முள்ளங்கி - பார்த்தாலே இது இளசு எனச் சொல்லி விடலாம். மெல்லிசாக வாங்குவது நல்லது. கிள்ளினால் தெரிந்துவிடும்.
கோவைக்காய் - சின்னச் சின்னதாக மெல்லிசாக இருக்க வேண்டும்.
பாகற்காய் - கரும்பச்சை உதவாது. இளம் பச்சையோடு மேலே நிறைய முள்ளோடு மெல்லிசாக இருந்தால் இளசு.
சௌசௌ - இதில் முள் இருக்கக் கூடாது. 'இளசு' எனக் கையில் எடுத்தாலே தெரியும்.
கோஸ் - தூக்கிக் கையில் பந்து போல உருட்டுங்கள். கனமாக இருந்தால் நல்ல கெட்டி கோஸ். உள்ளே புழு இருக்காது.
கத்திரிக்காய் - காம்பில் முள், அமுக்கினால் 'மெத்'... இது இளசு.
நூல்கோல் – ‘ஃப்ரெஷ்'ஷாக இருந்தால்தான் வாங்க வேண்டும். உள்ளே நீர் வற்றி விட்டால் முத்திப் போய்விடும்.
வெண்டைக்காய் - எல்லோருக்குமே தெரியும். காம்பு ஒடிந்தால் இளசு. வெள்ளை வெண்டைக்காய் சுவையாக இருக்காது.
சுரைக்காய் - நகம் வைத்து அழுத்தினால் இறங்க வேண்டும். அப்போதுதான் முத்தல் இல்லை என அர்த்தம்.
வாழைத்தண்டு - அடித்தண்டு, மேல் தண்டு இல்லாமல் நடுவிலுள்ள தண்டே நன்றாக இருக்கும்.
பீர்க்கங்காய் - முள் இருக்க வேண்டும். உடைத்துத் தின்று பார்க்க வேண்டும். கசப்புத் தட்டினால் வேண்டாம்.
வெள்ளரிக்காய் - இதையும் சாப்பிட்டுப் பார்த்து வாங்குவது நல்லது. கசப்புச் சுவை சிலதில் இருக்கும்.
ஊட்டிப் பட்டாணி - இனிப்பாக இருக்கும். தோலோடு வாங்குவது நல்லது. சின்னதாக இருந்தால் பெங்களூர் பட்டாணி. டில்லி பட்டாணி சுமாராக இருக்கும்.
தக்காளி திண்டுக்கல் - தக்காளிதான் சுவையாக இருக்கும். இது புளிப்புடன் கொளகொளவென இருக்கும். ஆனால், பெங்களூர்த் தக்காளி பார்க்கக் கவர்ச்சியாகவும், கெட்டியாகவும் இருப்பதால் அதையே எல்லோரும் விரும்புகிறார்கள். தக்காளியின் உண்மைச் சுவை திண்டுக்கல் தக்காளியில்தான் உண்டு.