ICICI வாடிக்கையாளர்களுக்கு ஷாக்..! திடீரென 400% உயர்ந்த மினிமம் பேலன்ஸ் தொகை..!

புதிய வங்கிக் கணக்கு தொடங்குபவர்களுக்கு ஐசிஐசிஐ வங்கி ஒரு முக்கிய அறிவிப்பை வெளியிட்டுள்ளது. அதன்படி, ஆகஸ்ட் 1, 2025 முதல், புதிய வாடிக்கையாளர்கள் தங்களின் சேமிப்புக் கணக்கில் பராமரிக்க வேண்டிய குறைந்தபட்ச மாதாந்திர சராசரி இருப்புத் தொகை (Minimum Average Monthly Balance - MAB) கணிசமாக உயர்த்தப்பட்டுள்ளது. இந்த மாற்றம், குறிப்பாக பெருநகரம் மற்றும் நகர்ப்புற வாடிக்கையாளர்களுக்குப் பெரும் தாக்கத்தை ஏற்படுத்தும்.

ஐசிஐசிஐ வங்கி வெளியிட்ட அறிவிப்பின்படி, புதிய கணக்குகளுக்கான குறைந்தபட்ச இருப்புத் தொகை பிரிவுகளின்படி பின்வருமாறு மாற்றியமைக்கப்பட்டுள்ளது:

பெருநகரங்கள் மற்றும் நகர்ப்புறங்கள்: இதற்கு முன் ₹10,000 ஆக இருந்த குறைந்தபட்ச இருப்புத் தொகை தற்போது ₹50,000 ஆக உயர்த்தப்பட்டுள்ளது. இது 400% அதிகரிப்பு ஆகும்.

அரை நகர்ப்புறங்கள் (Semi-Urban): இங்கு ₹5,000 ஆக இருந்த குறைந்தபட்ச இருப்புத் தொகை ₹25,000 ஆக அதிகரிக்கப்பட்டுள்ளது.

கிராமப்புறங்கள்: கிராமப்புறங்களில் ₹2,500 ஆக இருந்த குறைந்தபட்ச இருப்புத் தொகை ₹10,000 ஆக உயர்ந்துள்ளது.

இந்த புதிய விதிகள் ஆகஸ்ட் 1, 2025 அன்று அல்லது அதற்குப் பிறகு வங்கிக் கணக்கு தொடங்கிய புதிய வாடிக்கையாளர்களுக்கு மட்டுமே பொருந்தும். ஏற்கனவே ஐசிஐசிஐ வங்கியில் கணக்கு வைத்திருப்பவர்களுக்குப் பழைய குறைந்தபட்ச இருப்புத் தொகையே தொடரும்.

புதிய விதிகளின்படி, வாடிக்கையாளர்கள் தங்களின் கணக்கில் தேவையான குறைந்தபட்ச மாதாந்திர இருப்புத் தொகையை பராமரிக்கத் தவறினால் அபராதம் விதிக்கப்படும். இந்த அபராதம், குறையுள்ள தொகையில் 6% அல்லது ₹500 (இதில் எது குறைவோ அது) என்ற அடிப்படையில் வசூலிக்கப்படும்.

ஐசிஐசிஐ வங்கியின் இந்த நடவடிக்கை, அதிக வருமானம் ஈட்டும் மற்றும் செல்வந்த வாடிக்கையாளர்களை இலக்காகக் கொண்டு எடுக்கப்பட்டுள்ளதாகக் கூறப்படுகிறது. குறைந்த இருப்புத் தொகை கொண்ட கணக்குகளைக் குறைத்து, அதிக லாபம் ஈட்டக்கூடிய வாடிக்கையாளர் தளத்தை உருவாக்குவதே வங்கியின் நோக்கமாக இருக்கலாம் என வங்கி நிபுணர்கள் கருதுகின்றனர். இந்த மாற்றம், இந்தியாவின் மிகப்பெரிய வங்கியான ஸ்டேட் பாங்க் ஆஃப் இந்தியா (SBI) 2020-இல் குறைந்தபட்ச இருப்புத் தொகையைக் கட்டாயமற்றதாக்கியதற்கு நேர்மாறாக உள்ளது.