விவசாயிகளின் குறைகளுக்கு உடனடித் தீர்வு! இன்று மற்றும் நாளை குறைதீர்க்கும் கூட்டம்..!

தூத்துக்குடியில் இன்று விவசாயிகள் குறைதீர்க்கும் கூட்டம் நடைபெறும். இதில் விவசாயிகள் கலந்து கொண்டு விவசாயம் சம்பந்தப்பட்ட குறைகளை தெரிவித்து பயன்பெறலாம்.

ஒவ்வொரு மாதமும் மாவட்ட ஆட்சியர் தலைமையில் நடத்தப்படும் ஒரு கூட்டம் இது. இந்த கூட்டங்கள் மாவட்ட நிர்வாக அலுவலகங்களில் நடைபெறும். மேலும் அரசு துறைகளிடமிருந்து உடனடி தீர்வுகள் அல்லது அரசின் கவனத்திற்கு கொண்டு செல்லப்படும் பிரச்சினைகளை விவாதிக்க இவை உதவுகின்றன. ஒவ்வொரு மாவட்டத்திலும் இந்த கூட்டங்கள் மாதந்தோறும் குறிப்பிட்ட தேதியில் நடைபெறும்.

கூட்டத்தின் முக்கிய நோக்கம் விவசாயிகளின் பிரச்சனைகளையும், கோரிக்கைகளையும், புதிய திட்டங்கள் குறித்த கருத்துக்களையும் மாவட்ட நிர்வாகம் கேட்டறிவதே இதன் முக்கிய நோக்கமாகும். நீர், மின்சாரம், கடன், பயிர் காப்பீடு, விளைபொருட்களுக்கான விலை நிர்ணயம், மானியங்கள், கூட்டுறவு வங்கிகள், வேளாண்மைத் துறை திட்டங்கள் தொடர்பான குறைகளை தீர்ப்பதற்காக இந்த கூட்டங்கள் நடைபெறும். இதில் மாவட்ட ஆட்சியர்(District Collector), விவசாயிகள், விவசாய சங்க பிரதிநிதிகள், வேளாண்மைத் துறை அதிகாரிகள், வருவாய்த்துறை அதிகாரிகள் மற்றும் பிற துறை சார்ந்த அரசு அலுவலர்கள் பங்குபெறுவார்கள். இந்த கூட்டங்கள் பற்றிய அறிவிப்புகள் மாவட்டத்தின் அதிகாரபூர்வ அரசு இணையதளங்கள் மூலம் வெளியிடப்படுகின்றன. இவை விவசாயிகளின் குரலை அரசிற்கு கொண்டு சேர்க்கும் ஒரு முக்கியமான மேடையாகும்.

தூத்துக்குடி மாவட்ட கலெக்டர் இளம்பகவத் வெளியிட்டுள்ள செய்திக்குறிப்பில், "2026-ம் ஆண்டு ஜனவரி மாதத்திற்கான விவசாயிகள் குறைதீர்க்கும் நாள் கூட்டம் இன்று (22.1.2026, வியாழன்கிழமை) காலை 10 மணியளவில் தூத்துக்குடி மாவட்ட கலெக்டர் அலுவலகம் முத்து அரங்கத்தில் வைத்து நடைபெற உள்ளது. எனவே தூத்துக்குடி மாவட்ட விவசாயப் பெருமக்கள் அனைவரும் இந்த கூட்டத்தில் கலந்துகொண்டு விவசாயம் சம்பந்தபட்ட குறைகளைத் தெரிவித்து பயன்பெறலாம்" என்று தெரிவித்துள்ளார்.

கிருஷ்ணகிரி மாவட்ட விவசாயிகள் குறைதீர்க்கும் கூட்டம் நாளை 23ம் தேதி வெள்ளிக்கிழமை காலை 10 மணிக்கு கலெக்டர் அலுவலகத்தில், கலெக்டர் தினேஷ்குமார் தலைமையில் நடக்க இருக்கிறது. திருவாரூர், தஞ்சாவூர், திருப்பத்தூர், செங்கல்பட்டு ஆகிய மாவட்டங்களில் மாவட்ட ஆட்சியர் அலுவலகங்களில் வாராந்திர மக்கள் குறைதீர்க்கும் நாள் கூட்டங்கள் தொடர்ந்து நடைபெறுகின்றன. இதில் பொதுமக்கள் கல்வி உதவித்தொகை, குடும்ப அட்டை, பட்டா மாறுதல், சாலை வசதி, புதிய ரேஷன் கடைகள் போன்ற பல்வேறு கோரிக்கைகளை மனுக்களாக அளித்து வருகின்றனர். இந்தக் கூட்டங்கள் மாவட்ட ஆட்சியர் தலைமையில் நடைபெற்று, பெறப்படும் மனுக்களின் அடிப்படையில் உரிய நடவடிக்கை எடுக்கப்பட்டு வருகிறது.