கருப்புச் சூரியன் காமராஜர் பிறந்த தின கவிதை!

விருதுநகரில் பிறந்தவராம்,-வெற்றி

          வாகை பல சூடியவராம்

அரும்பணிகள் புரிந்தவராம் இந்திரா

        அன்பைப் பெற்றவராம்

கருமை உருவம் கொண்டவராம்- நீள

         கரங்கள் உடையவராம்

அருமைத் திட்டங்கள் தந்தவராம் -உயரம்

      ஆறடிக்கு மேல் வளர்நதவராம்

அணைகள் பல கட்டியவராம்- அன்பும்

       ஆற்றலும் திகழ்ந்தவராம்

துணையாய் ”வைரவன்” – முழுத்

     துண்டைத்தோளில் அணிந்தவராம்

முனைப்பாய் செயலாற்றி – முதலில்

   மதிய உணவு தந்தவராம்!

அணைக்கும் தாயுள்ளம் கொண்டு – கல்வி

   ஆலயங்கள் கட்டியவராம்

பதவிகள் பல துறந்தவராம் – படிக்காத

  மேதையென வலம் வந்தவராம்

உதவும் குணமும் கொண்டவராம் –நல்ல

   பண்புகளால் உயர்ந்தவராம்

ஆதரவில்லா எளியோர்க்கு – என்றும்

       அயராது உழைத்தவராம்

இதயத்திலென்றும் நிற்பவராம் – எளிமை

    இனிமை கருப்புச்சூரியன் வாழியவே!

 -கே. அசோகன்