2000 நோட்டுகள் 88% திரும்ப வந்துவிட்டது.. ரிசர்வ் வங்கி!

நாட்டில் புழக்கத்தில் இருந்த 2 ஆயிரம் ரூபாய் நோட்டுகளில் 88 சதவீதம் திரும்பப் பெறப்பட்டுவிட்டதாக ரிசர்வ் வங்கி தெரிவித்துள்ளது. 

2 ஆயிரம் ரூபாய் நோட்டுகளை திரும்பப் பெறுவதாக கடந்த மே மாதம் 19 ஆம் தேதி ரிசர்வ் வங்கி அறிவித்தது. ரூபாய் நோட்டுகளை வங்கிகளில் மாற்றி கொள்ளலாம் என்றும், செப்டம்பர் 30-ஆம் தேதி வரை கால அவகாசம் வழங்கப்படுவதாகவும் தெரிவித்தது.அதுவரை 2 ஆயிரம் ரூபாய் நோட்டுகள் பரிவர்த்தனையில் செல்லும் எனவும் ரிசர்வ் வங்கி விளக்கமளித்தது.

மே 19-ஆம் தேதி நிலவரப்படி நாட்டில் மொத்தம் 3 லட்சத்து 56 ஆயிரம் கோடி ரூபாய் அளவுக்கு 2 ஆயிரம் ரூபாய் நோட்டுகள் புழக்கத்தில் இருந்ததாகவும், இதில், 3 லட்சத்து 14 ஆயிரம் கோடி ரூபாய் வங்கிகள் மூலம் திரும்பப்பெறப்பட்டுள்ளதாகவும் குறிப்பிட்டுள்ளது.

இதுவரை 88 சதவீத நோட்டுகள் ரிசர்வ் வங்கிக்கு திரும்பியுள்ளதாகவும், 42 ஆயிரம் கோடி ரூபாய் மட்டுமே இன்னும் புழக்கத்தில் இருப்பதாகவும் கூறியுள்ளது. பெறப்பட்ட 2 ஆயிரம் ரூபாய் நோட்டுகளில், 87 சதவீதம் வங்கி கணக்குகளில் டெபாசிட் செய்யப்பட்டவை என்றும், 13 சதவீதம் நோட்டுகள் மாற்றப்பட்டன என்றும் தெரிவித்துள்ளது.கூடுதல் கால அவகாசம் வழங்குவதா, வேண்டாமா என செப்டம்பர் மாத இறுதியில் முடிவு செய்யப்படும் என ரிசர்வ் வங்கி குறிப்பிட்டுள்ளது.