பிறந்த குழந்தையை ரூ. 4.5 லட்சத்துக்கு விற்ற தாய்!

இந்த வழக்கில் குழந்தையின் தாய், தந்தை உட்பட மேலும் 11 பேர் கைது!

ஜார்கண்ட் மாநிலம் சத்ரா மாவட்டத்தில் ஆண் குழந்தை ஒன்று பிறந்த உடனேயே அவரது தாயால் விற்கப்பட்டதாகக் கூறப்படுகிறது.

இந்த வழக்கு தொடர்பாக புதிதாகப் பிறந்த குழந்தையின் தாய் ஆஷா தேவி உட்பட 11 பேர் கைது செய்யப்பட்டுள்ளனர். இந்த சம்பவம் குறித்து சத்ராவின் துணை கமிஷனர் அபு இம்ரானுக்கு தகவல் கிடைத்தது.

உடனடியாக, பொகாரோ மாவட்டத்தில் இருந்து புதிதாகப் பிறந்த குழந்தையை 24 மணி நேரத்திற்குள் போலீசார் மீட்டனர் என்று துணைப் பிரிவு காவல்துறை அதிகாரி (SDPO) அவினாஷ் குமார் தெரிவித்தார்.

வியாழக்கிழமை நடைபெற்ற செய்தியாளர் கூட்டத்தில் பேசிய குமார், ஆஷா தேவியிடம் இருந்து ரூ.1 லட்சத்தை போலீசார் கைப்பற்றியதாக கூறினார். ஆஷாவின் கைது காவல்துறையை அடுத்ததாக டிம்பிள் தேவி என அடையாளம் காணப்பட்ட 'சாஹியா தீதி'யிடம் அழைத்துச் சென்றது. டிம்பிள் தேவியிடம் இருந்து பெற்ற தகவல்களின் அடிப்படையில், மற்ற குற்றவாளிகளை போலீசார் கைது செய்து பொகாரோவில் இருந்து குழந்தையை மீட்டனர் என்று அதிகாரி கூறினார்.

ஹசாரிபாக் மாவட்டத்தில் உள்ள பட்காகான் கிராமத்தைச் சேர்ந்த இந்த தம்பதியினர் சத்ரா மற்றும் பொகாரோ ஆகிய இரு தரகர்களுடன் இணைந்து புதிதாகப் பிறந்த குழந்தையை ரூ.4.5 லட்சத்திற்கு விற்க ஒப்பந்தம் செய்துள்ளனர்.

குழந்தையின் தாய்க்கு ரூ.1 லட்சமும், மீதி ரூ.3.5 லட்சம் தரகர்களுக்கு என்று பணத்தை பகிர்ந்து கொண்டிருந்தனர்.

இது குறித்து சதர் மருத்துவமனையின் துணை கண்காணிப்பாளர் மருத்துவர் மணீஷ் லால் அளித்த வாக்குமூலத்தின் பேரில் சத்ரா காவல் நிலையத்தில் வழக்குப் பதிவு செய்யப்பட்டது.