கவிதைத் தூறல்!

-எஸ். ராஜம் , ஸ்ரீரங்கம் 

 உறவுகள்

 கீரை காரப்பாட்டி

காய்கறித் தாத்தா

பூக்கார அம்மா

பஞ்சுமிட்டாய் மாமா

இவர்கள் உறவினர்கள்

இல்லையென்றாலும்

உறவுமுறை பெயர்கள் உண்டு

வீட்டில் கிடையாது

பாட்டி, தாத்தா, அத்தை

உறவுகள் இப்போது...

********************************

நட்சத்திரங்கள்

புருஷன் உயிர் பறிக்குமாம்

பூராடம் நட்சத்திரம்

மூலம் மாமனாருக்கு ஆகாது

ஆயில்யம் மாமியாருக்கு ஆபத்து

கேட்டை மூத்தவனுக்கு கேடு

எந்த நட்சத்திரமானாலும்

எல்லாமே பெண்களுக்கு மட்டும்

 ஒரு தோஷமும் இல்லை ஆண்களுக்கு

வானத்து நட்சத்திரங்களிலும்

ஆணாதிக்கம் தான்.

********************************

வயது

அலட்சியம் செய்யாதீர்கள்

அறுவை என்று

பெரியவர்கள் பேச்சை

அவர்களின் அனுபவங்கள்

உங்களுக்குப் பாடங்கள்

உங்கள் வயதைக்

கடந்து வந்தவர்கள் அவர்கள்

அந்த வயதை

அடையப் போகிறவர்கள் நீங்கள்

செவிகளை மூடாதீர்கள்

மனதையும்தான்

இளைஞர்களே...