சித்திரை மகளே வருக!

கவிதை!

-ரமா, திருச்சி

இளந்தென்றல் வரவேற்க
இளவேனில் உற்சவம் !
சித்திரை மகளே வருக!

இளந்தென்றல் வரவேற்க
இளவேனில் உற்சவம் !
சித்திரையின் கைப்பிடித்து
புத்தாண்டு கொண்டாட்டம் !

முத்தாக வேப்பம் பூக்கள்…
முன்வாசல் முற்றம் நிறைக்கும் .
ரத்தினங்களாய் மாம்பூக்கள்…
ரசனையின் கச்சேரி ,
ரீங்கரிக்கும் வண்டினங்கள் !

வாட்டும் கோடையில்தான்
வாச மலர்கள் பூத்துச்சொரியும் !
நிழலின் அருமைதனை ,
வெம்மையே புரிய வைக்கும் !

ஆதித்தனை வைத்தே தான்
ஆழி சூழ் உலகின் பயணம் !
அதைக்கொண்டே முன்னோரின்
சித்திரை புத்தாண்டு வரும் !

ஆலயம் தொழுதல் உண்டு…
அறுசுவை விருந்தும் உண்டு .
விருந்தின் தத்துவத்தில்…
வேப்பம்பூ பச்சடியும் ஒன்று !

தையா ? சித்திரையா ?
சர்ச்சைகள் நமக்கெதற்கு ?
வாசல் வந்தாள் சித்திரை மகள்!
வாழ்த்தியே வரவேற்போம்!!