி பல்வேறு பகுதிகளில் நிரூபிக்கப்பட்டுள்ளது. இந்த சுய மதிப்பீடுகள் தொலைபேசி ஆப்பரேட்டரின் வேலை, செயல்திறன், ஆசிரியர் மதிப்பீடுகள், விற்பனையாளர்கள் மற்றும் மருத்துவ மாணவர்கள், நேர்காணல் செய்பவர்கள், வேலை விண்ணப்பதாரர்கள் மற்றும் மேற்பார்வையாளர்களுக்கு இடையேயான மதிப்பீடுகளுக்கு பொருத்தமாக இருக்கும்.
மெல்லிய துண்டம் முறையின் பயன்பாடுகள்: மெல்லிய துண்டம் முறை உடனடியாக தீர்ப்புகள் வழங்க அல்லது முடிவுகளை எடுக்க பகுப்பாய்வு செய்யப்படுகிறது. மனித மூளையால் விரைவாக முடிவுகளை எடுக்க முடிகிறது.
இந்த முறை மனித உள்ளுணர்வை பெரிதும் நம்பியுள்ளது. நாம் மிகவும் உற்று நோக்காவிட்டால் கூட நமது மனம் நுட்பமான குறிப்புகள் மற்றும் வடிவங்களை எடுக்கும் திறன் கொண்டது. அவற்றை அடிப்படையாக வைத்தே இந்த மெல்லிய துண்டம் முறை செயல்படுகிறது.
அவசரகால பதில்கள் அல்லது வேகமான வணிகச் சூழல்கள், விரைவான முடிவெடுக்க வேண்டிய முக்கியமான சூழ்நிலைகளில் இந்த மெல்லிய துண்டம் முறை மிகவும் பயனுள்ளதாக இருக்கிறது. ஒரு விரிவான பகுப்பாய்விற்கு காத்திருக்காமல் உடனடியாக செயல்பட அனுமதிக்கிறது.
இது ஒருவரின் அனுபவத்துடன் இணைந்து கைகோர்த்து செயல்படுவதால் மக்களின் திறன் மேம்படுகிறது. இந்த மெல்லிய துண்டங்களின் அடிப்படையில் தீர்ப்புகள் சில சமயம் துல்லியமாக இருக்கலாம். ஆனால், சரியான முடிவுகளுக்கு இவை உத்தரவாதம் அளிக்காது. ஏனென்றால், முடிவுகள் வரையறுக்கப்பட்ட தரவுகளுடன் எடுக்கப்படுகின்றன. ஆனால், உளவியல் வணிகம் மற்றும் பாதுகாப்பு செயல்பாடுகள் உட்பட பல்வேறு துறைகளில் விரைவான மற்றும் நம்பகமான முடிவு எடுப்பதற்கான ஒரு சக்தி வாய்ந்த முறை இது.