இனி சிலிண்டர் வாங்க இதை செய்ய வேண்டும்; அரசின் புதிய உத்தரவு..!

டெல்லியில் உள்ள கிடங்குகளில் இருந்து நேரடியாக எல்பிஜி சிலிண்டர்களை விற்பனை செய்வதற்கு டெல்லி அரசு கடுமையான தடை விதித்துள்ளதுடன், விதிமீறல்கள் மீது கடுமையான நடவடிக்கை எடுக்கப்படும் என எச்சரித்துள்ளது.

டெல்லி முதலமைச்சர் ரேகா குப்தாவின் அதிகாரப்பூர்வ அறிக்கையில், எந்தவொரு பற்றாக்குறையை தடுக்கவும், விதிமுறைகள் பின்பற்றப்படுவதை உறுதி செய்யவும் எல்பிஜி விநியோகம் உன்னிப்பாகக் கண்காணிக்கப்பட்டு வருவதாகக் கூறினார். மேலும் முன்பதிவு செய்யப்பட்ட சிலிண்டர்கள் குறிப்பிட்ட நேரத்திற்குள் வீடுகளுக்கு விநியோகிக்கப்படுவதால், எரிவாயு முகவர் நிலையங்கள் அல்லது சேமிப்புக் கிடங்குகளுக்குச் செல்லவோ அல்லது கூட்டமாகக் கூடவோ வேண்டாம் என குடியிருப்பாளர்களுக்கு அறிவுறுத்தப்பட்டுள்ளதாகவும் கூறப்பட்டுள்ளது.

முறையற்ற விற்பனை, பதுக்கல் மற்றும் கள்ளச்சந்தை ஆகியவற்றை கட்டுப்படுத்துவதையும், நுகர்வோரை அதிகாரப்பூர்வ முன்பதிவு மற்றும் விநியோக முறையை நோக்கி திருப்புவதையும் இந்த நடவடிக்கை நோக்கமாக கொண்டுள்ளது.

பதுக்கல் மற்றும் கள்ளச்சந்தையைக் கட்டுப்படுத்துவதற்காக, 011-23-37-9836 மற்றும் 838-382-4659 ஆகிய உதவி எண்களுடன் ஒரு பிரத்யேக கட்டுப்பாட்டு அறை அமைக்கப்பட்டுள்ளதாகவும் குப்தா கூறினார்.

அந்த அறிக்கையின்படி, எண்ணெய் சந்தைப்படுத்தல் நிறுவனங்கள் (OMCs), சேமிப்புக் கிடங்குகளில் இருந்து சிலிண்டர்களை நேரடியாக விற்பனை செய்வது சட்டவிரோதமானது என்று விநியோகஸ்தர்களுக்கு அறிவுறுத்தியுள்ளன. குறிப்பாக புலம்பெயர் தொழிலாளர்களுக்கான விநியோகத்தை எளிதாக்க, 5 கிலோ எல்பிஜி சிலிண்டர்களின் இருப்பை விரிவுபடுத்தியுள்ளதாகவும் டெல்லி அரசு கூறியுள்ளது. செல்லுபடியாகும் அடையாள அட்டையை பயன்படுத்தி, முகவரி சான்று தேவையின்றி எரிவாயு முகமைகளில் இருந்து இவற்றை இப்போது வாங்கலாம். இந்த நடவடிக்கை, புலம்பெயர் தொழிலாளர்களுக்கும் நிரந்தர ஆவணங்கள் இல்லாதவர்களுக்கும் பயனளிக்கும் என எதிர்பார்க்கப்படுகிறது.

சிலிண்டர்களை பெறுவதற்காக எரிவாயு முகமைகள் அல்லது சேமிப்பு கிடங்குகளுக்கு செல்ல வேண்டாம் என குடியிருப்பு வாசிகளுக்கு அறிவுறுத்தப்பட்டுள்ளது. விநியோகத்தை நெறிப்படுத்தவும், கூட்ட நெரிசலை தவிர்க்கவும் மேற்கொள்ளப்பட்ட முயற்சிகளின் ஒரு பகுதியாக, முன்பதிவு செய்யப்பட்ட அனைத்து எல்பிஜி சிலிண்டர்களும் குறிப்பிட்ட காலக்கெடுவுக்குள் நேரடியாக வீடுகளுக்கு விநியோகம் செய்யப்பட்டு வருவதாக அதிகாரிகள் தெரிவித்தனர்.

மேலும், டெல்லி காவல்துறை 17 இடங்களில் சோதனை நடத்தியுள்ளதாகவும், உணவு மற்றும் வழங்கல் துறை 76 எரிவாயு முகவர் நிலையங்கள் மற்றும் சேமிப்புக் கிடங்குகளை ஆய்வு செய்ததாகவும் அந்த அறிக்கையில் தெரிவிக்கப்பட்டுள்ளது.

‘டெல்லியில் எல்பிஜி விநியோகம் முழுமையாக நிலையாகவும் கட்டுப்பாட்டிலும் உள்ளது,’ என்று கூறிய முதலமைச்சர், மக்கள் அமைதியாக இருக்குமாறும், வதந்திகளைத் தவிர்க்குமாறும், விநியோக முறையை நம்பியிருக்குமாறும் கேட்டுக்கொண்டார்.