மனைவி வீட்டில் 'சும்மா' இருக்கிறார் என்று இனி கூற முடியாது - ஆண்களுக்கு நீதிமன்றம் எச்சரிக்கை..!

பணியுரியாத மனைவி வீட்டில் சும்மா இருபபதாக கூறுவது சரியல்ல. ஜீவனாம்சத்தை தீர்மானிக்கும்போது, அவரது பங்களிப்பை புறக்கணிப்பது நியாயமல்ல என்று டெல்லி ஐகோர்ட்டு கூறியுள்ளது.

டெல்லியை சேர்ந்த ஒரு தம்பதிக்கு கடந்த 2012-ம் ஆண்டு திருமணம் ஆனது. ஒரு ஆண் குழந்தை பிறந்து 7 வயது ஆன நிலையில், 2020-ம் ஆண்டு மனைவியையும், மகனையும் விட்டு கணவர் பிரிந்து சென்றதாகக் குற்றம் சாட்டப்பட்டது.

இடைக்கால ஜீவனாம்சம் கோரி, மனைவி மாஜிஸ்திரேட்டு கோர்ட்டில் வழக்கு தொடர்ந்தார். அந்த மனைவி திறமையானவள், நன்கு படித்தவள், ஆனால் வேலை தேட விரும்பவில்லை என்ற அடிப்படையில் இடைக்கால பராமரிப்பு வழங்க ஒரு மாஜிஸ்திரேட் நீதிமன்றம் மறுத்துவிட்டது. மேல்முறையீட்டு நீதிமன்றத்தால் மனைவிக்கு எந்த நிவாரணமும் வழங்கப்படவில்லை.

பின்னர் டெல்லி ஐகோர்ட்டில் மேல்முறையீடு செய்தார். மனைவி சம்பாதிக்கும் திறன் இருக்கும்போது "சும்மா" உட்கார்ந்து பராமரிப்பு கோர முடியாது என்றும், அவர்களின் மைனர் குழந்தையின் கல்விச் செலவுகளை அவர்தான் கவனித்துக் கொள்கிறார் என்றும் கணவர் உயர்நீதிமன்றத்தில் வாதிட்டார்.

இருதரப்பு வாதங்களையும் கேட்டு விசாரணை முடிந்த நிலையில் நீதிபதி ஸ்வர்ண காந்த சர்மா தீர்ப்பு அளித்தார். குடும்ப வன்முறையில் இருந்து பெண்களை பாதுகாக்கும் சட்டத்தின்கீழ், அப்பெண்ணுக்கு ஜீவனாம்சம் அளிக்க உத்தரவிட்டார்.

நீதிபதி தனது தீர்ப்பில் கூறியிருப்பதாவது..

ஒரு குடும்ப தலைவி சும்மா உட்கார்ந்து இருப்பதில்லை. சம்பாதிக்கும் கணவர் திறம்பட செயல்படும் வகையில் அவர் உழைப்பை அளிக்கிறார். குழந்தைகளையும், வீட்டையும் கவனித்து கொள்கிறார். ஜீவனாம்ச கோரிக்கையை தீர்மானிக்கும் போது, அவரது பங்களிப்பை கண்டுகொள்ளாமல் இருப்பது நியாயமல்ல. சம்பாதிக்காத மனைவி 'சும்மா' இருக்கிறார் என்ற அனுமானம் வீட்டுப் பங்களிப்புகள் குறித்த தவறான புரிதலை பிரதிபலிக்கிறது.

‘சும்மா இருக்கும் மனைவி’ என்று சொல்வது கட்டுக்கதை. ஒரு மனைவி வேலையில்லாமல் இருப்பதை சோம்பேறித்தனம் அல்லது வேண்டுமென்றே கணவரை சார்ந்திருப்பதாக கருத முடியாது என்றும், ஜீவனாம்ச கோரிக்கையை தீர்மானிக்கும்போது ​​சட்டம் சம்பாத்தியத்தை மட்டுமின்றி, திருமணத்தின் போது வீடு மற்றும் வீட்டு உறவுக்கு அவள் செய்யும் பங்களிப்புகளின் பொருளாதார மதிப்பையும் அங்கீகரிக்க வேண்டும் என்றும் டெல்லி உயர் நீதிமன்றம் குறிப்பிட்டது.

ஒரு வீட்டை நிர்வகிப்பது, குழந்தைகளைப் பராமரிப்பது, குடும்பத்தை ஆதரிப்பது மற்றும் சம்பாதிக்கும் கணவரின் தொழில் மற்றும் இடமாற்றங்களைச் சுற்றி ஒருவரின் வாழ்க்கையை சரிசெய்வது ஆகியவை பெரும்பாலும் அங்கீகரிக்கப்படாதவை என்றாலும் அவை அனைத்து ஒரு வகையான வேலைகளாகும் மற்றும் அவை ஊதியம் பெறாதவை . இந்தப் பொறுப்புகள் வங்கி அறிக்கைகளில் தோன்றுவதில்லை அல்லது வரி விதிக்கக்கூடிய வருமானத்தை உருவாக்குவதில்லை. இருப்பினும் அவை பல குடும்பங்கள் செயல்படும் கண்ணுக்குத் தெரியாத கட்டமைப்பை உருவாக்குகின்றன என்று நீதிமன்றம் குறிப்பிட்டது.

வேலை செய்யாததை சும்மா இருப்பதாக வர்ணிப்பது எளிது. ஆனால் ஒரு குடும்பத்தை தாங்குவதில் அவரது உழைப்பை அங்கீகரிப்பது மிகவும் கடினம். எனவே ஒரு மனைவியின் பணிபுரியாத நிலையை கணவரை வேண்டுமென்றே சார்ந்திருப்பதுடன் சமப்படுத்தும் பார்வையை ஒப்புக்கொள்ள முடியாது.

தற்போதைய வழக்கில், மனைவியின் கடந்த கால அல்லது தற்போதைய வேலை அல்லது வருவாய்க்கான எந்த ஆதாரமும் இல்லை என்று நீதிமன்றம் முடிவு செய்து, வீட்டு வன்முறைக்கு எதிரான சட்டத்தின் கீழ் அவருக்கு ரூ.50 ஆயிரம் ஜீவனாம்சம் அளிக்க உத்தரவிடுகிறோம் என்று கூறினார்.