மசூதிகளில் பெண்கள் தொழுகை: அனுமதி உண்டா?

இஸ்லாமிய மத வழிபாட்டுத் தலங்களான மசூதிகளில் பெண்கள் நுழைந்து (women mosque entry), தொழுகை நடத்துவது குறித்த விவாதம் நீண்ட காலமாக இந்திய நீதித்துறையிலும் சமூகத்திலும் நடைபெற்று வருகிறது.

ஏப்ரல் 24, 2026 அன்று உச்ச நீதிமன்றத்தில் அகில இந்திய முஸ்லிம் தனிநபர் சட்ட வாரியம் (AIMPLB) தாக்கல் செய்த பிரமாணப் பத்திரம், இந்த விவகாரத்தில் ஒரு முக்கிய தெளிவை ஏற்படுத்தியுள்ளது.

உச்ச நீதிமன்றத்தில் தாக்கல் செய்யப்பட்ட விளக்கத்தின்படி, இஸ்லாமிய மார்க்கம், பெண்கள் மசூதிக்குள் நுழைந்து தொழுவதற்கு எந்தத் தடையையும் விதிக்கவில்லை.

நபிகள் நாயகம் (ஸல்) அவர்களின் காலத்தில் பெண்கள் மசூதிக்கு வந்து சென்றதற்கான ஆதாரங்கள் சுட்டிக்காட்டப்பட்டுள்ளன. "அல்லாஹ்வின் அடியார்களாகிய பெண்கள் மசூதிக்கு வருவதைத் தடுக்காதீர்கள்" என்ற நபிகளாரின் கூற்று இதற்கான அடிப்படை ஆதாரமாகக் கொள்ளப்படுகிறது.

ஏன் மசூதிகளில் பெண்கள் அனுமதி மறுக்கப்படுகிறது?

அதற்கான காரணங்கள் என்ன?

கொள்கை அளவில் தடை இல்லையென்றாலும், நடைமுறையில் பல மசூதிகளில் பெண்கள் அனுமதிக்கப்படுவதில்லை. இதற்கான காரணங்களாக பின்வருவன முன்வைக்கப்படுகின்றன:

1. கட்டாயமின்மை: ஆண்களுக்கு மசூதியில் கூட்டாக (ஜமாஅத்) தொழுவது கடமையாக்கப்பட்டுள்ளது. ஆனால், பெண்களுக்கு அந்த கட்டாயம் இல்லை. அவர்கள் தங்கள் இல்லங்களிலேயே தொழுவது சிறந்தது மற்றும் அதிக நன்மைகளைத் தரக்கூடியது என்பது மார்க்க அறிஞர்களின் பொதுவான கருத்து.

2. கட்டமைப்பு வசதிகள்: மசூதிகளில் ஆண்கள் மற்றும் பெண்களுக்குத் தனித்தனி நுழைவாயில்கள், ஒதுக்கப்பட்ட தொழுகை இடங்கள் மற்றும் தனித்தனி அங்கசுத்தி (Wudu) செய்யும் இடங்கள் இருக்க வேண்டும் என்பது விதி. பல சிறிய மசூதிகளில் இத்தகைய தனி வசதிகள் இல்லாததால் பாதுகாப்பு மற்றும் ஒழுக்கக் காரணங்களுக்காக பெண்கள் அனுமதிக்கப்படுவதில்லை.

3. பல நூற்றாண்டுகளாக நிலவி வரும் கலாச்சாரப் பழக்கவழக்கங்கள் காரணமாக, பெண்கள் மசூதிக்குச் செல்வது ஒரு பொதுவான நடைமுறையாக இல்லாமலேயே போய்விட்டது.

உச்ச நீதிமன்ற விசாரணையின் முக்கிய அம்சங்கள்:

ஏப்ரல் 24 விசாரணையின் போது, இஸ்லாமிய சட்ட வாரியம் சில முக்கிய நிபந்தனைகளைத் தெளிவுபடுத்தியது:

• பெண்கள் மசூதிக்குள் நுழையலாம், ஆனால் அவர்கள் ஆண்களுடன் கலந்து (Free mixing) தொழுவதற்கு அனுமதி இல்லை.

• பெண்களுக்கென்று தனி இடம் ஒதுக்கப்பட்டுள்ள மசூதிகளில் அவர்கள் தாராளமாகத் தொழலாம்.

• பெண்கள் மசூதிக்கு வருவதை ஒரு மத ரீதியான 'உரிமையாக நிலைநாட்ட முயலும்போது, அது மசூதியின் நிர்வாகம் மற்றும் ஒழுக்கக் கட்டுப்பாடுகளுக்கு உட்பட்டதாகவே இருக்க வேண்டும்.

• மசூதிகளில் பெண்கள் தொழுகை நடத்துவது என்பது ஒரு மதத் தடை அல்ல, மாறாக அது வசதி மற்றும் ஒழுங்கு சார்ந்த விஷயமாகவே பார்க்கப்படுகிறது.

• தற்காலத்தில் மெக்கா மற்றும் மதினா போன்ற புனித தலங்களிலும், பல நவீன மசூதிகளிலும் பெண்களுக்குத் தனி இடவசதி வழங்கப்படுகிறது.

• காலமாற்றத்திற்கு ஏற்ப இந்தியாவிலும் பல மசூதிகள் பெண்களுக்கான பிரத்யேக இடங்களை உருவாக்கி வருகின்றன.

சட்டம் மற்றும் மத நெறிமுறைகள் இரண்டுமே பெண்கள் மசூதிக்கு வருவதை ஆதரித்தாலும், நடைமுறைச் சிக்கல்களைக் களைவது மசூதி நிர்வாகங்களின் கைகளில் உள்ளது என்பதே நிதர்சனம்.