ஜோசியம் பார்க்கலையோ ஜோசியம்!

இன்று, மார்ச் 21 உலக ஜோதிட நாளாகும். இந்த நாளில் ஜோதிடம் சார்ந்த சில விஷயங்களை நாம் அறிந்து கொள்வோம். 

பல நூறு ஆண்டுகளாக இந்திய கலாச்சாரத்தின் ஒர் அங்கமாக ஜோதிடம் இருந்து வருகிறது. இதை வேத ஜோதிடம் என்றும் அழைப்பார்கள். கிரகங்கள் மற்றும் நட்சத்திரங்களைப் பொறுத்து உடல்களின் நிலைகள் மற்றும் இயக்கங்களை ஆய்வு செய்வதை இது அடிப்படையாகக் கொண்டது. 

ஜோதிஷ் அல்லது வேத ஜோதிடம் என்று அழைக்கப்படும் இந்த முறையானது பண்டைய காலத்தில் இந்தியாவில் தோன்றிய ஓர் முறையாகும். இது உலகில் உள்ள பழமையான ஜோதிட முறைகளில் ஒன்றாக கருதப்படுகிறது. கிட்டத்தட்ட 5000 ஆண்டுகளுக்கு முந்தைய வரலாற்றை இது கொண்டிருக்கிறது என்பது ஆச்சரியமான விஷயம் தான். 

வான சாஸ்திரமானது கிரகங்கள் மற்றும் நட்சத்திரங் களின் நிலைகளைக் கொண்டு ஒரு நபருடைய தொழில், உறவு, ஆரோக்கியம் மற்றும் ஆன்மீகம் போன்ற மனித வாழ்க்கையின் பல்வேறு அம்சங்களை ஆழமாகக் கணிக்க உதவும் என நம்பப்படுவதால் பலரும் இதை முக்கியமாக பார்க்கிறார்கள். ஜோதிடம் பார்ப்பது மூலமாக தங்கள் வாழ்க்கையை எவ்வாறு வழிநடத்துவது என்பது பற்றிய தெளிவு மற்றும் வழிகாட்டுதல் கிடைப்பதாக நம்புகிறார்கள். 

இந்த வேத ஜோதிடத்தின் சிக்கலான அமைப்பை படித்த பயிற்சி பெற்ற ஜோதிடர்களால் மட்டுமே நடைமுறைப் படுத்த முடியும். ஒரு தனி நபரின் வாழ்க்கை எப்படி இருக்கும் என்பதை அறிய ஜோதிடர்கள் பல கருவிகளையும் நுட்பங்களையும் பயன்படுத்துகிறார்கள். இந்தியாவில் ஜோதிடம் மிகவும் மதிக்கப்படும் தொழிலாகும். வாழ்வில் எந்த ஒரு செயலை செய்ய வேண்டுமானாலும் ஜோதிடம் பார்த்து அதற்கான நேரம் காலம் குறிக்கப்பட்டே செயல்படுத்தப்படுகிறது. 

உலகம் முழுவதும் பல வகையான ஜோதிட முறைகள் நடைமுறையில் இருந்தாலும், இதனுடைய பூர்வீகம் இந்தியா தான் என்று கூறப்படுகிறது. வேதங்கள் மற்றும் புராணங்களின் அடிப்படையில், ஆயிரக்கணக்கான ஆண்டுகளுக்கு முன்பே ஜோதிடம் எழுதப்பட்டது என பண்டைய நூல்களில் தெரிவிக்கப்பட்டுள்ளது

வாழ்க்கை சார்ந்த திருமணம், குழந்தை பிறப்பு, தொழில் தொடங்குதல் போன்ற பல்வேறு வகையான முக்கிய முடிவுகளை எடுக்கும்போது ஜோதிடம் பயன்படுத்தப் படுகிறது. மேலும் ஒருவரின் ஆளுமை மற்றும் குண நலன்களைப் பற்றி அறியவும், அத்துடன் வாழ்க்கையில் ஏற்படும் தடைகளை பற்றி புரிந்துகொள்ளவும் அதிலிருந்து நம்மை காத்துக்கொள்ளவும் ஜோதிடத்தை நம்புகிறார்கள் பல கோடி மக்கள்.