இனி வாக்காளர் பட்டியலில் பெயர் சேர்க்க... திருத்தம் செய்ய.. டிஜிட்டல் கையெழுத்து..!!
தேர்தல் ஆணையம் (EC) வாக்காளர் பட்டியலில் பெயர் சேர்த்தல், நீக்கம் அல்லது திருத்தம் செய்யக் கோரும் விண்ணப்பங்களுக்காக, தனது ECINet வலைதளம் மற்றும் செயலியில் புதிய 'இ-சைன்' (e-sign) (Electronic Signature) அம்சத்தை அறிமுகப்படுத்தியுள்ளது.
இந்த புதிய வசதியின்படி, இனிமேல் வாக்காளர் பட்டியலில் இருந்து ஒருவரின் பெயரை நீக்கக் கோரும் விண்ணப்பங்களுக்கு, ஆதார் அட்டையுடன் இணைக்கப்பட்ட தொலைபேசி எண் கட்டாயமாக்கப்பட்டுள்ளது. இதன் மூலம், சம்பந்தப்பட்ட வாக்காளரின் ஒப்புதல் உறுதிப்படுத்தப்படும்.
மோசடி குற்றச்சாட்டுக்கு தேர்தல் ஆணையத்தின் பதில்
சமீபத்தில், கர்நாடகாவின் ஆலந்த் தொகுதியில் வாக்காளர் பட்டியலில் இருந்து சுமார் 6,000 பெயர்கள் போலி மென்பொருளைப் பயன்படுத்தி, உண்மையான வாக்காளர்களைப் போல ஆள்மாறாட்டம் செய்து, மோசடியாக நீக்கப்பட்டதாக காங்கிரஸ் தலைவர் ராகுல் காந்தி குற்றம் சாட்டினார்.
இந்தச் சம்பவம், வாக்காளர் பட்டியல் பாதுகாப்பு குறித்த ஒரு தீவிரமான விவாதத்தைத் தூண்டியது.
இந்த நிலையில், மேற்கண்ட குற்றச்சாட்டுகளுக்குப் பிறகு, வாக்காளர் பட்டியல் திருத்த நடைமுறையில் நம்பகத்தன்மையை உறுதி செய்யும் வகையில், தேர்தல் ஆணையம் இந்த புதிய 'இ-சைன்' அம்சத்தை அறிமுகப்படுத்தியுள்ளது.
இது குறித்து தேர்தல் ஆணையம் விளக்கமளித்துள்ளது.
ஆலந்த் தொகுதியில் நீக்கக் கோரி சமர்ப்பிக்கப்பட்ட 6,000-க்கும் மேற்பட்ட விண்ணப்பங்களில், 24 மட்டுமே சரிபார்க்கப்பட்டு அங்கீகரிக்கப்பட்டன, மீதமுள்ள 5,994 விண்ணப்பங்கள் நிராகரிக்கப்பட்டன. இந்த சந்தேகத்திற்குரிய மோசடி முயற்சிகள் தொடர்பாக தேர்தல் ஆணையமே முதல் தகவல் அறிக்கை (FIR) பதிவு செய்துள்ளது.
'இ-சைன்' அம்சம் எப்படிச் செயல்படும்?
ஆகஸ்ட் மாதத்தின் முதல் வாரத்தில் இந்த 'இ-சைன்' (Electronic Signature) அம்சம் தொடங்கப்பட்டது. இதுவரை, வாக்காளர் பட்டியலில் ஒரு புதிய பெயரைச் சேர்க்க, படிவம் 6-ஐயும், நீக்க அல்லது ஆட்சேபிக்க படிவம் 7-ஐயும், ஒரு தொலைபேசி எண்ணை வாக்காளர் அடையாள அட்டை (EPIC) எண்ணுடன் இணைப்பதன் மூலம் விண்ணப்பிக்க முடிந்தது.
இனி, விண்ணப்பதாரர் தேவையான தகவல்களை உள்ளீடு செய்த பிறகு, மைய அரசின் மேம்பட்ட கணினி மேம்பாட்டு மையத்தால் (CDAC) நிர்வகிக்கப்படும் 'இ-சைன்' இணையதளத்திற்குத் தானாகத் திருப்பி விடப்படுவார்.
அங்கு, ஆதார் எண்ணுடன் இணைக்கப்பட்ட தொலைபேசி எண்ணுக்கு வரும் ஒருமுறை கடவுச்சொல் (OTP) மூலம் விண்ணப்பதாரர் தனது அடையாளத்தை உறுதிப்படுத்த வேண்டும்.
இந்தச் சரிபார்ப்பு முடிந்த பின்னரே, அவர் மீண்டும் தேர்தல் ஆணையத்தின் தளத்திற்குத் திருப்பி விடப்படுவார்.
இந்தச் செயல்முறை, வாக்காளர் பட்டியலில் இருந்து பெயர்களை நீக்கும் நடவடிக்கையில் வெளிப்படைத்தன்மையையும், பாதுகாப்பையும் உறுதி செய்யும் என எதிர்பார்க்கப்படுகிறது.
வாக்காளர் பதிவு விதிகள், 1960
வாக்காளர் பதிவு விதிகள், 1960-இன்படி, எந்த ஒரு பெயரும் வாக்காளர் பட்டியலில் இருந்து நீக்கப்படும் முன், சம்பந்தப்பட்ட நபருக்கு அறிவிப்பு அனுப்பி, அவர் தரப்பு நியாயத்தைக் கேட்க வாய்ப்பு அளிக்கப்பட வேண்டும் என்பது குறிப்பிடத்தக்கது.
