இந்த ஒரு கார்டு இருந்தால் போதும்..! ரூ.500 செலுத்தி ரூ.1,250 மதிப்பிலான பலன்களை அள்ளலாம்..!

ஃபின்டெக் மற்றும் இ-காமர்ஸ் துறைகளில் ஒரு முக்கிய வளர்ச்சியாக, எஸ்பிஐ கார்ட் மற்றும் ஃபிளிப்கார்ட் ஒரு புதிய, இணை-பிராண்டட் கடன் அட்டையை (co-branded credit card) அறிமுகப்படுத்தியுள்ளன.

'ஃப்ளிப்கார்ட் எஸ்பிஐ கிரெடிட் கார்டு' என அழைக்கப்படும் இந்த அட்டை, ஃபிளிப்கார்ட் மற்றும் அதன் துணை நிறுவனங்களான மின்ட்ரா, ஷாப்ஸி, மற்றும் க்ளியர்ட்ரிப் ஆகிய தளங்களில் வாடிக்கையாளர்களுக்குச் சிறப்பான பலன்களை வழங்குவதை நோக்கமாகக் கொண்டுள்ளது. இந்த அட்டை, எஸ்பிஐ-யின் தலைவர் செல்லா ஸ்ரீனிவாசுலு ஷெட்டி மற்றும் எஸ்பிஐ-யின் நிர்வாக இயக்குநர் அஸ்வினி குமார் திவாரி ஆகியோர் முன்னிலையில் தொடங்கப்பட்டது.

இந்த அட்டையைப் பயன்படுத்தி மின்ட்ராவில் ஷாப்பிங் செய்யும்போது 7.5% கேஷ்பேக் மற்றும் ஃபிளிப்கார்ட், ஷாப்ஸி, மற்றும் க்ளியர்ட்ரிப்பில் செலவு செய்யும்போது 5% கேஷ்பேக் கிடைக்கும்.

கூடுதலாக, ஸ்விகி, உபர், நெட்மெட்ஸ் மற்றும் பிவிஆர் போன்ற குறிப்பிட்ட பிராண்டுகளில் 4% கேஷ்பேக் மற்றும் மற்ற அனைத்து தகுதியான செலவுகளுக்கும் 1% வரம்பற்ற கேஷ்பேக் கிடைக்கும்.

இந்தக் கடன் அட்டைக்கு விண்ணப்பிக்க, வாடிக்கையாளர்கள் ஃபிளிப்கார்ட் செயலி, எஸ்பிஐ கார்ட் ஸ்பிரிண்ட் அல்லது எஸ்பிஐ கார்ட் இணையதளம் வழியாக டிஜிட்டல் முறையில் விண்ணப்பிக்கலாம். இந்த அட்டை ஒரு வருடத்திற்கு ₹500 கட்டணம் கொண்டது. எனினும், ஒரு வருடத்தில் ₹3,50,000-க்கு மேல் செலவழிக்கும் வாடிக்கையாளர்களுக்கு அடுத்த ஆண்டு புதுப்பித்தல் கட்டணமான ₹500 தள்ளுபடி செய்யப்படும்.

மேலும், இந்த அட்டையில் ₹1,250 மதிப்பிலான பலன்களும், பெட்ரோல் நிலையங்களில் 1% எரிபொருள் கட்டண தள்ளுபடியும் உண்டு. இந்த அட்டையானது மாஸ்டர்கார்டு மற்றும் விசா ஆகிய இரண்டு தளங்களிலும் கிடைக்கும். வாடிக்கையாளர்களின் வாங்கும் அனுபவத்தை மேம்படுத்தவும், முறையான கடன் சேவைகளை எளிதாக்கவும் இந்த அட்டை உதவும் என்று எஸ்பிஐ கார்ட் மற்றும் ஃபிளிப்கார்ட் நிறுவனங்கள் நம்பிக்கை தெரிவித்துள்ளன.