வீட்டு மளிகை செலவினைக் குறைக்க சில யுக்திகள்!

-வெங்கட்ராமன் ராமசுப்ரமணியன்

​மளிகைச் செலவினைக் குறைக்க நீங்கள் பின்வரும் யோசனைகளை கையாளலாம்.

பொருளின் அலகு மதிப்பைப் (Unit Price) பார்த்து வாங்குங்கள்: உதாரணமாக, 40 கிராம் நூடுல்ஸ் , ரூபாய் 8 என்றால், ஒரு கிராம் நூடுல்ஸ் விலை 8 /40 = 50 காசு. 400 கிராம் நூடுல்ஸ் விலை ரூபாய் 60 ரூபாய் என்றால், ஒரு கிராம் நூடுல்ஸ் விலை, 60 / 400 = 15 காசு. எனவே, சிறிய நூடுல்ஸ் பாக்கெ​​ட்டை விட, பெரிய நூடுல்ஸ் பாக்கெட் வாங்குவதன் மூலம், ஒரு அலகிற்கு நாம் கொடுக்கும் விலை குறைவு. சில சமயம், சிறிய பாக்கெட்டின் விலை, பெரிய பாக்கெட்டை விடவும் குறைவாகவும் இருக்க வாய்ப்புள்ளது. எனவே, இவ்வாறு கணக்கிட்டு வாங்குங்கள்.

• பொதுவாக, மொத்தமாக வாங்குவதென்பது, சில்லரையாக வாங்குவதை விட பணம் சேமிக்க உதவும்; உதாரணமாக, ஒரு கிலோ அரிசியை நீங்கள் தனியாக வாங்குவதை விட, அரிசி மூட்டையாக வாங்கும் போது, அரிசிக்கு கொடுக்கும் விலை குறைவு. கெட்டுப் போகாத பொருட்களை மட்டுமே, வீட்டில் இருப்பாக வைக்க இடம் இருந்தால் மட்டுமே, இவ்வாறாக மொத்தமாக வாங்கிப் போடலாம். இல்லையேல், அதிகமாக வாங்கி, உபயோகமின்றி வீணாகப் போனால், நீங்கள் பணத்தை இழக்க நேரிடும்.
• பொதுவான பொருட்கள், முத்திரை(Branded) பொருட்களை விட விலை குறைவு; உதாரணமாக, சாதாரண பாசிப் பருப்பை விட, முத்திரை சார்ந்த பாசிப் பருப்பின் விலை அதிகம். சாதாரண பாஸ்மதி அரிசியை விட, முத்திரை சார்ந்த பாஸ்மதி அரிசியின் விலை அதிகம். முத்திரை சார்ந்த பொருள் கண்டிப்பாக வேண்டுமென்றால், அதை வாங்குங்கள். அல்லது, பொதுவான, முத்திரை இல்லாத பொருட்களே போதுமானவை.
• விலை ஒப்பீட்டு கணக்கு புத்தகத்தை தயார் செய்யுங்கள்; மாதாமாதம் நீங்கள் வாங்கும் பொருட்களை, வீட்டின் அருகிலுள்ள வேறு வேறு மளிகை கடைகளில் ஒவ்வொரு மாதமும் வாங்கி, அதனை ஒரு நோட்டு புத்தகத்தில் குறித்துக் கொள்ளுங்கள். எந்த கடையில் பொருட்கள் தரமாகவும், விலை குறைவாகவும் வருகிறதோ, அங்கேயே வாங்கும் முடிவை எடுங்கள்.
• கடையின் கழிவுப் விற்பனைப் பகுதியைப்(Clearance Section) பயன்படுத்திக் கொள்ளுங்கள்; அங்காடியில் விற்காமல் உள்ள, அதிகம் சேர்ந்துவிட்ட பொருட்களைக் கழிக்க, அதிகபட்ச தள்ளுபடியில் பொருட்களை அடுக்கி இருப்பார்கள். அந்தப் பகுதியில் உங்களுக்கு தேவையான பொருள் இருந்தால், கெட்டு விடும் முன்பு, உபயோகப்படுத்த முடிந்தால், வாங்கி, பணத்தை சேமியுங்கள்.

• கடையின் வாராந்திர தள்ளுபடி விற்பனை பட்டியலைப் பயன்படுத்திக் கொள்ளுங்கள்; இப்போதெல்லாம், அருகிலுள்ள அங்காடியில், உங்களது கைபேசி எண்ணை அளித்துவிட்டால், வாரா வாரம் தள்ளுபடி சார்ந்த பட்டியலை உங்களுக்கு குறுஞ்செய்தியாக அனுப்பி வைக்கின்றனர். உங்களுக்கு தேவைப் படும் பொருள் இருந்தால், அந்த தள்ளுபடியை உபயோகப்படுத்திக் கொள்ளுங்கள்.
• வாங்க வேண்டிய பொருட்களின் வரிசைப் பட்டியலுடனே கடைக்கு செல்லுங்கள். அதை மட்டும் வாங்குங்கள்; எந்த பொருள் தேவை என்று முன்பே முடிவெடுத்துக் கொண்டு, வரிசைப் படுத்தி, கடைக்கு சென்று அதை மட்டும் வாங்குங்கள். கடையில் ஏதாவது பொருள் தள்ளுபடியில் உள்ளது என்று, தேவையில்லாதப் பொருளை வாங்காதீர்கள்.
• கடையில் பணத்தை செலுத்த, கைபேசி சார்ந்த பணச் செயலிகளை உபயோகப்படுத்தி, பணம் மிச்சம்பிடிக்கப் பாருங்கள்; மாதா மாதம், ஒருங்கிணைக்கப்பட்ட பணச் செலுத்தல் முகப்பு (Unified Payments Interface) சார்ந்த கைபேசி செயலிகளில், பணம் செலுத்துதல் மூலம், குறிப்பிட்ட சதவிகதப் பணத்தை திரும்ப பெற இயலும். பணத்தை சேமிக்க முடியும்.
• பருவ காலங்களுக்கு ஏற்ற, பொருட்களை வாங்குங்கள்; அந்தந்த பருவ காலங்களில், அந்தந்த பொருட்கள் விலைக் குறைவாக இருக்கும். உதாரணமாக, மாம்பழம் வெயில் காலங்களில் விலை குறைவு. இவ்வாறு உண்ணுவது உடல் நலத்திற்கும் நல்லது.

• எல்லாவிதமாக காய்கறிகளை வாங்குங்கள், உண்ணுங்கள்; குறிப்பிட்ட காய்கறிகளை மட்டும் வாங்குவதால், அதன் விலையேற்றம் உண்டாகிறது. எல்லாவிதமான காய்கறிகளையும் வாங்குவதால், பணத்தை குறைவாக செலவிடுவது மட்டுமன்றி, காய்கறிகளுக்கான மவுசு குறையும். உதாரணமாக, உருளைக்கிழங்கு எல்லாரும் போட்டிப் போட்டு வாங்குவதால், விலை அதிகம். சௌ சௌ போன்ற காய்கறிகள் விலை குறைவு. பலர் வாங்குவதில்லை.
• மிக்ஸ் அல்லது ஏற்கனவே தயார் செய்யப்பட்ட, பதப்படுத்தப்பட்ட பொருட்களைத் தவிருங்கள். அவை விலை அதிகம். அவை வேலையை எளிதாக்கினாலும், விலை அதிகம். உதாரணமாக, பஜ்ஜி மிக்ஸ், கிச்சடி மிக்ஸ் போன்றவைகள் சீக்கிரமாக செய்ய உதவினாலும், வீட்டிலேயே இவற்றை அடிப்படையிலிருந்து தயார் செய்வதால், பணத்தை மிச்சம் பிடிக்க முடியும்.
• பொருளை வாங்கும் முன், வீட்டில் ஒரு முறை சரிபார்த்து விட்டு வாங்குங்கள். உதாரணமாக, உங்களிடம் ஏற்கனவே, பல மாதங்கள் முன்பு வாங்கிய கேசரி பவுடர் இருந்தால், மறுபடி வாங்காதீர்கள். உங்களிடம் உள்ள மளிகைப் பொருட்களைப் பற்றி அறிந்திருங்கள்.
• நமது நாட்டு உணவுப் பொருட்களை, தானியங்களை, எண்ணைகளை வாங்குங்கள். அவை விலை குறைவு. நமது நாட்டு தானியங்கள், நமது சீதோஷ்ணத்தில் விளைந்து, அருகிலிருந்து வருவதால், விலை குறைவு. உதாரணமாக, அரிசி, பருப்பு போன்றவை. வெளி நாட்டு தானியங்களான ஓட்ஸ், வெளி நாட்டு எண்ணைகளான ஆலிவ் எண்ணை போன்றவை, இறக்குமதி செய்யப்படுவதால் விலை அதிகம். நமது சீதோஷ்ணத்திற்கு ஏற்ற உணவுகளை உண்பது உடல் நலத்திற்கும் நல்லது.
• டப்பாக்களில் உள்ள பொருளை விட, பாக்கெட்டில் உள்ள பொருட்கள் விலை குறைவு; டப்பாக்களில் உள்ள பொருட்களில் டப்பாவின் விலையும் சேர்வதால், விலை அதிகம். பாக்கெட்டில் உள்ள பொருட்களில் டப்பாவின் விலை சேராத தால், விலை குறைவு. உதாரணமாக, பூஸ்ட் 500 கிராம் டப்பாவினை விட, 500 கிராம் பாக்கெட்டின் விலை குறைவு.

• உழவர் சந்தையை உபயோகப்படுத்திக் கொள்ளுங்கள். உழவர் சந்தையில் இடைத்தரகர்கள் இல்லாதபடியால், உழவர்களே நேரில் விற்பதால், விலை குறைவு. உழவர்களும் நேரடியாகப் பணத்தைப் பெறுகின்றனர்.

​​ஒ​ரு ரூபாய் சேமிப்பது என்பது, ஒரு ரூபாய் சம்பாதிப்பதற்கு சமமானது. ​