வாசகர்கள் ஜமாய்க்கிறாங்க!

வாழைப்பழம் நீண்ட நாள் ஃப்ரெஷாக இருக்க

வாழைப்பழம் அழுகிப்போகாமல் இருக்க, வாழைக் குலையை படத்தில் காண்பது போலகட்டித்தொங்க விட்டால் அதிக நாள் வரை நன்றாக இருக்கும். நான் எப்போதும் அதிகம் பழுக்காத, காயாக இருக்கும் வாழப் பழங்களை வாங்கி தொங்கவிடுவேன்.

ஒரு டஜன் வாங்கினால் கூட அது தீரும் வரை அழுகாமல் இருக்கும். அமெரிக்காவில் இதற்கு ஸ்டான்ட் கூட கிடைக்கிறது.

–கங்கா ராமநாதன், சென்னை

எளிதில் செய்யக் கூடிய சத்தான இனிப்பு

எள்ளு, வேர்க்கடலை, பொட்டுக்கடலை (உடைச்சகடலை) இவை மூன்றையும் சம பங்காக எடுத்து கலந்து கொள்ளவும். இந்த கலவையை, கொதிக்கவைத்து, வடிகட்டிய வெல்லப்பாகில் கலந்து, கொஞ்சம் நெய், மற்றும் லேசாக வறுத்த துருவிய தேங்காயை சேர்க்கவும். பின் கெட்டியானதும் உங்களுக்கு பிடித்தமான வடிவத்தில் பிடித்துக் கொள்ளவும். 15 நிமிடத்தில் சுவையானஆரோக்கியமான இனிப்பு தயார்.

–கங்கா ராமநாதன், சென்னை

……………………………………..

வார்த்தை ஜாலம் – உபந்யாசத்தில் கேட்டது

ஊத்துக்காடு கவி என்கிற நீடாமங்கலம் கிருஷ்ணமூர்த்தி பாகவதரை அறியாதவர் இல்லை. அவரது உபந்யாசத்திலிருந்து  எனக்கு பிடித்த ஒரு வரி – "அத்தினத்திற்கும் ஓட்டைகைக்கும் ஆயிரம் காதம் ஆனாலும் நடக்குதையா சேலை வியாபாரம்." உபந்யாசத்தில் எங்கே வந்தது சேலை வியாபாரம்? என்று உங்களுக்கு தோனலாம். அதன் விளக்கம் உங்களை மேலும் வியப்பில் ஆழ்த்தும்.

துரியன் சபையில் பாஞ்சாலி இரு கை உயர்த்தி கண்ணா காப்பாற்று என்று சொல்லி அரற்றிய போது, கண்ணன் துவாரகையில் இருந்து சேலை அனுப்பியதை தான் உபந்யாசகர் இவ்வாறு தெரிவித்தார்.

அத்தினம் என்றால் அஸ்தினாபுரம். ஓட்டைகை என்றால் துவாரகை. 'ஆயிரம் காதம்' என்பது அஸ்தினாபுரத்திற்கும் துவாரகைக்கும் உள்ள தூரம். கண்ணன் துவாரகையிலிருந்து  சேலை கொடுத்ததைத் தான் இவ்வளவு சுருக்கமாக சொன்னார் நமது கவி.

-பாரதிராஜன் , சென்னை.

……………………………………..

வெற்றிலை – இது 'வெற்று' இலை அல்ல, 'வெற்றி' தரும் இலை

வெற்றிலையில் நீர்ச்சத்து, புரதச் சத்து, கொழுப்புச் சத்து நிறைந்துள்ளது. இதில் கால்சியம், கரோட்டின், தயமின், ரிபோபிளேவின் மற்றும் வைட்டமின் 'சி'உள்ளது.

மேலும் இதில் வீரியமிக்க நோய் எதிர்ப்புத் திறன் கொண்ட சவிக்கால் (Chavicol) என்னும் பொருள் இருப்பதாக கண்டறியப் பட்டுள்ளது. இது தவிர வெற்றிலையைப் பயன்படுத்தி பல நோய்களையும் குணப்படுத்தலாம்.

மருத்துவ குணம் கொண்ட வெற்றிலை

• அஜீரணத்தை நீக்கி செரிமானத்தை தூண்டும் வெற்றிலை,  தாய்ப்பால் சுரப்பியாகவும்,சிறுநீர் பெருக்கியாகவும் செயல்படுகிறது.
• வாய் தூர்நாற்றம் நீக்க வல்லது.
• வெற்றிலையை இடித்து இரவு முழுவதும் நீரில் ஊறவைத்து, அந்த நீரை காலையில் வெறும் வயிற்றில் குடித்து வந்தால் மலச்சிக்கல் பிரச்சனை தீரும்.
• வெற்றிலை வயிற்றில் இருக்கும் வாயுவை வெளித்தள்ளும் தன்மை கொண்டது.
• கடுமையான வயிற்றுவலிக்கு ஒரு வெற்றிலையில் ஐந்து மிளகு வைத்து மென்றுச் சாப்பிட உடனடியாக வலி நீங்கும்.
• துளசி, வெற்றிலை, இஞ்சி, மிளகு இவற்றை சம அளவு எடுத்து அரைத்து தண்ணீரில் கொதிக்க வைத்து, அந்த நீரை காலை மாலை என இரு வேளைகள் குடித்து வர, வயிற்றுக் கோளாறுகள் மற்றும் சளித்தொல்லை நீங்கும்.

சரும அழகை காக்கும் வெற்றிலை

• வெற்றிலை நீரால் முகத்தை சுத்தம் செய்வதன் மூலம் பல வகையான அலர்ஜிகள் குணமாகும்.
• பொதுவாக, வெற்றிலையில் ஏராளமான மருத்துவ குணங்கள் உள்ளன. இது தோல் எரிச்சல், வலி மற்றும் அரிப்பு போன்ற பல பிரச்சனைகளுக்கு நிவாரணியாக செயல்படும்.
• வெற்றிலையை உலர்த்தி பொடி செய்ய வேண்டும். அதில் ஒரு சிட்டிகை மஞ்சள் தூள் மற்றும் தேன் கலந்து பேஸ்டாக்க வேண்டும். இந்த பேஸ்ட்டை சருமத்தின் பாதிக்கப்பட்ட பகுதியில் 2 நிமிடம் வைத்திருந்த பிறகு, குளிர்ந்த நீரில் சருமத்தை சுத்தம் செய்தால் நல்ல பலன் கிடைக்கும்..
• ஒரு கைப்பிடி வெற்றிலையை அரைத்து சருமத்தில் பாதிக்கப்பட்ட இடத்தில் நன்கு தடவவும். பின் 5 நிமிடம் கழித்து சாதாரண நீரில் முகத்தை கழுவ, சருமத்தில் பொலிவை காணலாம்.
• வெற்றிலையை வேகவைத்து அதன் நீரால் முகத்தைக் கழுவுவதும் நல்ல பலன் தரும்.

தொகுப்பு – சுந்தரி காந்தி, சென்னை