அதிசயங்கள் நிகழ்த்தும் 1,000 ஆண்டு பழமையான 4 அனுமன் கோவில்கள்!

பக்திக்கும், பலத்திற்கும், சொல்லின் செல்வருக்கும் இலக்கணமாகத் திகழ்பவர் அனுமன். இந்தியாவில் பல லட்சக்கணக்கான அனுமன் கோவில்கள் இருந்தாலும், சில குறிப்பிட்ட கோவில்கள் அவற்றின் பழமையாலும், அங்கு இன்றும் நிகழும் சில விளக்க முடியாத அதிசயங்களாலும் பக்தர்களை மெய்சிலிர்க்க வைக்கின்றன. இதோ அந்த 4 புனிதத் தலங்கள்:

ராமாயண காலத்துடன் தொடர்புடைய மிக முக்கியமான தலம் இது. இலங்கையை எரித்த பிறகு அனுமனின் உடலில் ஏற்பட்ட வெப்பத்தைத் தணிக்க, ஸ்ரீராமரே அம்பு எய்து இந்த நீர்வீழ்ச்சியை உருவாக்கியதாகக் கூறப்படுகிறது.

அதிசயம்: இக்கோவிலில் உள்ள அனுமன் சிலையின் தோள் பட்டையிலிருந்து எப்போதும் ஒரு மெல்லிய நீரோடை (தாரா) விழுந்து கொண்டே இருக்கிறது. அந்த நீர் அனுமனின் சிலைக்குத் திருமஞ்சனம் செய்வது போல் விழுந்து, ஒரு சிறிய குளத்தில் சேருகிறது. கடும் கோடையிலும் இந்த நீர் வற்றுவதில்லை என்பது ஒரு பெரிய அதிசயம். மன அமைதி தேடுபவர்களுக்கும், தீராத நோய்களால் அவதிப்படுபவர் களுக்கும் இந்தத் தீர்த்தம் ஒரு அருமருந்தாகக் கருதப்படுகிறது.

ராஜஸ்தான் மாநிலத்தில் உள்ள இந்தத் தலம் மிகவும் சக்தி வாய்ந்ததாகக் கருதப்படுகிறது. சுமார் 1,000 ஆண்டுகளுக்கு மேலான வரலாற்றைக்கொண்ட இந்தத் தலம், மற்ற கோவில்களைப் போலன்றி சற்று வித்தியாசமான வழிபாட்டு முறைகளைக் கொண்டது.

அதிசயம்: இங்குள்ள அனுமன் 'பாலாஜி' என்று அழைக்கப்படுகிறார். செய்வினை கோளாறுகள், தீயசக்திகளின் பாதிப்பு மற்றும் மனநல பாதிப்புகளால் அவதிப்படுபவர்கள் இங்கு வந்து வழிபடுகின்றனர். இக்கோவிலின் இடதுபுறத்தில் உள்ள ஒரு துவாரத்திலிருந்து எப்போதும் நீர் வடிந்து கொண்டே இருக்கும். இங்கு வரும் பக்தர்கள் அந்த நீரைத் தெளித்துக் கொள்வதன் மூலம் தங்கள் கர்ம வினைகள் நீங்குவதாக நம்புகின்றனர். இக்கோவிலில் வழங்கப்படும் பிரசாதத்தை வீட்டிற்கு எடுத்துச் செல்லக்கூடாது என்பது ஒரு ஐதீகம்.

குஜராத்தின் போடாட் மாவட்டத்தில் அமைந்துள்ள இக்கோவில் 'கஷ்டபஞ்சன் அனுமன்' (துன்பங்களை நீக்குபவர்) என்று அழைக்கப்படுகிறது. சுவாமி நாராயண் என்பவரால் சுமார் 150 ஆண்டுகளுக்கு முன் புனரமைக்கப்பட்டாலும், இதன் மூலவர் சிலை மிகப்பழமையானது.

அதிசயம்: இக்கோவிலில் அனுமன் தனது காலடியில் ஒரு பெண் உருவத்தை மிதித்தபடி காட்சியளிக்கிறார். அது சனி பகவானின் பெண் வடிவம் என்று கூறப்படுகிறது. ஜாதகத்தில் சனி தோஷம் உள்ளவர்கள் அல்லது ஏழரைச் சனியால் பாதிக்கப்படுபவர்கள் இங்கு வந்து வேண்டிக்கொண்டால், சனி பகவானின் தாக்கம் குறையும் என்பது ஐதீகம். அனுமனைத் தரிசித்தாலே தீய சக்திகள் விலகி ஓடும் என்பது இத்தலத்தின் பெரும் நம்பிக்கை.

சிம்லாவில் உள்ள ஜக்கு மலையில் அமைந்துள்ள இக்கோவில் கடல் மட்டத்திலிருந்து 8,000 அடி உயரத்தில் உள்ளது. லக்ஷ்மணன் மயக்கமுற்றபோது, சஞ்சீவி மூலிகையைத் தேடிச்சென்ற அனுமன், இந்த மலையில் தங்கி ஓய்வெடுத்ததாகப் புராணம் கூறுகிறது.

 அதிசயம்: அனுமன் இந்த மலையில் கால் பதித்தபோது, அவரது பாரம் தாங்காமல் மலை பாதியாக அமுங்கியதாகக் கூறப்படுகிறது. இங்கு இன்றும் அனுமனின் பாதச்சுவடுகள் வழிபடப்படுகின்றன. இக்கோவிலைச் சுற்றி ஆயிரக்கணக்கான குரங்குகள் வாழ்கின்றன. வியக்கத்தக்க விஷயம் என்னவென்றால், இந்தக் குரங்குகள் பக்தர்களுக்கு எந்தத் தொந்தரவும் தருவதில்லை; மாறாக பக்தர்களுடன் மிகவும் இணக்கமாகப் பழகுகின்றன. அனுமனே குரங்கு வடிவில் இங்கு உலா வருவதாகப் பக்தர்கள் நம்புகின்றனர்.

இந்த நான்கு தலங்களும் வெறும் வழிபாட்டுத் தலங்கள் மட்டுமல்ல, அவை இந்தியாவின் தொன்மையான ஆன்மீக வரலாற்றையும், அனுமனின் அளப்பரிய சக்தியையும் பறைசாற்றும் சான்றுகளாகத் திகழ்கின்றன. நம்பிக்கையோடு இந்தத் தலங்களுக்குச் செல்பவர்கள் இன்றும் பல அதிசயங்களை அனுபவித்து வருகின்றனர்.