திருப்பள்ளியெழுச்சி: 9 - துயில் நீங்கி எம் துயர் துடைக்க வாரும், ஈசனே!

விண்ணகத் தேவரும் நண்ணவும் மாட்டா விழுப்பொருளே உன் தொழும்பு அடியோங்கள்மண்ணகத்தே வந்து வாழச் செய்தோனே வண் திருப்பெருந்துறையாய் வழியடியோம்கண்ணகத்தே நின்று களிதரு தேனே, கடலமுதே, கரும்பே, விரும்பும் அடியார்எண்ணகத்தாய் உலகுக்கு உயிரானாய் எம்பெருமான் பள்ளி எழுந்தருளாயே.எம்பெருமானே, உம்மை யாரும் எளிதில் அறிந்துவிட முடியாது. அதனாலேயே யாராலும் உம்மை நெருங்கவும் முடியாது. தேவர்கள் முயற்சித்தும் அவர்கள் பார்வைக்கு எட்டாது விண்ணை விஞ்சியும், பூமி அடிக்கும் கீழே ஆழ்ந்தும் பிழம்பாய் வியாபித்திருக்கிறீர்களே, ஆனால் எளியவரான எம் போன்ற அடியவர்களுக்கு நாங்கள் தரிசிப்பதற்கு ஏதுவாய் பூமியில் வந்துதித்த பரம்பொருளே! உம்மை நாங்கள் இங்கிருக்கும் திருப்பெருந்துறையில் மட்டுமல்ல, எண்ணற்ற உம் திருக்கோயில்களிலும் கண்டு களித்து, எம் பக்தியை சமர்ப்பிக்கிறோம். சிவபக்தன் என்ற பாரம்பரியத்தில் வரும் அனைவருக்குமே அளப்பரிய அருள் புரியும் அண்ணலே, எங்கள் எண்ணம், சொல், செயல் எல்லாவற்றிலும் உம் திருநாமமே நிலைத்திருப்பதால் எங்களுக்கு மிகவும் இனிமையான தேன் போன்றவரே, பாற்கடலில் தோன்றிய அமுதத்துக்கு ஒப்பானவரே, அதோடு கூடவே விளைந்த விஷத்தை விருப்பத்துடன் உண்டு, அமிர்தத்தைப் பிறர் சுகிக்க அருளிய தயாபரனே, தன் அடியவர்களுக்காக இந்த வகையில் உம்மையே வருத்திக் கொண்ட பெருந்தகையே, சக்கையான உலகியல் துன்பங்களுக்கு இடையே நாங்கள் ருசிக்க இனிமையாய் ஊறும் கரும்புச் சாறே, உம்மை அணுகும் அடியவர்கள் யாராயினும் அவர்களுடைய எண்ணங்களில் பரிபூரணமாக நிறைந்திருப்பவரே, இந்த முழு உலகுக்கும் நீரன்றோ உயிராகி மிளிர்கிறீர்கள். நீர் அசைந்தால்தானே இந்த உலகே அசையும். நேரம், காலம் பாராது பரவும் உம் அருள் ஒளி சற்றே ஒதுங்கினாலும் இந்த உலகின் இயக்கமே நின்று போகுமே. உலக ஜீவன்கள் எல்லாவற்றிற்கும் ஆதாரமானவரே, அவற்றை ஆட்டுவிக்கும் ஆடலரசே, எழுந்தருளும். துயில் நீங்கி எம் துயர் துடைக்க வாரும். உம் விழி மலர்ந்தால், உலகின் இருளெல்லாம் ஓடிப் போகும். உம் அருட்பார்வையால் எங்களையெல்லாம் ஆட்கொண்டு புத்துணர்வு கொள்ள தயை புரியுங்கள் எம்பெருமானே!.திருவெம்பாவை திருநோன்பு (திருப்பள்ளியெழுச்சி): அனைத்து பகுதிகளையும் காண 'Click Here'.Click Here

திருப்பள்ளியெழுச்சி: 9 - துயில் நீங்கி எம் துயர் துடைக்க வாரும், ஈசனே!

Other Articles