யு டர்ன் எடுக்கும் இந்திய மாணவர்கள்...இனி அமெரிக்காவே வேண்டாம்… ஜெர்மனி, பிரிட்டன் நாடுகளுக்கு படையெடுப்பு..!

அமெரிக்காவில் உயர்கல்வி கற்க விரும்பும் இந்திய மாணவர்களுக்கு விசா நடைமுறைகளில் நிலவி வரும் கெடுபிடிகள், ஐரோப்பிய நாடுகளுக்குச் செல்லும் மாணவர்களின் எண்ணிக்கையை கணிசமாக அதிகரித்துள்ளன.

கடந்த சில ஆண்டுகளாகவே அமெரிக்கா மாணவர் விசாவை வழங்குவதில் கடும் கட்டுப்பாடுகளை விதித்து வருகிறது. குறிப்பாக, சமூக ஊடகப் பதிவுகளை ஆராய்வது, நேர்முகத் தேர்வுகளில் கடுமையான கேள்விகளைக் கேட்பது போன்ற காரணங்களால் பல மாணவர்களின் விசா விண்ணப்பங்கள் நிராகரிக்கப்படுவது அல்லது தாமதமாவது அதிகரித்து வருகிறது.

இந்தக் கெடுபிடிகள் இந்திய மாணவர்களுக்கு பெரும் மன உளைச்சலையும், நிச்சயமற்ற நிலையையும் ஏற்படுத்துகின்றன. இதன் காரணமாக, பல மாணவர்கள் தங்கள் அமெரிக்க கனவை கைவிட்டு, ஐரோப்பிய நாடுகளை நோக்கித் தங்கள் பார்வையைத் திருப்பியுள்ளனர்.

ஜெர்மனி, பிரான்ஸ், நெதர்லாந்து, அயர்லாந்து போன்ற நாடுகள், ஒப்பீட்டளவில் குறைந்த கல்விக் கட்டணம், சிறந்த கல்வித் தரம், படிப்புக்குப் பிந்தைய வேலைவாய்ப்புக்கான வாய்ப்புகள் மற்றும் எளிதான விசா நடைமுறைகள் போன்ற காரணங்களால் இந்திய மாணவர்களை அதிகம் ஈர்க்கின்றன.

சில ஐரோப்பிய நாடுகளில் பொதுப் பல்கலைக்கழகங்களில் கல்விக் கட்டணமே இல்லை என்பது இந்திய மாணவர்களுக்கு ஒரு பெரிய வரப்பிரசாதமாகப் பார்க்கப்படுகிறது. மேலும், ஷெங்கன் விசா மூலம் பல ஐரோப்பிய நாடுகளுக்குச் செல்லும் வசதி, ஐரோப்பிய மொழிகளைக் கற்றுக்கொள்வதன் மூலம் கிடைக்கும் வேலைவாய்ப்புகள் போன்ற கூடுதல் சலுகைகளும் மாணவர்களை ஐரோப்பாவை நோக்கித் தள்ளுகின்றன.

ஆண்டுதோறும் 10 லட்சத்திற்கும் அதிகமான வெளிநாட்டு மாணவர்கள் அமெரிக்க பல்கலைக்கழகங்களில் சேர்கின்றனர். அதில் 3லட்சத்துக்கும் அதிகமானோர் இந்தியர்கள். ஆனால், தற்போது விசா கெடுபிடியால் சுமார் 70 சதவிகிதம் குறைந்துள்ளது.

இந்தியாவில் உள்ள வெளிநாட்டு கல்வி ஆலோசகர்களும், அமெரிக்காவுக்கான விண்ணப்பங்கள் குறைந்துள்ளதாகவும், ஐரோப்பிய நாடுகளுக்கான விசாரணைகள் மற்றும் விண்ணப்பங்கள் கணிசமாக அதிகரித்துள்ளதாகவும் தெரிவிக்கின்றனர். கடந்த ஆண்டுடன் ஒப்பிடுகையில், ஜெர்மனி, பிரான்ஸ் மற்றும் பிற ஐரோப்பிய நாடுகளுக்கான மாணவர் விண்ணப்பங்கள் 20% முதல் 60% வரை அதிகரித்துள்ளதாக சில ஆலோசகர்கள் கூறுகின்றனர்.

அமெரிக்கா தனது விசா கொள்கைகளில் மாற்றங்களைச் செய்யாத வரையில், ஐரோப்பா, கனடா, ஆஸ்திரேலியா போன்ற நாடுகளுக்குச் செல்லும் இந்திய மாணவர்களின் எண்ணிக்கை மேலும் அதிகரிக்கும் என்று எதிர்பார்க்கப்படுகிறது. இது இந்திய மாணவர்களின் உயர்கல்வி இலக்குகளில் ஒரு புதிய போக்கைக் குறிக்கிறது.