என் பூனை ஏன் என்னைக் கடிக்குது? ஒருவேளை நான் ரொம்ப டேஸ்ட்டா இருக்கேனா?

உங்கள் செல்லப் பூனை உங்கள் மடியில் படுத்து, இதமாக ‘குர் குர்’ என்று சத்தமிடுகிறது. நீங்கள் அன்பாக அதன் தலையை வருடிக் கொடுக்கிறீர்கள். எல்லாம் சரியாகப் போய்க்கொண்டிருக்கும் அந்தத் தருணத்தில், திடீரென உங்கள் கையைக் கடித்து விடுகிறது. உடனே உங்களுக்குள் ஆயிரம் கேள்விகள்: "நான் என்ன தவறு செய்தேன்? என் பூனைக்கு என்னைப் பிடிக்கவில்லையா? அது ஏன் இவ்வளவு கோபமாக இருக்கிறது?" 

இது பூனை வளர்க்கும் பலரும் சந்திக்கும் ஒரு பொதுவான அனுபவம். ஆனால் உண்மை என்னவென்றால், பூனைகளின் கடிக்கு பின்னால் எப்போதும் கோபம் மட்டுமே காரணமாக இருப்பதில்லை. அது அவற்றின் உணர்வுகளை வெளிப்படுத்தும் ஒரு வழி. அந்த ரகசிய மொழியைப் புரிந்துகொண்டால், நம் செல்லப் பிராணிகளுடன் இன்னும் ஆழமான ஒரு பந்தத்தை உருவாக்க முடியும்.

எல்லாக் கடிகளும் கோபத்தின் வெளிப்பாடு அல்ல. சில சமயங்களில், பூனைகள் மிகவும் மென்மையாக, தோலில் அழுந்தாதவாறு லேசாகக் கடிக்கும். இதை "செல்லக் கடி" (Love Bite) என்று அழைப்பார்கள். இது பூனைகளின் உலகில் ஒரு பாசத்தின் வெளிப்பாடு. தாய்ப்பூனைகள் தங்கள் குட்டிகளைச் சுத்தம் செய்யும்போதும், அவற்றுடன் விளையாடும்போதும் இப்படி லேசாகக் கடிக்கும். உங்கள் பூனை உங்களை அப்படி மென்மையாகக் கடிப்பதன் மூலம், "நீங்கள் எனக்கு மிகவும் முக்கியமானவர், என் குடும்பத்தில் ஒருவர்" என்று கூற முயற்சிக்கிறது. அதனால், அடுத்த முறை உங்கள் பூனை லேசாகக் கடித்தால், வலிக்காத பட்சத்தில் அதை அதன் அன்பு மொழியாக எடுத்துக்கொள்ளுங்கள்.

 நீங்கள் நீண்ட நேரம் உங்கள் பூனையைத் தடவிக் கொடுக்கும்போது, ஆரம்பத்தில் அது நன்றாக இருந்தாலும், ஒரு கட்டத்திற்கு மேல் அது பூனைக்கு எரிச்சலூட்ட ஆரம்பிக்கும். அதன் சருமம் மிகவும் உணர்திறன் கொண்டது. ஒரு நிலையில் இனிமையாக இருந்த வருடல், அடுத்த நிலையில் ஒருவித உறுத்தலாக மாறக்கூடும். 

இதைத் தெரிவிக்கவே, "போதும், இப்போது நிறுத்து" என்று சொல்வது போல சட்டெனக் கடிக்கும். இதற்கும் சில எச்சரிக்கை அறிகுறிகள் உண்டு. தடவும்போது அதன் வால் வேகமாக ஆடுவது, காதுகளைப் பின்னோக்கித் திருப்புவது, அல்லது அதன் தோல் லேசாகச் சிலிர்ப்பது போன்றவை, "நான் என் பொறுமையை இழந்து வருகிறேன்" என்பதற்கான சிக்னல்கள். இந்த அறிகுறிகளை கவனித்து, தடவுவதை நிறுத்திக்கொண்டால், கடியைத் தவிர்க்கலாம்.

பூனைக்குட்டிகள் மற்றும் இளம் பூனைகள் விளையாட்டாகக் கடிப்பதில் கில்லாடிகள். பூனைகள் இயல்பிலேயே வேட்டையாடும் குணம் கொண்டவை. அவை தங்கள் சகோதரர்களுடன் சண்டையிட்டு, கடிக்கும்போதுதான் வேட்டையாடும் திறனையும், ஒரு கடியின் வலிமையையும் கற்றுக்கொள்கின்றன. பல உரிமையாளர்கள் செய்யும் தவறு, தங்கள் கைகளையும் கால்களையும் வைத்து பூனைக்குட்டிகளுடன் விளையாடுவது. 

இதனால், மனிதர்களின் கைகள் கடிக்கக்கூடிய ஒரு விளையாட்டுப் பொருள்தான் என்று அவை கற்றுக்கொள்கின்றன. இந்தப் பழக்கத்தை மாற்ற, எப்போதும் ஒரு விளையாட்டுப் பொருளை வைத்து விளையாடுங்கள். இதன் மூலம், அதன் வேட்டையாடும் எண்ணத்தை விளையாட்டுப் பொருளின் மீது திருப்பி, உங்கள் கைகளைப் பாதுகாக்கலாம்.

மேற்கூறிய காரணங்கள் எதுவும் இல்லாமல், உங்கள் பூனை திடீரென உங்களைக் கடிக்க ஆரம்பித்தால், அதன் உடல்நலனில் ஏதேனும் பிரச்சினை இருக்கலாம். உடலின் ஏதேனும் ஒரு பகுதியில் வலி இருந்தால், நீங்கள் அந்த இடத்தில் தொடும்போது அது வலியின் காரணமாகத் தற்காப்பிற்காகக் கடிக்கக்கூடும். 

பொதுவாகச் சாதுவாக இருக்கும் பூனை ஆக்ரோஷமாக மாறினால், மருத்துவரிடம் அழைத்துச் செல்வது நல்லது. இது தவிர, பயம் அல்லது மன அழுத்தமும் கடிக்கத் தூண்டும். ஒரு புதிய நபர், உரத்த சத்தம், அல்லது வேறு ஏதேனும் அச்சுறுத்தலை உணரும்போது, தப்பிப்பதற்கு வேறு வழியில்லாத பட்சத்தில் பூனைகள் கடிக்க முற்படும்.